《借黄糠 • 借贷》（解洪元、石筱英演唱）

解洪元、石筱英的“借贷”，是我百听不厌的。近日我抽空根据雁声老师上传的59年唱片版音频资料全部听记了下来。现在发上来，与网友们共享。虽然反复听了好几遍，但受学识水平所限，无论白口还是唱词肯定会有错讹之处，还望行家不吝赐教。



李俊明： 大郎啊！我老老路远迢迢——
                带病到此非为别啦，问你女儿来借花银。
                有钱人买鱼买肉买荤腥，穷人也要熬过这苦时辰。
                度过今年望来年，扎扎枝杨帮帮人，加利奉还送上门。
大   囡： 哼！老古说，
                借借还还家常有，只借勿还啥人肯。
                张家前门呒没摇钱树，后门勿有聚宝盆。
                柴堆经勿起两头拔，拔拔总要拔干净。
                七石缸经勿得漏水眼，漏漏漏满缸清水漏干净。
                贴煞伲娘家勿会富，带累伲张家也要贫。
                今日讲句老实话，只谈家常勿借银。
李俊明：
                只谈家常勿借银，我将苦衷讲他听。
                大郎啊，我屋里厢三餐茶饭常欠缺，
                小船要靠侬大船领。
                除脱侬大郎少依靠，多少勿论侬要答应。
大   囡：真是人穷低想。老老，我拿侬有好一比。
李俊明：比啥？
大   囡：比侬像一个白虱，
李俊明：拿我老老比作骨蛀虫啊！
大   囡：侬看呀，㑚女婿倌开典当，多少有体面，我哪能会得该得着迪能个穷爷，来坍我个台，真像湖推刨子浪              多一个白虱，侬问我来借铜钿，真像吃我的心血。
李俊明：        
                大郎不念我老老苦，再提一提她同胞手足情。
                大郎啊！我老老吃苦倒还罢，带累㑚妹妹是太伤心。
                她像含苞初放嫩花朵，经勿起狂风暴雨淋。
                千朵桃花一颗树浪生，同胞妹妹侬要照应。
大   囡：妹妹？
                勿提妹妹倒还罢，提起妹妹我恨伤心。
                你为何，两个囡娪两样待，问侬存点啥个心。
                你把我嫁出囡娪泼出水，推出仔日头早关门。
                长大小囡勿出嫁，生啥金呢生啥银。
                提起别人好商量，提起妹妹勿答应。
李俊明：
                老父少女全不顾，我再提一提她亡故的老娘亲。
                大郎啊！㑚姆妈养侬恁宝贝，珍和宝，宝和珍。
                抱勒拉手里常怕风吹去，含勒嘴里像烊个恁。
                六月里蚊子院里厢喂你奶，雪白皮肤拨蚊子叮。
                十二月敲开仔冰窟尿布汏，只只指头是痛在心。
              大郎啊！
                千看万看总要看勒㑚亡故的娘亲面，
                借一眼铜钿回转门。
大   囡：唉！
                都是你瞎用铜钿管闲事，害姆妈气出了一场病。
                有了毛病勿肯看，拖三拖四误时辰。
                姆妈为侬气煞脱，今天你何必做好人。
李俊明：大郎啊！㑚姆妈个毛病——
                我郎中请仔好几位，当当卖卖医你娘个病。
                药方倒有一大叠，药渣堆起假山恁。
                无奈她服药无效呒没用，一命呜呼丧了生。
                㑚姆妈临死想念侬，几时上过娘家门。
大   囡：
                㑚穷人勿晓得富人忙，大囡过门就做当家人。
                里外照顾忙煞人，哪里工夫来闯乡邻。
                虽然姆妈临死我未回转，
                拿回来一块锡箔廿卷经，以报我亲娘养育恩。
                现在是清明、七月半，十月灶、冬至、年夜汛。
                死勒拉羹饭我来做，活勒拉个羹饭勿应承。
李俊明：一块锡箔……
大   囡：阿二啊，人参汤煎好吗？
阿   二：煎好来！
李俊明：大郎！侬吃个人参汤格只碗，也是我爷搭侬陪嫁过来个。
            大郎！
                看经勿起看佛面，嫁妆面浪看三分。
                做爷为侬迪个一点嫁妆一家人家嫁穷脱，
                女儿总知爷个心。
大   囡：提起嫁妆——
                像踏碎皮球一包气，大郎越想越是恨。
                想当初叫声爹爹亲大人，嫁妆勿要太过分。
                我说四橱八箱用勿完，侬为啥硬劲送上门。
                奈侬张开眼睛看看清，枱子脱脚凳勿平，
                箱子都用绳来捆，丢勒拉壁角落里受蓬尘。
                我是叫声爹爹亲大人，嫁妆勿要太过分，
                老布衣裳太嫌多，绸缎绫罗勿牵匀。
                尺二挂肩尺三袖，四周都用洋镶滚。
                其中缺一条大红绉纱月华百裥个响铃裙，
                被街坊邻居当话柄。
                我是叫声爹爹亲大人，
                囡到夫家难做人，问侬讨一点活命本，
                我家有块高头地，廿九亩来另七分，
                你为何吞吞吐吐勿答应？
                勿提起嫁妆借拨侬，提起嫁妆勿答应，
                等到黄狗出角变麒麟。
李俊明：大郎！侬像吃仔勾藤汤淘饭——
                声声句句弯攀我，勿记好来是反见恨。
                当初辰光侬在娘家，“爹爹”“爹爹”亲又亲，
                叫我一声“爹爹亲大人”，我摸洋钿是“噢”声恁；
                叫我一声“爹爹亲大人”，嫁妆用品是办端正；
                叫我一声“爹爹亲大人”，裙子勿做干折侬五十块银洋饼；
                叫我一声“爹爹亲大人”，高头田我付田粮你收现成。
                为什么侬问我讨像花好稻好样样好，   
                我问侬借为什么象东海大洋撩绣针？
                体面闲话问侬借，拿侬两钿也作兴。
大   囡：老头子！一本正经问我来讨嫁妆咋？
李俊明：勿！勿！
                嫁女儿应当要办嫁妆，
                爷有困难要侬囡照应。
大   囡：我真也勿相信，难道侬屋里厢真个一点都呒没办法了吗？
李俊明：山穷水尽，吃尽当光。
大   囡：吔，侬勿是刚才说屋里还有妹妹？
李俊明：㑚妹妹是少吃少穿。
大   囡：爹爹！
                侬是有福之人路不绝，
李俊明：喔？
大   囡：
                养得着妹妹迪能个好人品。
                或者今年头里来勿及，但等明年上三春。
                侬搭伊是头梳梳来面净净，短衫裤子换一身。
                领伊到苏州观前街，或者乘船到上海城，
                卖到伊妓院里做清官人，可以卖一二百块身价银。
                妹妹能过好日脚，老老你到手活命本。
李俊明：啊！我嫁侬大囡一家人家嫁穷，勒小囡身浪还可以发财啊？
大   囡：是啊！爹爹，侬拿妹妹卖脱，侬就可以发财了，侬要是卖到几百块洋钿，
              爹爹，
                㑚李家屋里摆勿得，有小人算计贼来啃，
                还是摆勒伲张家典当里，侬用利钿我用本，
                可以吃勿完来用勿尽。
李俊明：好狠心啊！娼根像——
                刷白烟囱良心黑啦！把我当作脚下泥蓬尘。
                老老穷是穷来苦是苦，卖囡娪铜钿不受领。
              早晓得伊行搿种良心，我勒三朝里——
                一勺冷水泼煞脱啦，
                当初宠爱今日恨。
大   囡：啊呀，来人啊，阿二啊！
阿   二：哎，哎！啊呀，老相公！老相公醒醒，老相公。老相公坐一歇。老相公！
大   囡：喔哟！老头子要得死吗
阿   二：老板娘，侬拨两铜钿伊嘛！
大   囡：看样子，勿打发两个铜钿——
                今朝老老勿会走，还是拨伊两钿早出门。
                让我开开抽屉看一看，洋钿角子有两新，
              勿，伲锦春讲个，迪个是零碎驳戥当，整数要存钱庄。
                拨拉迪只老贼我勿高兴。
                让我随手捞点小钱文，使得他下转勿要上门，
                免得到张家来缠不清。
              老老！呶，迪个是我拨侬的，拿仔回去吧。
李俊明：啊？！
                三十六个薄光片，六十四钿钱嘉庆，
                六门三关侪勒拉禁，私用小钱有罪名。
阿   二：老板娘，迪个铜钿勿好用个。
大   囡：啥人讲勿好用个？侬有伐？老老！
                人人叫你千家熟，
阿   二：千家熟是叫花子啊。
大   囡：
                两个小钿换一个大钱文，侬拿回去和妹妹二人活性命。
                还得起，勿要利钿本还本，
                还勿起，大囡勿会讨上门。
李俊明：哼！
                一百小钱我勿要，你不要欺人太过分。
                迪点铜钿请留下，给你自己买纸锭。
阿   二：老板娘，昨日我称好三石五，阿要我去拿眼拨老相公？
大   囡：啥人要侬三只鼻头管一只闲都管，我本来就要去拿了。
                我伲白米堆来假山恁，拨勒老贼勿高兴，
                使他下转勿要上门，让我黄糠畚个三五升。
              呶，拿去拨勒伊。
阿   二：噢，老相公我帮侬拿噢。啊呀，哪能噶轻呃？是黄糠！老板娘，迪个糠勿好吃个呀！
大   囡：啥人讲勿好吃的？！拿到屋里去，摆点猪油摆点糖，做糠塌饼吃仔香来！
李俊明：黄糠！大郎，侬姓啥？
大   囡：我么夫家姓张，娘家姓李。
李俊明：爷姓啥？
大   囡：吔，侬么也姓李呀！
李俊明：爷姓李，囡姓李，为啥爷吃糠，囡吃米？可有天，可有地啊！
大   囡：哼，哼，哼………，迪个叫——牛吃稻柴鸭吃谷，各自人生的福，那我为啥要做开典当的老板娘呢！㑚              为啥要对我哭？
李俊明：我走！我走！
阿  二：老相公！老相公！侬慢点去。老相公！老板娘，老相公难得到此地来格，外头天又冷，伊肚皮又饿，侬              随便让伊吃一眼再去。
大   囡：好吧，侬去拿。
大   囡：回来！我自家去拿。
大   囡：呶，拨伊去吃！
阿   二：啊呀，老板娘，迪个是猫食盆啊！
大   囡：迪个叫百并饭。
阿   二：迪个哪能百并饭！是阿咪咪吃个猫食盆啊！
李俊明：啊！大郎，侬拿错了吧？
大   囡：呒没拿错。
李俊明：当真？
大   囡：当真！
李俊明：果然？
大   囡：果然！
李俊明：好啊！
                我饿死也不吃猫儿食，
                冻死也不穿女衣襟。
              娼根！
                侬行搿种良心，要被那天雷打，
                定要绝男绝女绝子孙！
大   囡：好！滚！滚！
                一拳一脚打出门。
              打是爷，骂是娘，譬如到南海烧柱香。


雁声上传的音频资料：

http://www.chinahuju.com/bbs/thread-731-1-1.html

非常感谢楼主的劳动，俺算是不劳而获。非常的喜欢，谢谢了

枝杨，是－种植物，农村从前门前打蓠芭用种的，冬天落叶可以扎成各种形色，称谓扎枝杨，音志，志乞的志，纸与伲子的子同音。不知对勿对，商权。

回复 4# 雀鸣轩

先生的提示很有道理，多谢指教！

总篇拜读辛苦了，谢谢。

谢谢楼主分享

回复 雀鸣轩 的帖子

井树吧  是哇

回复 小月 的帖子

槿树是叶子可绞汁洗头，跟枝杨勿同，枝杨现在基本看勿到，槿树还是很多，开花也能打围离

回复 雀鸣轩 的帖子

嗯 嗯  是的  荆树开花像酒盅