本帖最后由 我是个小戏迷 于 2015-10-13 12:29 编辑
根据录音整理
孔嘉宾饰李阿久(音)
宋美琴饰姑娘
姑: 阿久啊。
久：哎。
姑: 侬长远弗来，辣屋里做点啥事体噢？
久：弗瞒侬说，我近来是斤头蛮大勒嗨啊！
姑：做点啥？
久：勒辣做“布针司”。
姑：噢，个咾怪弗得侬没功夫，是忙个，做回哩布政司大人。
久：呃……侬看我迪只面孔阿像做布政司大人？
姑：个侬自己话布政司大人，官衔弗小嘛！
久：讲来好听点是“布针司”，就是勒辣“戳短枪”。
姑：啥侬近来会得当兵啊？
久：搞来，就是勒辣做裁缝师傅。
姑：啊呀，个末裁缝师傅末裁缝师傅咾，布针司咾戳短枪，花头大弗辣？
久：侬晓得我哪能会得做裁缝师傅？
姑：哪能会得去，侬没做歇过嘛，迪个。
久：弗瞒侬说，我上次来望仔侬转去啊，身体末也弗好。
姑：嗯。
久：屋里厢经济末也弗好。
姑：是伐？
久：屋里饭也弗着杠。一日到夜吃眼“稀汤饱”。
姑：啥叫啥“稀汤饱”啊？
久：“稀汤饱”末粥呀。
姑：搿末粥末粥什咾。
久：后首来粥吃弗连牵，睏辣床浪我索介弗落什。
姑：做啥？
久：两日天弗落起来，我末倒弗落呀，
姑：嗯。
久：隔壁头个邻舍侪关心我，
姑：是伐？
久：老古说呀，叫银亲眷，金邻舍。
姑：对个。
久：三好婆来望我什。
姑：嗯。
久：推到我房间里，到房间里一看啊，我没头没脑睏辣。
姑：是伐？
久：跑过来，（进入当时情境，模仿三好婆面风、声音、语调）啊呀呀，阿久啊，侬做啥睏辣？阿是身体弗舒服是伐？
姑：嗯。
久：我说：（进入当时情境，第一人称）好婆啊，迪两日有点头痛。
姑：噢。
久：（进入当时情境，模仿三好婆面风、声音、语调）搿末侬早饭吃过伐？
姑：嗯。
久：我说：（进入当时情境，以第一人称口吻）吃过哉，我说吃个“汤饱”。
姑：搿末侬是弗做人家，个铜钿呒没末，大饼油条、粢饭糕侪好吃个，汤包！汤饱啥价钿侬晓得？
久：噢哟，侬搞点啥呢？个饭也弗着扛，还吃得落汤包，吃辣两碗开水！
姑：噢。
久：吃得”汤饱” 平常叫汤包。
姑：噢，着着面子，迪个。
久：迪个叫“吊煞鬼拍粉——（叫）死要面子（呀）。”
姑：哎。
久：伊说：（进入当时情境，模仿三好婆面风、声音、语调）阿久啊，侬什梗能睏下去末也弗对个。
姑：真个，睏来真个变毛病什要。
久：（进入当时情境，模仿三好婆面风、声音、语调）一个人老古说，年纪轻轻末叫吃是吃来，做是做噢。落起来噢，去寻样把生活做做，三百六十行，行行出状元。
姑：对个，对个。
久：我说：（进入当时情境，以第一人称口吻）好婆啊，我倒也有搿能样子想法，想去做样把啥生意。奈我说：（进入当时情境，以第一人称口吻）文弗会测字，武弗会卖拳，搿哪能办法呢？
姑：搿末想想法子看呢。
久：伊说：（进入当时情境，模仿三好婆面风、声音、语调）侬真个要做末喏，我来介绍侬。我个阿侄是顾师傅做裁缝个，搭我讲过末是要收个学生子。
姑：是伐？
久：（进入当时情境，以第一人称口吻）格末我说：再好弗有。好婆说：（进入当时情境，模仿三好婆面风、声音、语调）个末侬落起来。拿套短衫裤子末搭侬汏个汏噢。
姑：倒好个。
久：领仔我到伊拉阿侄场花去拜师傅。
姑：拜师傅去。
久：乡下头拜师傅马马虎虎。
姑：阿用斤通蜡烛咾馒头糕啊？
久：用弗着个。
姑：个末哪能呀？
久：一对五灯蜡烛一点，搭师母娘师父三个头一磕，算数哉。
姑：噢。
久：好婆临走辰光特别道地，说：（进入当时情境，模仿三好婆面风、声音、语调）亻那 要照顾照顾，迪个小囡从小独养伲子咾养刁个，马马虎虎点噢。
姑：倒好个。
久：奈顾师傅说：（进入当时情境，模仿师傅面风、声音、语调）侬放心。个咾三好婆转去，我蹲辣师傅拉屋里，我去的目的想吃饭呀，不过乡下头个学生意比较苦一点。
姑：哪能啦？
久：要搭师母娘做零碎生活。
姑：噢，要帮伊拉做做个。
久：早晨头起来要捉狗污。
姑：噢哟，个捉狗污倒讨厌个嘛。
久：捉仔狗污转来烧早饭, 烧好早饭吃早饭，吃好早饭要抱小囡、汏尿布。
姑：噢哟。
久：下半日末做做我自家工作末喏：拎拎钮攀、撬粒、剪剪布头布脑。
姑：对个，纳纳布头咾啥。
久：个末我想做末归做啦，吃要吃个。
姑：对个。
久：伲师母娘早浪头喊我吃早饭哉，喔唷，我想奈末吃早饭。嚣开镬盖来一看啊，嘿嘿……
姑：啥末事啊？
久：“牛油蜡”。
姑：啥叫“牛油蜡”啊？
久：粥呀！
姑：迪个算啥个闲话啦？
久：缩脚韵呀。
姑：噢哟，缩脚韵，用回伊。
久：个我想早晨头吃粥是蛮多个。一到十二点钟，伲师母娘关照：（进入当时情境，模仿师母娘面风、声音、语调）学生子啊，吃中饭。我嚣开镬盖来一看啊，“浪衣裳”。
姑：啥叫“浪衣裳”？
久：粥呀！
姑：噢，亦是粥。
久：亦是粥！到夜里厢六点钟，伲师母娘关照：（进入当时情境，模仿师母娘面风、声音、语调）学生子，吃夜饭。奈末我想总大概吃夜饭。
姑：哎，对个。
久：嚣开来一看是，“一蓬尺”。
姑：啥叫“一蓬尺”啊？
久：粥呀！
姑：噢，亦是吃粥。噢哟！
久：奈末人家老古说叫：暴穷弗要吃粥，暴富弗要造屋。
姑：啥意思？
久：预备三千块洋钿造间房子末，结果要弄脱五千块。
姑：噢，总归要豁边。
久：多三千洋钿心境几花好？
姑：对个啊。
久：背仔两千洋钿债，用得来走头无路。
姑：忒个讨债哉。
久：暴穷弗要吃粥。吃得来个肚皮末晃叮晃咚，做末做弗动。个吃饱做弗动，坐仔打瞌冲，几花难过。
姑：对个，蛮讨厌。
久：屋里厢末也是经济弗好，师傅近来呒没生活。因为乡村浪个裁缝搭城里有点两样。
姑：啥个浪厢两样？
久：城里个裁缝师傅一年到头有生意，棉个、夹个、皮个、单个弗断个有得做。
姑：对个。
久：乡村浪个，夏天式个衣裳自家做个。冷天要做解橱衣哉，奈末请个把裁缝师傅来做做。个勒前年仔重阳糕一吃末生意来了。
姑：是伐？
久：南村浪厢来一个妈妈，张家用勒辣个，我辣场角浪厢剥毛豆呀，伊说：（进入当时情境，模仿张家老妈妈的面风、声音、语调）阿弟啊，亻那 师傅勒辣伐？明朝伲张家请亻那 师父去做生活。嘿，我说：（进入当时情境，第一人称）妈妈，伲师傅勒辣，伲师傅辣“吃面拖蟹”。
姑：啥个考究来，吃回俚面拖蟹咾啥。
久：饭也弗着杠，还吃得落面拖蟹。
姑：个侬自家话面拖蟹呀。
久：赤仔膊，睏辣棉絮，迪个叫“吃面拖蟹”。
姑：噢，个侬话？？？末好拉来。
久：（进入当时情境，第一人称）我说：侬等一等噢，我到里厢去喊。我听见明朝有生活，有得饭吃，快活得来弗得了。“呯铃嘭冷” 奔进去，门槛浪一绊，“白辣”一跤，我也弗必落起来哉，一个虎跳豁进去，豁到伲师傅床门前喊哉，我说：（进入当时情境，第一人称）师傅啊，师傅落落落落......
姑：做啥呀？
久：（进入当时情境，第一人称）噢哟，我说：张家来叫伲做生活去。毫燥，我奈有饭吃哉。我想搿句闲话讲上去末，大概伲师傅马上落起来，跟我就走。
姑：毫燥去呀，毫燥个末。
久：非但弗落起来，眼开眼闭，眼睛对我白招招，侬晓得回头我句啥闲话啊？
姑：哪能话法？
久：（进入当时时情境，模仿师父的面风、声音、语调）没空！
姑：躺辣床浪喊没空啊？
久：哎呀，我想穷来嗒嗒滴个，吃光当光，哪恁还没空呢？
姑：搭啥个架子呢个末？
久：迪个有讲究。
姑：哪恁？
久：市面浪两桩生意相反个。
姑：啊里两桩生意？
久：裁缝师傅当场跟侬跑算坍面个。
姑：噢？
久：板要挨脱个两日。
姑：噢。
久：剃头店里就两样。
姑：哪恁？
久：假使侬年三十夜进去剃头，六只位子坐仔廿四个人，十八个朋友等辣，侬问伊有空伐，（进入当时时情境，模仿剃头师傅的面风、声音、语调）呃……马上就好，马上就好。
姑：噢，伊板要剃个噢。
久：一张报末一看，一杯茶末一吃，个末侬迪个等一歇也足道个咾。
姑：对个，对个。
久：个末我说：（进入当时情境，第一人称）师父弗做弗来事个噢，米瓫里米一粒没拉道，迪个“稀汤饱”要烧弗出什噢。
姑：对个。
久：（进入当时情境，第一人称）伲师母娘转来要发脾气噢。
姑：对个。
久：个末伲师傅说：（进入当时情境，模仿师父的面风、声音、语调）搿能吧，侬去回头伊明朝点来吧。个咾我跑出去，我说：（进入当时情境，第一人称）妈妈，今朝末伲师父还有眼生活没做完，说明朝点末准定来。个妈妈说：（进入当时情境，模仿张家老妈妈的面风、声音、语调）好个。
姑：个呒没生活末啥体回生活拉？
久：迪个着面子呀。
姑：噢，侬也相帮着面子。
久：哎，个末伊说：（进入当时情境，模仿张家老妈妈的面风、声音、语调）亻那 明朝来末，伲早饭烧好辣。伲师母娘转来，我告伊说：“伲明朝张家去做生活。师母娘心里交关开心，拿两件？？？个长衫当夜一汏。
姑：个是火油酱好做马褂来。
久：哪能火油酱做马褂？
姑：个侬自家话？？？好做长衫嘛。
久：弗对个，竹布长衫高领头，汏来煞清，烫来邦硬，浆来笔挺，着辣身浪厢是，煞清个呀。
姑：噢，蛮赞个。
久：早浪头六点钟揩揩面，师徒两家头跑出去哉，针线包末袖子管里“搭辣”一捅。走辣路浪有眼苗头个呀。老古说：木匠师傅出门像个搬场。
姑：裁缝师傅呢？
久：裁缝师傅出门（叫）像个先生。走辣路浪碰着仔：（进入当时情境，模仿裁缝与人对话的面风、声音、语调）张师傅啥地方？陆家。跑进去，跑到张家门口头，东家娘娘已经辣等哉：（进入当时情境，模仿张家娘娘与裁缝对话的面风、声音、语调）噢哟，顾师傅啊，早，早，早，早，早...... 师徒两家头到客堂里坐下来，针线包台子浪一摆，一只桌台板一搁末，半个把钟头下来，关照什。
姑：哪恁啊？
久：（进入当时情境，模仿张家娘娘的面风、声音、语调）噢哟，小师傅啊，奈亻那 慢慢较开场噢，吃早饭。噢哟，我想奈末弄顿早饭来搭搭，因为屋里厢一年到头吃粥呀。
姑：荒仔长远什。
久：台子浪摆辣四只小菜。
姑：嗯，啥小菜啊？
久：一只是肉松、皮蛋、玫瑰乳腐、（个）油炸桧。
姑：噢哟，个是崭货。
久：搿种小菜是，覅算（迪个）吃哉，看也我长远弗看哉。
姑：啊呀，侬也话得忒个极什。
久：一只饭桶里是？？？？一饭桶个粥。迪个粥搭伲屋里个粥两样什。
姑：哪恁？
久：迪个侪是薄稻米，摆两个红枣子辣哩，喷香，甜津津。
姑：噢哟，崭货。崭货，崭货。
久：师徒两家头坐下来吃粥。奈末迪个弗是侬面浪摆架子，吃粥总归让还伲裁缝师傅。
姑：哪恁啦？
久：六月里厢一百零四度，热来刮辣辣个天啊，连吃三大碗粥，额骨头浪也弗出汗辣。
姑：噢哟，迪个倒本事，走路也出汗，搿恁吃弗出汗啊？
久：哎，迪个伲练就一功呀，师徒两家头坐下来，嚯啰啰，嚯啰啰一吃，眼睛一煞，伲师傅吃一只幺六。
姑：啥叫幺六呀？
久：吃七碗。
姑：噢哟。
久：我倒也弗推扳口虐。
姑：侬吃几碗啊？
久：吃仔仨五碗。
姑：嗯，弗容易。
久：我想多吃仔，拨伲师傅要吃排头。
姑：对个。
久：吃好仔粥下来末头一日就开开场。伲师傅末料作拿来量量，样子拿来看看，我末拿迪个熨斗末生个生，线末合个合。
姑：对个。
久：搞七捻三一来（话咾）十二点钟一敲仔，个味道是个灶间里厢一篷一篷辣勒氽出来。
姑：啥个味道呀？
久：小菜味道呀。
姑：噢。
久：啊呀，氽得我来要打喷嚏。
姑：噢。
久：叫啥（话咾）迪个妈妈关照哉:（进入当时情境，模仿老娘姨面风、声音、语调）阿弟啊，奈亻那 弗做哉，吃饭哉。
姑：噢哟，一上半年弗曾做啥已经好吃饭（柴）？
久：头一日是开开场呀！
姑：噢，对个对个。
久：台子浪一看摆四只小菜。
姑：啥个小菜呀？
久：红烧肉烧东笋、一只是开洋炒蛋，一只是鲫鱼嵌肉，一只是塔（脱）苦菜里加回伊香蕈。
姑：噢哟。赞个，啊，灵个，嗯，啊呀，崭货，崭货。
久：一只金漆饭桶里厢一子饭，通通盛辣只饭桶里。
姑：噢。
久：奈末师徒两家头坐下去，我说：（进入当时情境，第一人称）师傅啊，吃饭什噢。伊说:（进入当时情境，模仿师傅面风、声音、语调）侬饭盛好。我话：（进入当时情境，第一人称）有数。两家头饭盛好，头一囗饭朝嘴巴里一挝末，我眼睛已经辣看哉。
姑：看啥呀？
久：看着一块肉是六花。
姑：人家只有五花！
久：三精两油一肥末六花呀。
姑：噢。
久：我想奈末弄块肉来搭搭哉。
姑：长远弗吃哉。
久：一只筷戳下去，刚刚要接勒口虐……
姑：哪能啊？
久：伲师傅对仔我（话咾）：（进入当时情境，模仿师傅面风、声音、语调）嗯哼！（发若吴方言“鱼” 音）
姑：做啥？
久：噢，我想迪个学生子有规矩，头一块肉要让师傅吃。
姑：对个。
久：叫关照我吃鱼，个末我想就吃鱼吧。
姑：就鱼什哇个末。
久：肉弗接马上接鱼呢，有点讲弗出，呒没规矩伐。
姑：个末哪能啊？
久：再挝一口饭咾，第二口白饭嘴巴里一挝，奈末想去接块鱼，刚刚想接，伲师傅只饭碗戳过来（话咾）：（进入当时情境，模仿师傅面风、声音、语调）添饭！
姑：噢，要叫侬添饭哉。
久：噢哟，我想到吃来快个。
姑：学生意末是要搿能。
久：搭伊饭添好末自家饭也一添，奈末再弄口饭一搭，奈末想去弄鱼来搭搭哉。
姑：吃肚膛，崭货！
久：哎，肚膛没骨头个呀。筷戳下去刚刚想接，伲师傅（话咾）：（进入当时情境，模仿师傅面风、声音、语调）哎！
姑：喊我吃蛋（话咾）。
姑：噢，吃蛋啊？鱼咾肉没吃吃蛋啊。
久：个末我想就吃蛋伐。
姑：噢，吃蛋吃蛋，就介。
久：再吃一仔一口饭，想去吃块蛋末，伲师傅（话咾）：（进入当时情境，模仿师傅面风、声音、语调）添饭。
姑：快来，啥个！
久：噢哟，快头势末是邪个！
姑：嗯。
久：迪个喉咙像个呒底个竹管，眼睛像个霍限，牙齿像个夹剪，筷头像个雨点。
姑：噢哟哟。
久：哎呀，搿能样子一来啊，我想弗对什。自家一碗饭添好末，想去弄块蛋来吃吃。
姑：哎，吃口虐。
久：刚刚想接下去，伲师傅（话咾）：（进入当时情境，模仿师傅面风、声音、语调）哎！
姑：做啥？
久：喊我吃菜。
姑：叫侬吃菜啊？
久：哎呀，我想哪能蛋咾肉咾鱼一样弗好吃介？
姑：啊呀。搿是倒齁水个口虐！
久：刚刚辣迪个辰光，一个东家娘娘跑过来：（进入当时情境，模仿张家娘娘的面风、声音、语调）哎，阿弟，侬覅客气，吃呀，迪个一桌是日里厢哦，吃脱夜里另外还有一桌。侬笃定吃好了。
姑：胆大吃口虐。
久：奈我想吃哉。伲师傅关照（话咾）：（进入当时情境，模仿师傅面风、声音、语调）东家娘娘侬覅客气，伲迪个阿弟啊，年纪末轻个，小囡吃素个。
姑：个吃素，荤个是弗好吃个口虐。
久：啥人吃啥断命素啦？
姑：个亻那 师傅辣搭侬回头（呀伐）。
久：哎呀, 奈拨伊回头得弄僵脱哉。轧实我弗吃素呀，搿能样子奈末吃素只好吃青菜了。
姑：奈侬荤弗好碰哉。
久：弗好碰我想明朝再讲吧。
姑：嗯。
久：一眼青菜倒也呒啥，油水足弗过，（重复两遍同一象声词）侬一碗我一碗，横一碗竖一碗，添一碗来一碗，一饭桶饭吃得来放光滴滑。
姑：亻那jia个。
久：侬晓得伲师傅吃饱啊吗？
姑：吃饱吗？
久：伲师傅还没吃饱。
姑：搿能穷凶？？
久：个师徒两家头吃掉仔一饭桶饭，再叫别人家添饭是总究有点讲弗出哉。
姑：个当然话弗出咾。
久：伲师傅老鬼呀。
姑：哪能啊？
久：添饭讲弗出，伊有门槛个。拿根尺摆辣饭桶边浪敲两记。（敲出声）
姑：做啥？
久：（进入当时情境，模仿师傅面风、声音、语调）东家娘娘，只饭桶倒？？来，买去来阿要六只洋？
姑：个东家哪能回头伊啊？
久：迪个门槛呀，叫侬看看看，饭桶里饭没什噢。侬里厢有末稍许再添两碗出来，用得着个。
姑：噢，叫伊添饭话弗出咾，掰能样子。
久：哎，个东家娘娘也是老门槛。
姑：哪能啊？
久：要死快哉，师徒两家头吃脱仔一饭桶饭，还要喊我添饭啊？
姑：哪能话得出呢？
久：也回头侬呒没倒讲弗出。回头侬饭吃光侬要动气伐？
姑：对个。
久：东家娘娘跑到灶间里拿只？？个饭掮出来。
姑：做啥？
久：拿把菜刀，摆辣饭口浪，也敲个两记。（敲出声）
姑：哪能啊？
久：（进入当时情境，模仿张家娘娘的面风、声音、语调）顾师傅啊，只饭桶末搭只子一道买个，四月初八静安寺买个，十六块八角洋钿。侬看看看，饭糍也铲光拉什。
姑：要死快哉，哪能两家头搿能样子啊！
久：讲老鬼对老鬼，呒啥闲话讲。
姑：嗯。
久：师徒两家头吃好，我是心里厢总归齁水个。
姑：哪能啦？
久：个屋里厢末一年到头吃粥，今朝末肉咾蛋咾鱼咾一样挨弗着。
姑：吃素喊侬。
久：个哪能办法呢？
姑：对个。
久：伲师傅是吃好仔饭有规矩。
姑：哪能，裁逢师傅啊？
久：拿柴芯来剔剔牙齿，场角浪兜脱个圈子。
姑：噢，浪饭哉。
久：晾饭哉。学生仔弗好浪饭。
姑：个末侬也去兜脱个圈子。
久：迪个弗可以个。
姑：学生意个弗可以个。
久：我想蹲辣里厢动动脑筋看。
姑：啥脑筋啊？
久：今朝吃弗着鱼咾肉咾蛋，迪个师傅算啥名堂呢？老古说：光棍弗短财路。
姑：对个。
久：个咾我搭你师母娘讲过个，我说我外头去末好交吃一眼，伲师母娘说：（进入当时情境，模仿师母的面风、声音、语调）侬好吃个。今朝想弗到，师傅弗拨我吃。
姑：个倒齁水个呀。
久：奈我想着哉。
姑：哪能？
久：我去寻着东家娘娘。
姑：哪能话法？
久：我说：（进入当时情境，第一人称）东家娘娘，迪个料作价钿大伐？说（进入当时情境，模仿张家娘娘的面风、声音、语调）：阿弟啊，起码侪要一块几角洋钿一尺。铁机缎咾夏丝葛侪要三块多辣。
姑：侪绸缎。
久：个末我说：（进入当时情境，第一人称）迪种恁个料作，侬为啥张三李四裁缝弗喊咾，要叫伲师傅来做？
姑：嗯。
久：（进入当时情境，模仿张家娘娘的面风、声音、语调）说：阿弟啊，侬弗晓得，亻那讨师傅顾师傅，地方厢有名气。我说：（进入当时情境，第一人称）闲话弗错，伲师傅做出来末事崭个，我说近来伊心境弗好，新近发生一种叫“神经病”。
姑：噢，神经病啊？
久：（进入当时情境，第一人称）哎呀，我说：迪个神经病发起来是，眼乌珠红沛沛，弗认得人个。料作摆辣脚边浪扯坏脱个！
姑：噢哟，该死哉。
久：（进入当时情境，第一人称）扯起来我弗管个！搿能一讲，迪个东家娘娘急哉。个末伊说：（进入当时情境，模仿张家娘娘的面风、声音、语调）阿有啥办法啊？我说：（进入当时情境，第一人称）有办法个。辣发个辰光，侬手条子要辣，请伲师傅吃个两机耳光末，一打就清爽。个末伊说：（进入当时情境，模仿张家娘娘的面风、声音、语调）啥辰光发呢？我说：（进入当时情境，第一人称）两只手辣桌台板浪碰仔末，要发哉。个伊话晓得哉。个咾关照个娘姨妈妈说：（进入当时情境，模仿张家娘娘的面风、声音、语调）侬看勒辣，等顾师傅碰桌台板末，侬来关照我。个咾我搿能样子讲好末，等些师傅碰起桌台板来末哪能办法呢？
姑：哎！
久：拿把剪刀摆辣摊头里一塞，面浪拿能布条巾一囥，等一歇尼师傅吃好仔饭晾饭，晾好仔饭进来什呀。进来末，粉线袋嗒辣嗒辣一弹末要剪哉。
姑：噢，尺寸量好仔裁什要。
久：搿末侬问一声也覅紧咾，叫啥裁缝师傅寻剪刀弗行规矩问。
姑：个末话：徒弟啊，勒辣啊里？拿过来，剪刀。
久：迪恁一问末变仔外行什。
姑：噢，內行弗问个。
久：只要只手桌台板浪一碰末算数。
姑：对个，碰到啥地方，“嗟咯” 响仔末勒辣哉。
久：哎，奈末伊摆浪一碰末，弗对哉。
姑：哪能啊？
久：今朝桌台板浪弗好碰，个娘姨望好辣呀！两只手桌台板浪一碰末，个娘姨甄急啊，哇啦哇啦喊起来哉：（进入当时情境，以常熟方言模仿常熟娘姨的面风、声音、语调）东家娘娘弗好哉，顾师傅碰桌台板哉！东家娘娘跑出来，顾师傅碰桌台板是要发神经病哉。拿伲师傅领头里一把撬牢，两记耳光，打得来耳朵边头“嗡隆嗡隆”， 眼晴门前侪是金苍蝇，牙齿脚里有眼血隐隐。
姑：要死快哉，奈哪能个啦？
久：（进入当时情境，模仿师傅面风、声音、语调）啥个道理侬打我啊？说：（进入当时情境，模仿张家娘娘的面风、声音、语调）顾师傅，我打侬是要侬毛病好呀。搿能一打，侬阿是比较清爽？因为弗打，侬要发神经病，扯破仔料作大家难为情伐？
姑：对个，要伊赔末赔弗起。
久：个末伲师傅弄得来山东人吃麦冬——一懂弗懂什。（进入当时情境，模仿师傅面风、声音、语调）啥人说发神经病呢？
姑：啥人话发神经病呢？
久：伊说：（进入当时情境，模仿张家娘娘的面风、声音、语调）迪个闲话末，亻那 学生仔讲个呀。（进入当时情境，模仿师傅面风、声音、语调）小鬼，我几时搭侬讲过师傅碰桌台板发神经病啊？格末我说：（进入当时情境，第一人称）师傅，我啥辰光出来关照侬，我今朝吃素啊？
姑：要死快哉，为眼吃咾！
久：搿能一来，伲师傅弄得来心里厢真正挖塞，东家娘娘交关难为情。
姑：舌浪冤家海恁深，侬搭伊。
久：师徒两家头，为迪眼事体，弄两几耳光吃吃。
姑：侬“夹嘴舌”“ 夹” 来样子也弗像末。
久：奈末师徒两，管伊拉，打末打过，争过嚣过，话过算数。
姑：嗯。
久：搿能一来大家做哉。弗晓得伲师傅心思弗好。
姑：哪能啊？
久：心向恘弗过，头一日来上工，叫啥要想拿双鞋面布转去。
姑：噢，想“捋布” 伐？
久：哎，个末侬少弄眼呢？（话咾）拣好来稀个料作，一弄弄仔二三尺。拿四只别针，去别辣迪个桌台板下头。
姑：噢，弗是囥辣身边啊？
久：囥辣身着出覅看见啊。
姑：噢，对个。
久：等一歇吃好夜，袖子管里一捅末，好拿转出。
姑：噢，迪个门槛。
久：门槛呀。
姑：嗯。
久：搿能一样来是，东家勒辣镇浪厢转来哉。哎呀，鸡咾、鸭咾、蛋咾、肉咾买足舒形（末是拉什）。因为伊拉做解橱衣，裁缝师要待得特别周到。
姑：对个，对个。
久：跑进来，叫啥对我上身下身辣望呀。我想：啥个路道啊？说：（进入当时情境，模仿张家主雇的面风、声音、语调）阿弟啊。我说：（进入当时情境，第一人称）伯伯。伊说：（进入当时情境，模仿张家主雇的面风、声音、语调）今朝外头落仔三尺。哎呀，我想“三尺” 末伲师傅捋三尺。我想哪能伊会得晓得啊？
姑：哪能伊晓得呢？
久：我想慢慢交，覅（重复两遍同一象声词）要紧讲出来，覅讲眼事体出来。我想再熬一熬咾。弗晓得第二句闲话叫亦来哉。（进入当时情境，模仿张家主雇的面风、声音、语调）阿弟啊，落仔三尺是看起来侬今朝来得去弗得哉口虐。哎呀，我没办法接哉，我想还是招出来伐。
姑：哪能哬？
久：我说：（进入当时情境，第一人称）伯伯，三尺末是三尺，迪个末事侪是伲师傅个，我弗关呀，我话：（进入当时情境，第一人称）侬弗相信末……我去拉出来拨伊看哉。勒辣桌台极下头去拉出来拨伊一看呀。轧实掰桩事体误会呀。
姑：哪能误会啊？
久：迪个东家城里厢买仔鸡咾、鸭咾、蛋咾、肉咾回转来。出去辰光天好，外头现在勒辣落雨哉。讲末要想讲三寸，讲来太多，讲仔三尺。朝我脚浪一看，着辣鞋子，弗着套鞋，叫来得去弗得。奈末我侬错哉，当仔三尺布哉，奈末来得去弗得末当仔今朝抓我起来哉。个咾我侪招出来哉。
姑：要命啊，迪个是侬做贼人心虚。
久：奈末搿能一讲末，迪个东家发脾气哉。
姑：哪能啊？
久：说：（进入当时情境，模仿张家主雇的面风、声音、语调）顾师傅，今朝我头一日请侬来，侬马上捋三尺料作。个是一个月做下来，迪眼料作侪拨侬搿转去也弗够咾。说：（进入当时情境，模仿张家主雇的面风、声音、语调）迪个大家算啥名堂呢？伲师傅弄得来窘来，呒没办法，也呒没迪只面孔吃啥夜饭哉。
姑：哎呀。
久：个咾鱼咾、肉咾、鸡咾索介弗吃哉。索介拿个针线包一包，大家师徒两家头，闷声不响转去诶！
姑：夜饭也没吃。
久：夜饭没吃，跑到屋里厢淋末淋得来像个落汤鸡末是拉什。
姑：唉呀呀！
久：跑到屋厢，伲师母娘倒蛮高兴：（进入当时情境，模仿师母面风、声音、语调）男个，侬转哉。（进入当时情境，模仿师傅面风、声音、语调）转来哉。（进入当时情境，模仿师母面风、声音、语调）哪能啦？（进入当时情境，模仿师傅面风、声音、语调）唉呀，覅去话起……拿迪番事体告诉伲师母娘，伲师母娘跳得来八丈高末是拉什，
姑：噢！
久：伲师母娘客气来，跑到我房间里。
姑：做啥？
久：我想做啥？叫啥伲师母娘搭我勒辣推被头。
姑：做啥客气来稀，搭侬摊被头？
久：哎呀，我想往日我搭伲师母娘摊被头，今朝哪能师母娘搭我摊起被头来？摊头仔被头弗算数，外头弄根绳来一扎。（话咾）拿我被头铺盖朝外头“别冷荡” （象声词）朝外头掼仔出去哉。
姑：做啥？
久：叫啥（话咾）弗我做什呀。
姑：噢，算侬满师。
久：（进入当时情境，模仿师母面风、声音、语调）哎呀，侬迪个小鬼啊，今朝难班去弄出搿能一场笑话来，阿要坍台伐？
姑：对个。
久：奈末我搿仔被头铺盖跑到屋里厢，心里厢想想难过。要咾去拜拉个师傅，弄得来搿能样子，算啥个名堂呢？
姑：对个。
久：搭三好婆一商量末，个末伊说：（进入当时情境，模仿三好婆面风、声音、语调）阿弟，侬到底有点会做做拉吗？
姑：侬有点学着吗？
久：奈我说：（进入当时情境，第一人称）做末稍许会得做做喏，粗布衣裳末会得绞绞，阿是啊。搿末伊说：（进入当时情境，模仿三好婆面风、声音、语调）什梗，我搭侬去借间房子，一面末做咾，一面末学习。
姑：嗯，也好。
久：（进入当时情境，模仿三好婆面风、声音、语调）噢，迪个，去摆只裁缝桌台板，赚两钿也好个。个我想，倒呒啥。不过我自家年纪轻，本事弗到把，向人家学习是应该个。
姑：对个。
久：迪块招牌要挂得硬一点。因为伲师傅心末狠呀，末事做出来崭，外头名誉有。
姑：对个。
久：一块牌子浪姓顾。
姑：侬又弗姓顾，侬姓李，哪能写顾呢？
久：弗是呀，我乢伲师傅个排头呀。
姑：噢，浓乢招牌吃饭。
久：哎，块牌子浪写来煞清，叫：裁缝师傅本姓顾，只做绫罗弗做布。派头大伐？
姑：噢……噢，布草还弗做来。
久：奈末隔壁头妈妈、婶婶、阿土咾、爷叔咾侪来哉。拿点双蓝布、毛蓝布咾、卡其布。（进入当时情境，模仿众人的语调）噢哟，迪个小浮尸倒扎足个嘛！啥派头大来，只做绫罗弗做布，老布弗做个，是伐？弗做伲覅喊伊做哉，到隔壁头去做。搿块牌子一挂哬，半个月叫没生意。
姑：奈侬僵什嘛！
久：哎呀，我想房钿伙仓要付伐？
姑：对个。
久：倒弄来僵脱什！我想块牌子再调。调末调转来写：裁缝师傅本姓顾，弗做绫罗只做布，落空还要修旧布，行行袜底末也来事个。搿能一挂啊，生意亦弗有呀。
姑：哪能啦？
久：个老布衣裳人家侪自家做末，绫罗衣裳一看侬做弗来末，弗叫侬做什。
姑：噢哟。
久：个我想牌子再调：裁缝师傅本姓顾，做做绫罗做做布，落空还要修旧布。侪做个。
姑：旧布也只好做，太迁就什。
久：搿能一来，生意倒来什。
姑：是伐？
久：价钿末便宜点，做生意末迁就点，门市浪生意蛮好。个咾所以近来我生活好转哉。
姑：是伐？
久：今朝我特特谓谓来望侬，告诉侬搿能一个消息，我有仔正当职业末，侬心里厢高兴伐？
姑：我弗太相信侬个闲话。
久：哪能我个闲话弗太相信？
姑：侬既然搿能样子，我倒来问问侬看喏。
久：噢。
姑：像伲爷恁个身材，要做件长衫，长短喏有个几花，伲爷恁个，侬约得出末侬有本事哉。
久：噢，侬要试试我看。生怕我瞎话三千。
姑：？？
久：亻那 爷恁个身材末，话矮末弗矮，壮末弗壮，长末弗长，短末弗短。侬谈谈看末什，我可以还侬报门。
姑：搿末长短做个几花，伲爷恁个？
久：亻那 爷长短做三尺九寸半。
姑：倒错弗多。
姑：个末腰身泥？
久：膘身七寸四。
姑：下摆呢？
久：下摆一尺一寸六。
姑：出手呢？
久：出手二尺三寸半。
姑：袖口呢？
久：袖口七寸四。
姑：领圈呢？
久：领圈一尺一寸六。
姑：领头高边呢？
久：一寸八。
姑：错弗多哉。
久：错弗多啊是。
姑：错弗多，错弗多，侬迪个闲话是讲来蛮对个，迪个回报门还来像个，作兴是会做做。喏，今朝搭侬老老实实讲仔伐，不然末，侬呒没正当职业末，侬叫我嫁拨侬，伲爷绝对弗肯，伲迪个婚姻伊交关拒绝。侬既然有个好好交职业呢，个伲爷作兴肯个。
久：肯个。
姑：肯个末侬去央个媒人来。
久：搿能好伐？
姑：哪能啊？
久：央媒人管央媒人，谈起来管谈起来。我今朝来有目的个呀。
姑：哪能个目的啊？
久：因为屋里厢生活多得来弗及，侬相帮我做脱点好伐？撬撬粒头咾，上脱两双袜底好伐？
姑：弗对个，迪些恁介就跟侬去末迪个算啥呢？
久：迪个弗好去个。
姑：弗好去个，侬先要央个媒人，让伲爷答应，大家结仔婚，搿末小夫妻一对，大家侬烧火，我拿柴。
久：大家巴巴结结长人家。
姑：乡下小夫妻。
久：一步弗失离。
姑：伲淘米担水也一道去。
久：个末一句闲话噢，弗要赖噢。
姑：噢，晓得。
说明：《剪刀口》是沪剧早期从滩簧向申曲过渡时期产生的作品。全剧皆为说白，表现手法与独脚戏中的单卖口相类似。可一人表演，也可两人表演。一人为上手，是表演的重心，一人为下手，负责衬托。其中，上手要以不同的声音造型、方言、面风扮演故事中的各种人物，且要求人物与人物之间的切换、过渡要自然而不露痕迹。下手则要紧跟上手的表演节奏，在关键处起到铺垫情节、推进情节的作用。这出戏对演员的白功要求极高，是练习说白与人物塑造的好教材。
剧中有大量的民间俗谚，这些俗谚，真正反映了早期滩簧传统剧目富于生活情趣的鲜明特色。在整理该剧的过程中，对这些俗谚（包括所有说白）的方言文字化写法进行了较细致的考证，对于某些口语中的语气词，则用加“（）”予以标明。虽在记写过程中力求正确，但尚有几处模糊难解，在文中均以“？”注明，在此恳请方家赐教，不甚感激。
另，《上海沪剧志》中对于该剧的情节介绍似有讹误，现根据录音内容，重撰剧情介绍于下。
李阿久（音）与姑娘是一对恋人。一日两人相会，姑娘问及李阿久的近况。阿久叙述了自己在邻居三好婆的帮助下，拜师学裁缝手艺。在拜师学艺的过程中遭到师傅欺压，又无意间说破了师傅偷工减料的事实而被师傅扫地出门，自立门户谋生的经过。姑娘听后，通过向李阿久询问她父亲的衣服尺寸，面试了李阿久的裁缝手艺，并商议与李阿久成婚。 |
提升卡
置顶卡
沉默卡
喧嚣卡
变色卡
抢沙发
显身卡
