沪剧传统对子戏 捉牙虫

根据1920年代唱片、1982年实况录音整理（对部分白口、唱词有删节）
孙是娥、杨美梅饰捉牙虫娘子
刘子云、沈天洪饰朱阿狗
牙唱：哼嗯——亻那各公弗要闹重重，听娘娘两声捉牙虫哼。娘娘出身勒辣松江，我个行业是调调水碗，关关亡人，衔牌算命咾捉捉牙虫哼。叫六月里炉边铁匠，十二月里江上渔翁，是行业乐在其中。前两日天气弗好，今朝倒万里无云，到外头走动走动，倒有几分财气收勒浪哎——，
（此处用1920年孙是娥、刘子云唱片）朱：慢咾去哎！
牙、朱（走链条箍台步）唱：【久闻调】：清清之早晨末面朝东，喂呀喂喂哟，眼泪汪汪落在胸。别人家相思末，弗想也到手，喂呀喂喂哟，吾的相思一场空。隔山也隔东，蓝桥路弗通，喂呀喂喂哟，薛仁贵小将去征东。清清之早晨末面朝南，眼泪汪汪哭出来。别人家个相思末，勿想也到手，喂呀喂喂哟，吾的相思侪枉为。隔山也隔南，蓝桥路弗断，喂呀喂喂哟，狄青小将去到南。清清之早晨面朝西，喂呀喂喂哟，眼泪汪汪哭出去。别人家个相思末，勿想也到手，喂呀喂喂哟，吾的相思侪忘记。隔山也隔西，蓝桥路弗断，喂呀喂喂哟，樊梨花女将去到西。清清之早晨面朝北，喂呀喂喂哟，眼泪汪汪自家哭。别人家个相思末，勿想也到手，喂呀喂喂哟，吾的相思侪忘掉。隔山又隔北，蓝桥路弗曲，喂呀喂喂哟，罗通小将去扫北。
（牙、朱相撞。）
朱：耶，哪哼？！，哪哼？！
牙：走路鸭蛋养出来……
朱：哎——我出来有人碰，真正放唔笃……（看见捉牙虫娘子）哈哈……捉牙虫娘子！伊拉有行话，打切口，搭搭讪头。（示意捉牙虫娘子）哼嗯——
牙：哼嗯——
朱：（窃喜地）来什，来什。
（删去了不雅对白）
朱：侬出身辣哈里？
牙：噢，娘娘出身勒辣松江。
朱：刚刚侬碰我，我呒没拿侬撞伤！
牙：松江！
朱：噢，松江，松江！松江勒辣哈里？
牙：娘娘勒松江西，西野桥头，白龙抬头，王妈妈辣闸角对过，大眼乌珠牵水磨是阿奴（意为我）个阿哥。
朱：弗错！侬个阿哥，我个阿舅！
牙：（嗯那，音，意为我）个阿哥！
朱：阿舅！
牙：（删去了不雅字眼）（嗯那）要吃亏（音qu，第一声。）哩伐。
朱：侬吃亏末我便宜什呀！哈哈……侬公公婆婆姑娘男人有伐？
牙：通通有个。
朱：亻那公公勒辣接啥？
牙：要末辣做啥！
朱：哎，勒辣做啥？
牙：（嗯那）公阿爹鸡毛肉骨头换草纸。
朱：噢哟，鸡毛可以换枣子，鹅毛鸭毛可以换糖炒栗子。
牙：弗换个！
朱：弗换拉倒！嘿嘿……亻那婆阿妈勒辣做啥？
牙：伲婆阿妈勒辣劈篾丝扎鸡笼。
朱：哎，我有一只鸽棚换伐？
牙：要扎个！
朱：弗换啊？姑娘勒辣做啥？
牙：小姑娘勒辣扎珠花咾点翠。
朱：作孽，杀脱仔头勒辣抵罪。
牙：扎珠花咾点翠！
朱：大生意。亻那个男人勒辣做啥？
牙：（嗯那）当家人肩挑一副掼担“那休那休”（ 音）噢，走到人家门口，喊一声补镬子咾钉碗。
朱：巧个，特伊“铜顿功”（ 音）。
牙：要末同行中。
朱：同行中。
牙：（嗯那）弗相信。
朱：弗相信做拨侬看喏。
牙：做起来。
朱：（模仿钉碗人）嘿嘿，肩挑一副掼担，叫“那休咾那休”， 街浪跑跑，村庄浪兜兜，一到门口：噢哦——钉碗——（作卸担状）迪个叫霸王卸甲。
（删去了不雅对白）
朱：嘿嘿，停好仔，奈末地浪一坐，拿出一只大碗，拿出一个把缰绳。（口中出声，以手模仿钉碗过程。）
牙：把紧绳。
朱：把紧绳扎好。拿出一个弓扯。
牙：扯弓。
朱：我去扯伊呀。哎，拿出一个新糠钻。（音）
牙：金刚钻。
朱：绕一绕，馋吐弗是药，处处用得着，碗浪拓一拓（口中出声，以手模仿钉碗过程。），拿出一个搭碗。
牙：碗搭。
朱：一样个。夯榔头。
牙：小榔头。
朱：（口中出声，以手模仿钉碗过程。）石粉一拓，铜钿一纳。像伐？
牙：噢哟，真像来。
朱：弗见得个。
牙：像来。
朱：弗大像个。
牙：像来。
朱：呵，家主婆（打嘟噜子。）
牙：杀千刀，啥家主婆啊？
朱：侬讲像个呀。
牙：像弗是人像，生意像唉！
朱：噢，生意。侬勒辣做啥？
牙：噢，侬要问起娘娘噢，勒辣调调水碗关关亡人噢，衔牌算命咾捉捉牙虫。
朱：四个行当我侪欢喜个，跟我转去。
牙：侬侪要啊？（站过一旁，心中暗想。）噢哟，今朝生意倒招着辣哩。搿末侬屋里勒辣阿里噢？
朱：近个。直角走要八十里，作拐走不过头贰（读作尼）里。
牙：哪能走头个呀？
朱：因为直角走个桥坍脱，阵头浪出棺材远兜远转呀！
牙：噢，搿末侬前头。
朱：搿末行行咾趋趋。
牙：叫趋趋咾行行哦。
朱：三个转弯。
牙：四个兜身。
朱：一到我个门庭。
朱、牙：到了。
牙：噢哟，阴气重来。哎呀，一到门庭冷清清，莫非孤单男囡独头人。我要请问侬黄皓（音，意为妻子。）
朱：客气点噢，问我一声。
牙：黄皓。
朱：两声。
牙：黄皓。
朱：侬只黄猫，侬只黄猫，侬只黄猫。
牙：啥人搭侬相骂啊？
朱：侬弗相骂咾骂我黄猫伐？
牙：弗是，黄皓末问侬家主婆啊。
朱：（站过一边心中暗想）家……家主婆呒没个。嘿，啊是我个家主婆啊？（作哭状）我想想苦咾想想苦啊，家主婆末六月里末吃西瓜咾躺煞辣哉！
牙：吃西瓜哪能烫得煞呀？！
朱：隔壁头个三好婆，吃仔西瓜皮掼辣我门口头，家主婆出去汏衣裳，嘚儿……（打嘟噜子）躺煞个。
牙：滑煞个。
朱：滑煞个，滑煞个。拿出钥匙开出三簧锁。
牙：搿末由我娘娘莲花步。
朱：请侬摆脱一个小包裹。
牙：叫老扣弗脱手。
朱；脱手？
牙：弗老扣。
朱：倒是老鬼，嘿嘿。
牙：我问侬先做啥个？
朱：调水碗。
牙：先调水碗，侬去拿一张凳子啊。
朱：凳子啊。
牙：哎。
朱：噢，晓得哉。拿只末凳子。
牙：摆勒辣中央无基土。
朱：喊个看风水先生来。
牙：摆辣当中。
朱：当中末当中，中央！
牙：还有拿一只大碗，拿只冷筷。
朱：长衫呒个，只有短衫。
牙：冷筷，侬饭吃过伐拉？
朱：筷末筷，晓得辣哉。
牙：笨来。
（朱拿出上述物品。）
朱：喏。
牙：还要问侬要半碗阳水咾半碗阴水。
朱：哪能？
朱：阳水便当，阴水路远来弗去个！
牙：湖水咾井水。
朱：噢哟，还打断命切口，湖水外加井水。
牙：还要七粒梗米咾七粒糯米噢。
朱：哼哼，我是上饭店个。只好到伲爷个死人鼻头管里去挖出来。
牙：还要灯芯。
朱：拆脱牛车棚。
牙：灯草。
朱：灯草末灯草，还要断命灯芯。油盏头里末拿来。
牙：我问侬先调啥个？
朱：阴阳两宅。
牙：侬先要调阴阳两宅，叫左调左转，右调右转。亻那 阴宅浪风水弗大好，高个场花忒高点，低个场花忒低点，侬高个场花耪脱点，低个场花垫起点。
朱：哼，我末弗耪脱咾弗垫起。
牙：假使弗耪脱咾弗垫起，养出伲子要做贼去。（原句有不雅字词，有改动。）
朱：弗要，弗要，弗要，调阳宅。（原句有不雅字词，有改动。）
牙：调阳宅是伐？
朱：哎。
牙：左调左转，右调右转，阳宅浪风水也弗大好，东边歪，西边扯。弗发财倒也罢，发起财要发着别人家。
朱：发别人家关我啥体啊？要发我个呀！我呒没个弗要，调亡人。
牙：调亡人是伐？
朱：亡人。
牙：（嗯那）去拍拍伊马屁辣哩。搿末左调左转，右调右转，啊呀，水碗里厢亡人辣来哉。
朱：亡人辣来哉。（四处张望。）
牙：勒辣碗里呀。
朱：勒辣碗里？亡人辣来哉。呒没呀，我弗曾看见呀！
牙：侬看见还值铜钿啊哩？
朱：侬也是两只眼睛，我也是两只眼睛，侬哪能看得出，我哪能看弗出呢？
牙：（嗯那）双仙人，侬单仙人。
朱；双……（笑）噢……
牙：搿末左调左转，右调右转。水碗里厢亡人辣来哉，来仔一个男亡人，头戴乌纱帽，身穿大红袍，腰里玉带束一条，脚浪靴子薄薄交，五绺长须飘咾飘，年纪五六十岁毛毛交，迪个男亡人是亻那啥人啊？
朱：呒没个！伲三代做“梭老模子”， 做贼个！呒没迪种人个！
牙：啊？侬是个贼偷啊？灶家老爷。
朱：呃……弗，搿能讲末什，灶家老爷，当家堂，卖土地我侪弄光辣个，呒没个。出送，侬弗要来骗我。
牙：马屁也拍弗上哉。掰末再调亡人是伐？
朱：哎，亡人呀！
牙：搿末左调左转，右调右转，水碗里厢亡人辣来哉，头戴红威帽，长翦衣，短外套，脚浪厢相鞋薄薄交，三绺须咾飘咾飘，五十多岁毛毛交，迪个男亡人是亻那啥人啊？
朱：（作哭状）噢哟，伲个爷！
牙：哎！
朱：亲爷！
牙：（作哭状）伲子啊！
朱：好爷！
牙：乖囡啊！
朱：我烧脱侬块稻柴！我辣叫爷，侬辣——哎——
牙：搿末侬叫末，我也总要答应个呀！
朱：侬讨我便宜呀！
牙：噢，弗讨！
朱：哎，出送。
牙：弗要是伐？
朱：爷也要做个！
牙：搿末左调左转，右调右转，水碗里厢女亡人辣来哉，来仔一个女亡人，梳个一碟金，戴个一脖金，插个一丈青，蓝布衫，墨布裙，小脚鞋子角棱棱，年纪五十岁毛毛恁，啊呀，迪个女亡人是亻那啥人啊？
朱：（作哭状）是我个娘！
牙：（作哭状）噢哟，心肝啊！
朱：亲娘啊！
牙：乖囡啊！
朱：我个苦娘啊！
牙：伲子啊！
朱：卖脱侬只胡羊！爷咾娘一个子做。
牙：侪弗要啊？
朱：脱我调个新鲜亡人！
牙：调新鲜亡人亻那 几花日脚弗死人哩啊？
朱：三年弗死人，老虫弗死一只，蟑螂呒没掼脱过。
牙：三年弗死人，叫嗯那调新鲜亡人？好个，嗯那搭侬调末哉。
朱：嘿，也有啊？
牙：左调左转，右调右转，水碗里厢新鲜亡人辣来哉，一个新鲜男亡人，头戴灰毡帽，腰里作裙束一条，一只断命脚勒辣凳子浪厢跷咾跷，一只断命手勒辣下巴浪厢抄咾抄，一只手扇子笃笃摇，（捉牙娘子边唱，朱阿狗边照做。）黑脚板咾白脚爪，迪个男亡人，三十多岁毛毛交，头七弗曾过，贰七刚刚到，迪个男亡人是亻那啥个啊？
朱：（疑感地）咦？弗死也有人啊？啊？迪个男亡人末——（恍然大悟地）要死快，拿我活人调勒嗨作啥，啊？！侬寻死啊！触啥个霉头啊？！
牙：搿末侬三年弗死人末啊里来新鲜亡人？
朱：搿末侬回头呒没好来！
牙：侬要调呀伐？
朱：来来来来......脱我算命。
牙：侬要算命是伐？
朱：算命。
牙：噢，搿末依样做咾迪样做，侬要算命让我打开一只小包裹，叫叫里厢“阿灵” 搭侬（上并下足）（上并下足）。
朱：随便侬，（朱爬）（上并下足）（上并下足）。辣（上并下足）哉！
牙：阿灵，（看着朱）哎，做啥？
朱：侬喊我（上并下足）呀伐？我个小名叮阿灵，我个小名叮阿灵，我个小名叫阿灵侬哪能晓得啊？侬喊阿灵（上并下足）末我来（上并下足）呀！
牙：弗是个，嗯那衔牌算命只乌龟叫阿灵！
朱：噢呦，乌……（恍然大悟地）侬好个，乌龟叫阿灵，我也叫阿灵，搿末我变乌龟什咾！喊伊弗要（上并下足）什！
牙：侬（上并下足）是（上并下足）辣号牌浪。
朱：号牌浪。
牙：侬叫我算啥呀？
朱：算我个流年。
牙：算流年。
朱：我今年流年好伐？
牙：噢，侬今年个流年。嗯那已经看过拉来。
朱：噢。
牙：侬听好。
朱：噢。
牙：侬是正月里厢发多多（不清，待考），二月里弄僵过，三月里厢交白虎啊，叫白虎白虎当头坐，相打弗要劝，相骂弗要拖，侬要劝劝劝，拖拖拖，自家身浪个祸。
朱：弗去，搿末四月。
牙：四月里纯阳星助命噢，叫纯阳纯阳五木平行，哪怕侬做煞，别人讲侬辣大树底下乘凉。
朱：乌龟！呵呵，五月。
牙：五月，五月里厢乌龟星助命噢，乌龟乌龟，乌个头，十人看见九要愁，小鬼看过索索抖，阎罗王看见要搨舌头。
朱：呃……搿末六月里总好什。
牙：六月里啊？噢哟，六月里厢是六堂星助命噢。
朱：六堂赞个！
牙：叫六堂六堂，男为六堂家破人亡。
朱：女？
牙：女为六堂眼泪要哭脱八缸。哎呀，侬命里还有犯三堂！
朱：啥地方三堂？
牙：侬养出来个辰光要进育婴堂，中年辰光卖“三堂”， 老起来棺材呒没睏，要睏同仁破庵堂。
朱：侬要死快哉，七月！
牙：七月，七月里厢路基星助命噢，叫路路路咾基基基，三日拆侬，四日拆俚，床口要拔侬摸移。
朱：我睏勒地板浪个。八月。
牙：八月，八月里厢月得星助命噢。
朱：月得赞个！
牙：叫月得月得，侬吃也吃得，着也吃得，活也活得末死也死得。
朱：九月，灵个！
牙：九月，九月里厢天狗星助命噢。天狗天狗，假使侬跑出门口，碰着一只黑狗，拿侬“阿乌” 一口噢，咬到侬鼻头，初一来起要烂到廿九。
朱：阿有啥补救？
牙：要末买两只牛肉馒头斋斋迪只天狗。
朱：要末三记拳头。十月。
牙：十月，十月里厢是丧门噢，叫丧门丧门，弗丧别人便丧自身，侬要末关仔大门，死脱隔壁乡邻。
朱：弗关我啥事体，十一月。
牙：十一月，十一月里厢阑干星，阑干星助命哦。叫阑干阑干，女犯阑干拎篮讨饭。
朱：我好哉。
牙：男犯阑干，弗是充军，便是要坐长监。
朱：搿末十二月。
牙：十二月，哎呀，十二月里是晦气啊，晦气晦气真晦气，晦气星钻辣侬屁股里。
朱：去拆脱伊。
牙：越拆越进去！
朱：哎哟，奈末要死。搿末我一年到头十贰月，一眼也没好个嘛。
牙：有个。
朱：有伐？
牙：收梢好个。
朱：哪能？
牙：侬有三子收成啊。
朱：有三个子啊？我只要两子有来。
牙：三子拉。
朱：弗弗弗……
牙：侬听好，侬死脱仔啊，一顶破帘子，二个叫花子，扛侬到化人滩浪去扼脱仔。
朱：侬要死快，翘侬个辫子，侬命弗算好，命钿问啥人讨？弗要算了！
牙：搿末是搿个命呀介！
朱；脱我捉牙虫。
牙：捉牙虫啊，哎，好个。搿末侬牙齿哪能？阿里头痛呀？
朱：噢哟，痛是还好呀，喏。左面淅淅沥沥，右面沥沥淅淅，当中最痛！
牙：要死快哩，满口侪是牙虫，嗯那捉到夜里也捉弗好啦哩。奈要眼铜钿呒没办法。好，侬坐啦。
朱：噢，我有得坐啊？蛮好，捉牙虫哉。痛是还好噢。
牙：奈侬搭我张开嘴巴，阿里一面咾？
（朱阿狗张口，捉牙虫娘子捉牙虫。）
朱：啊……
牙：弗要动，噢，看见辣哉，侬弗要动噢，我来搭侬捉牙虫！
（乘机将朱阿狗牙齿撬去。）
朱：呸，呸，侬弗是脱我勒辣修牙齿，侬勒辣打桩子伐？
牙：搿末侬辣迪面，我想撬脱仔末弗痛哩呀！
朱：侬要死快什，撬脱仔我还好吃饭个来啊？关亡人，关亡人，侬个铜钿总归僵辣什啊，捉捉牙虫末捉来搿能痛！关亡人。
牙：搿末关亡人末香烛、元宝、台子。
朱：侪有个，香烛元宝末到隔壁土地堂里去拿，侬等辣。
牙：迪个是我吃准是小偷呀！
朱：（搬凳）凳子。
牙；香烛。
朱：（拿香烛）土地老爷土地公公嗨头去偷得来。
牙：奈末什奴（意为我）要通神祝告。要请啥人上亡？
朱：住勒辣松江府，华亭县，呒图呒保，杂七杂八……
牙：哪能有呒图呒保呀，到阿里去查啊？
朱：五图五保，杂七杂八，跨渡，我末姓朱叫阿狗，查末查我家主婆。
牙：查亻那娘娘是伐？
朱：哎！
牙：噢！
（捉牙虫娘子扑于台上，）
朱：咦？睏着辣？外头冷，风吹进来，要伤风个！来睏到里厢去！
牙：（删去了不雅词句）老爷上身！
朱：老爷上身睏觉啊？
牙：哎。
朱：迪个睏觉老爷。
牙：侬搭我少讲！
朱：噢。
牙：（打哈气）哦……（碰桌面，吓朱，使其坠于地）
朱：喂喂喂喂，喂！侬呯嘭呯嘭啥体啊？吓得我来一跳，掼下来地浪。
牙：（嗯那）老爷上身呀。
朱：老爷上身搿能样子千钧把力啊？！侬气力大来！
牙：（嗯那）自家一点也弗晓得。
朱：噢哟，老爷上身一眼弗晓得个伐？
牙：弗晓得。
朱：噢哟，个好。
牙：奈侬弗要搞哩噢。
朱：噢，谢谢侬，侬稍微轻眼噢，搿只台子我借来拉啊。
牙：（打哈气）哦……
朱：老爷上身。
（朱、牙故意互相调笑。）
牙：只杀千刀啥体啊？
朱：侬辣啥体啊？看到东，看到西，对我瞄瞄，两只眼睛眯牢啥体啊？
牙：（嗯那）辣看香头呀。
朱：香头啊？香头里有啥末事看啊？
牙：香头里末看亡人来伐。
朱：（看香头）要死快什，迪个浪有亡人啊？忙人掇得上啊？！侬又看得出介？
牙：（嗯那）弗关哩。
朱：噢，关，关，关，关。侬是双仙人，我是单仙人。
（捉牙虫娘子扑于台上，）
朱：亦来什，老规矩，苦恼煞哉。
牙：（打哈气）哦……
朱：噢，看亡人。
牙：【关亡调】三老爷咾，莫公公啊，（朱白：蛮好听个。）家堂灶君，门神土地末查到，朱家里娘娘末上亡哉噢。（朱搭腔：啊呤呤呤……）
牙：啥体啊？
朱：伲家主婆来，生怕伊弗认得，替伊分路头。我来脱侬搭腔。
牙：伊自家屋里会弗认得个伐？
朱：搿末侬腔要搭弗拉？
牙：弗要个。
朱：侬哼哩哼哩末腔弗搭难听伐拉？
牙：弗要搭个！
朱：弗要搭，噢。
牙：奈弗要烦哩噢。
朱：噢。
牙：（打哈气）哦……【关亡调】噢哟，朱家娘娘末上亡哉噢。
朱：啥人啊？
牙：【关亡调】我呀，朱家大娘娘。
朱：家主婆从来呒没讨过呀。我是侬啥人啊？
牙：【关亡调】哎呀，侬末是我依人呀！
朱：啥个叫依人啊？
牙：喏，迪人呀。
朱：迪人个算啥？
牙：【关亡调】噢，侬是我个家主公啊。
朱：搿末我叫侬啥啊？
牙：【关亡调】家主婆啊。
朱：（作哭状）噢哟，家主婆，长远弗看见，来哉，来也刚刚来，到隔壁饭店里去吃顿饭。、
牙：啥人去吃饭哉呀？
朱：我屋里弗开伙仓，上饭店难得。搿末侬难板来末请侬吃顿饭末啥浪弗好呢？
牙：死快哩，亡人呀，来个。
朱：噢，亡人弗吃介？
牙：弗吃个。
朱：噢，弗好去个。（作哭状）家主婆啊，长远弗看见哉，侬蹲辣阴间好伐？
牙：【关亡调】哎呀，我辣阴间真苦恼啊，（朱白：噢。）呒没啥人纸钱烧啊！
朱：咿！家主婆啊，我烧过个呀，噢哟，清明日脚做清明侬来吃伐？
牙：【关亡调】来个呀！
朱：我买仔三块洋钿咸肉摆仔五斤盐，侬吃来淡伐？
牙：【关亡调】买仔三块洋钿咸肉五斤盐末齁煞哩。
朱：哪能阴间也晓得咸咾淡啊？
牙：搿末咸淡总归晓得个咾。
朱：噢，咸淡晓得个。七月半我烧拨侬一套短衫裤子，两双鞋子，四双袜子，侬拿着伐？
牙：【关亡调】哎呀，当家人啊，侬烧拨我个末事末侪拿着呀，半路浪碰着沈天洪只野鬼末侪抢光啊！
朱：喂喂喂喂，活辣个辰光老朋友，死脱侬半吊子，抢我家主婆末事啊！噢哟，家主婆啊，噢哟，我勒辣阳间苦来，我辣做事体侬明白伐？
牙：【关亡调】哎呀，当家人啊（朱白：唉。），侬辣阳间做啥事休我是侪知道（朱白：噢。），有一日早清清，清清早（朱白：唉。），侬出去开生意偷只老母鸡，绳浪失风吊打末我辣保佑侬噢。
朱：啥侬侪晓得个啊？
牙：嗯。
朱：我是因为仔弄来仔我想埋脱仔咾烧拔侬呀，奈搿能样子，阴间两个赤佬模子要抢脱侬个末我来哪能烧法，哪能拨侬呢？
牙：【关亡调】哎呀，弗要紧咾弗要紧啊，侬拿现铜钿交拨搿个张仙人。
朱：噢，交拨张仙人啊。
牙：【关亡调】哎！
朱：搿末张仙人弗要搭伊拉一样弗拔侬啊？
牙：会得转拨我个呀。
朱：要死快哉。亦弗像阳间咾，噢，阴间也转啊？
牙：唉。
朱：搿末侬要几花啊？
牙：【关亡调】啊呀，侬多者末三十廿块，少者末十头八块也好，弗要忘记末，交拔搿个张仙人噢。
朱（故意吓捉牙虫娘子）：哼哼，家主婆勒辣里厢，我来问侬！
牙：（惊慌失措，未拿包裹，落荒而逃。）要死快哉，西洋镜拆穿啦来，逃走伐！
朱：哼哼，哎，偷鸡弗着蚀把米，强盗碰着贼爷爷！哈哈哈哈哈哈……
说明：老滩簧对子戏《捉牙虫》又名《关亡》，写一个以捉牙虫、关亡、看风水、看相算命等骗术糊口的女子在路上呼叫招徕顾客时，遇到以偷窃为生的朱阿狗。朱阿狗想诈骗捉牙虫娘子的钱物，邀她到家中算命，并乘机加以调笑。捉牙虫娘子知其不怀好意，虚与应付，撬去其牙齿后溜走。该剧是上世纪二、三十年代本滩常演剧目。由彩旦和触(丑)角合演。说白带有浓重的松江乡谈习俗和拖腔声调，唱腔用民间小调【久闻调】（该曲调在滩簧对子戏《打花包》中亦有运用。）和【四大景】。捉牙虫娘子关亡时，所用之【关亡调】为本滩、苏滩、苏州弹词之共有，该曲亦为这三个剧（曲）种共用的【离魂调】之前身。
苏滩后来形成【离魂调】的过程中将【关亡调】与【柴调】揉合，形成【离魂调】，后亦为本滩、苏州弹词所用。同吋，其前身【关亡调】也被独脚戏吸收运用，且《捉牙虫》的从戏剧结构到表演方式与独脚戏中演出至今的同名曲目《关亡》极为相似，二者似有关联，究竟如何，尚侍考证。
1954年举行华东戏曲观摩演出大会时，曾剔除其中不健康的成分，在唱词和表演上进行加工，参加展览演出。1982年滩簧汇演时老艺人沈天洪、杨美梅二位前辈又一次演出了此戏，留下了弥足珍贵的录音。现根据当时演出的录音与1920年代前辈孙是娥、刘子云灌录之唱片整理唱词。因该剧说白、唱词中有过于粗俗的词句，难于以字记之，故删去。凡删去处，均已明示。开场时二人所唱之久闻调在实况录音中有不雅词句，且较短，故删去。现依1920年代前辈孙是娥、刘子云灌录之唱片整理补入，与实况录音中所唱的内容不同。另，据介上节介绍该剧还运用了民间小调【四大景】，实况录音中似无，究竟为何，尚待考证，望知情者提供相关情况。对说白中的方言词汇、语句，因难寻正字而音译，或是有讹误之处，均在文中明示，恳请方家指正，不胜感激。
此戏已绝响沪剧舞台数十年，整理出该剧唱词，一来，以期沪剧进一步挖掘、整理、继承传统剧目。二来，首届上海沪剧艺术节已于3月7日闭幕，整理出该剧唱词，也算表表我对沪剧的情意吧。

谢谢上传！

谢谢上传，赞！

谢谢上传共享

谢老师上传！

谢谢老师上传 !