马上注册，结交更多好友，享用更多功能，让你轻松玩转社区。
您需要 登录 才可以下载或查看，没有帐号？注册
x
连环计
第一场
范丽凤 唱：
时运低来，命运轻，
范丽凤，蔡家娘娘想心经。
我想起了从小爷娘早死脱来，
我配在此地蔡家做洋媳，
自从我与秀卿定亲后，
吾伲夫妻一对感情深，
只不过蔡家屋里穷咾苦，
全靠伲丈夫蔡秀卿挑葱买菜铜钿寻，
有一天秀卿到外面做生意，
冷雨落着仔一大身，
回到屋里厢毛病得，
直到现在勿曾起身，
看上去勿看郎中勿会好，
我请公公往外行，
要与大人想才情。
想罢一边身站立，
有请公爹老大人。
有请公公。
蔡渭庭 噢，好媳妇啊，我来哉。
人生七十古来稀，
休笑穷人穿破衣，
十指尖尖有长短，
南山树木有高低，
忽听媳妇叫，
移步往外行。
范丽凤 公公。
蔡渭庭 好媳妇啊，秀卿昨日夜里毛病好点伐？
范丽凤 公公啊，
蔡渭庭 啊？
范丽凤 唱：
你不提秀卿毛病倒还罢，
秀卿伊昨日一夜勿曾睏，
一歇热咾是一歇冷，
乱说乱话讲勿停，
公公啊，看上去，
勿看郎中勿会好，
故而我请你老大人，
想个办法请个郎中搭伊看一看，
对得起床上的生病人，
蔡渭庭 唱：
听侬说，我心忧急，
秀卿他昨日夜里翻来覆去一夜功夫勿曾睏，
寒是寒咾，热是热，
伊只有加重勿减轻，
照格能看，勿请郎中看病，勿会好，
真要急煞我条老性命，
吾伲蔡家穷苦你晓得，
侪靠秀卿挑葱卖菜铜钿寻，
养活吾伲老小一满门，
一有格毛病睏勒床上落勿起，
吾伲屋里厢好卖格么事拢总卖干净，
侬叫我公公身走出，
叫我想才情，
我一把大的年纪，
人老好像风前烛，
像隔年灶君勿当令，
掀过勒个陈历本，
今朝人勿晓得啥明朝人，
叫我公爹动点啥脑筋？
好媳妇啊，有铜钿人生病，拿钱活着，
吾伲穷人身浪有毛病，
只能要拿命来拼。
范丽凤 唱：
公公侬哪能讲出此种话？
蔡渭庭 啊？
范丽凤 说什么，穷人拿条命来拼，
蔡渭庭 唉。
范丽凤 阿晓得，秀卿是个要紧人？
哦，公公，
我倒有一个急办法，
蔡渭庭 嗯。
范丽凤 勿晓得公公侬阿赞成？
想起我格亲生子，
身浪还有一条格花抱裙，
倒勿是，拿一条抱裙当脱仔，
能够赎药买菜郎中请，
蔡渭庭 动呀动呀动勿得，
当脱仔抱裙郎中请，
现在格天气话冷勿算冷，
早晨夜里比勿得热中心，
衣裳侬呒么着，
小囝格身体也要紧。
范丽凤 常言说么：呒柴哪怕金漆橱，
呒米哪怕皇后娘娘绣龙裙，
也要拿进典当门，
好得迭格小囝岁数小，
吃饱仔奶奶床上睏，
只要拿被头塞塞紧，
火烧眉毛要救眼前急，
搭救秀卿毛病最要紧。
好吧，公公？
蔡渭庭 别样呒么好办法，
范丽凤 有啥个办法呢？
蔡渭庭 我只得张紧头皮要答应，
好媳妇，侬到里厢去，
小囝身上去解抱裙。
范丽凤 公公侬此地坐一歇，
蔡渭庭 唉！
范丽凤 让我到里厢解抱裙，
拿仔一条抱裙身走出，
重又回身叫大人，
一则是要跑天公早，
二则来，太阳勿肯等时辰，
公公侬早去早转门。
蔡渭庭 我看见小人的抱裙，
像万把钢刀心浪刺，
顾仔大人难顾侬小小人，
现在辰光勿大早，
作别你媳妇就出门。
范丽凤 我双手要拿门开出，
公公当心。
蔡渭庭 重又回身信服称，
侬关上门，要到里厢去，
到房间里厢当心生病人，
最要紧咾，最要紧，
拿一条老棉花毯搭个小囝塞塞紧。
范丽凤 作别公公要拿门关上。
蔡渭庭 唉，
再提我老老蔡渭庭，
小老真是个劳苦命，
像屋漏偏遭连夜雨，
偏偏会睏倒个要进人。
一样有毛病，
生勒我身浪啥勿好？
因为我年纪大，岁数整？
就是睏倒个十头八日勿要紧，
我一把大格年纪只养一个伲子，一个囡。
大格囡圄嫁到汪家门，
只有吾伲蔡秀卿，
伊是吾伲一脉后代根，
老太婆，侬死勒阴间路浪，
要吃更饭保佑秀卿的毛病早点好，
总要望伊十分毛病九脱轻，
能伊好到外头做生意经，
赚两个铜钿回家转，
等到清明七月半，
买鱼买肉买荤腥，
买仔长锭白纸来斋斋侬，
让侬可以勒阴间路上扎扎足足吃一顿，
我苦命小老么一世耕种白辛苦。
只落得请郎中还要当抱裙，
匆匆走，向前行，
抬头看，门前就是街坊镇，
进市梢，向前行，
人来人往闹盈盈，
听一听银匠店里打首饰，
看一看裁缝店里针线灵，
又看见，染坊架子高搭起，
典当房子石库门，
让我苦命小老当脱仔抱裙请医生去。
第二场
蔡渭庭 先生，走好！
郎中 啊。
蔡渭庭 走好。
郎中 噢。
蔡渭庭 此地就是，到哉，到哉。
好媳妇啊，开开门。
范丽凤 来了噢。
蔡渭庭 噢。
先生，请，请！请走好，走好！
我来关。
郎中 呃，迭位是？
蔡渭庭 呃，就是我格媳妇。
郎中 噢，噢。
嫂嫂。
蔡渭庭 先生。
范丽凤 勿敢当。
郎中 秀卿兄寝坐勒啊里啊？
范丽凤 了勒里厢，
郎中 了勒房间里，我来搭伊去看看吧。
范丽凤 喔唷，先生，里厢龌龊勿过，阿要去扶伊出来吧？
郎中 呃，扶伊出来勿方便。因为伊有病啦，呃，碰着仔风勿大好，啊，我来进去……
蔡渭庭 格么，房间里厢龌龊咾气味来。
郎中 唉，呒么关系，伲做医生上要看到官家之家，下要看到平民百姓，呒么关系
蔡渭庭 噢，侬倒到宽宏大量格。
范丽凤 格领伊到里厢去。
蔡渭庭 唉唉，里厢去。
郎中 噢，里厢去。
蔡渭庭 唉，里厢去！先生，请走好。
好媳妇，侬领先生进去。
范丽凤 噢，
蔡渭庭 啊哟，总要毛病早点好，推扳勿起，秀卿伊是个要紧人，要是伊有啥哪能，老格老，小格小，哪能再好做人？唉……
郎中 呃，呃呵，呃呵。呵，老伯，……
蔡渭庭 先生啊，
范丽凤 先生。
蔡渭庭 先生要紧伐？
范丽凤 迭格毛病碍啥伐？
郎中 呃，先生勿要紧。
范丽凤 迭格毛病……?
郎中 迭格毛病么……那早点哪能勿来喊我呢？
蔡渭庭 早点么……想是想着格，实在呒么办法，铜钿呒么呀。
郎中 啊呀，迭格病啊……毕竟，侬急覅急，噢。
蔡渭庭 噢，有啥勿，先生？
郎中 迭格，迭格……
蔡渭庭 先生有啥勿？
郎中 先生我有啥事体？迭格，生病人么，讲到勿碍啥呢，是有眼蛮要紧格，格么，但是要讲到呒么救呢，或者我本事小，啊，倘如伲，伲先人了勒呢，伲爷了勒还可以有办法，不过到我手里，我自家本事浅薄，见识来少，所不敢担任跌能大格责任，呃，格能吧，那请别位先生望望看，好啊，我么，勿好开方子。
范丽凤 啊呀，勿关格呀，先生，哦，我求求侬，侬无论如何要求求伊。
郎中 咦，阿嫂，阿嫂，
蔡渭庭 先生啊，侬要求求伲秀卿啊，先生啊。
范丽凤 推板勿起格，
郎中 唉唉，老伯伯，我勿敢当，勿敢当。
范丽凤 推板勿起格呀，伊是要紧人，万一有啥哪能，叫伲一家人家哪能办法呢？
蔡渭庭 推板勿起。
郎中 唉，真真作孽。
蔡渭庭 请侬先生到此地块来也非轻容易，再要请别人么，哪能来事呢？
郎中 唉，伲做医生就怕跌能样子，顶尴尬，勿开方子伐，话起我心肠硬，要开张方子伐，伲有责任格，不过我有句闲话先要声明，万一吃下去格贴药，好了，秀卿兄病愈以后呢，那覅讲我姓张格医生本事大，啊，迭格是那祖浪格德气，倘如万一看了，吃坏脱仔呢，格么那勿要说我姓张格医生看煞人，那推扳勿起，唉。
蔡渭庭 先生侬放心，伲决勿会讲迭种闲话格。
郎中 哦，格么，让我来死马当伊活马骑，噢。试试看。
蔡渭庭 好，侬救救伊。先生，侬请坐啊。
郎中 毛病呢，乡下人说“过腰围”，叫满身毛病。
蔡渭庭 哦。
郎中 那么，所以现在一有病呢样样侪发作出来。
蔡渭庭 发出来哉。
郎中 嗯。呵咳，呃，
蔡渭庭 哦，先生，谢谢侬。谢谢侬。
郎中 呒么关系，呒么关系。
蔡渭庭 哦，睏倒仔侪要发出来哉。
郎中 呃，有啥呢几花日脚哉？
范丽凤 长远哉，也要十几日哉。
郎中 哦，十几日。伊迭格病呢，受，受着眼寒了，迭格寒呢，而且话是……身体啊，一向已经单薄哉，做来已经枯脱哉，再碰着仔冷雨，或者冷雨下来热仔，热仔再碰冷，几层隔了勒浪哉，呃，当然所以是…… 危险哉，是危险。
蔡渭庭 是格。有一日做仔生意转来啊，落雨，落了背心浪厢，落着仔冷雨咾得格毛病。格能样子睏倒格。
郎中 嗯，嗯。
蔡渭庭 先生，乃侬救救伊。
郎中 好好，药么叫深山百草之根，只能医假，是勿能医真，是病医得好，勿图元元（指钱）灵，铜钿银子好买命呢，有铜钿格人家勿会死人。啊哈，所以身边常带三种草，笔尖成签世上方，丸药药丹丹妙药，奇方方为有奇方。
呃，老伯．
秀卿兄毛病
唱：
有点头涨仔仔拗勿得，
蔡渭庭 头涨勿？
郎中 那荆梗桔梗用防风，
两只眼睛掀勿起，
石决明，苍白，用川芎
冬桑叶用个两钱重，
药罐头里煎煎浓，
连吞三朝就轻松。
鼻头管里么呲嗵呲嗵有点拗勿得，
此乃名叫重伤风，
要用两钱开关散，
马龙丹要用三厘重，
常带三分干咳嗽，
咳嗽里厢可见红？
蔡渭庭 咳嗽…… 呃，有红格。
范丽凤 有红格。
郎中 看见红格？
蔡渭庭 有格。
郎中 迭格红格还是一丝一丝，还是一点一点，还是一朵一朵格？
蔡渭庭 伊迭格红，有常时一点一点，有常时一丝一丝，有常时满口血红。
郎中 啊呀呀呀，迭格，血格样么事有分别格，一点一点名叫金钱吊蟹污，一丝一丝叫洒金红线，一朵一朵叫沸金之旺。叫医生独怕啊，叫咳嗽咳嗽是医生格对头，日间咳嗽三焦火，夜间咳嗽非家寒呃，痰要分五种颜色，青黄赤黑白。青痰神不足，疲倦土黄痰，红痰为伤，黑痰是肺腑之毒，白痰谓之本色，所以治痰解咳要用
唱：
三钱川贝，墨和，钩藤外加广橘红，
钩藤，吃仔可以引正来，迭格橘红顺气又宽胸，
我看伊么吃仔么是心口堵，阿是拗勿得？
此乃格名叫食肚痛。
蔡渭庭 一劲喊难过格？
郎中 吃过啥面食伐？
蔡渭庭 面食么倒……
范丽凤 面食倒勿曾吃咯。
郎中 糯米吃过伐？
蔡渭庭 哦，糯米食……
郎中 更嫌勿好哉，吃几花？
蔡渭庭 吃……有一日，齐巧隔壁三婶婶拨伲一碗圆子。
郎中 呃。
蔡渭庭 乃么伊吃格圆子。
郎中 吃几只？
蔡渭庭 吃六只，
郎中 喔唷，格糯米圆子一等一档好吃六只？好啦人也尴尬！
蔡渭庭 冷格呀。
郎中 啊呀，冷圆子加宜勿消化了。迭格没事拨伊当中一隔是上下勿通哉。
蔡渭庭 先生你要想想办法啊。
郎中 乃要消伊食：陈曲，麦芽，
唱：
要用山楂末，
那是砂仁，豆蔻一钱重，
我看伊翻起身来勿便当，
翻身要喊骨头痛。
有伐？
范丽凤
蔡渭庭 有格。
范丽凤 伊翻身要别人相帮伊格。
郎中 哦，迭格内力厢有伤。格洛，迭格我看勿来格，噢。唉，那另外去请个伤科看。
蔡渭庭 请伤科，啥，啥地方请阿？
郎中 伤科么，上海现在秦华寺秦家蛮好。
蔡渭庭 喔唷。
郎中 请到乡下来么也是有限格，总十几块洋钿么哉。
蔡渭庭 喔唷，先生，请勿起格，请勿起格。
郎中 啊，啊呀，格么真要命，迭格伤我……
蔡渭庭 先生想想办法吧，
郎中 格能吧，用：
唱：
铁扁担，鸡脚骨六十打。
蔡渭庭 迭格毛病养勿起格。
郎中 药名呀。
蔡渭庭 哦，药名。
胡桃，红花，陈酒冲。
十成铁扁担，
十成铁皮散，鸡脚骨，
六顿梗是药名，
那么听错么勿要铁扁担咾，鸡脚骨咾，六十打.
蔡渭庭 噢，药名！
郎中 热起来好像生炭火，
冷来阿是像雪水冲？
范丽凤 有格。
郎中 热起来……
范丽凤 热起来，最好一眼也覅盖啥。
郎中 噢。
范丽凤 冷起来，盖仔两条老棉花毯还嫌比忒冷。
郎中 唉，迭格毛病真讨厌，勿冷勿热啥勿好呢？
蔡渭庭 勿冷勿热么用勿着请郎中看了。
郎中 呃，老伯，侬，迭格，钝是要钝格啊，不过伲医生自家心里写，譬如要医热停么要用冷药格；要医冷停么要用热药格，迭格么事蛮讨厌格，迭格意思，唉。
蔡渭庭 哦，
郎中 我来先医格热，用冷药。格能，
西达和要配羚羊角，
那石膏汤要用益酒冲，
医冷病要用热药，
麻黄桂枝各用贰分半，
迭格白胡椒要用五分重，
两只手么酸来，
一提是提勿起，
外加头海脚腰痛，
范丽凤 有格。
郎中 头海伐？
范丽凤 头啊 ？看伊面孔肿格呀，
郎中 迭格人啊，叫男怕头海，女怕脚肿啊，格能‘
医手酸要用三钱
川续断，
头海脚要肿那是牛膝，六胛，用红木通。
小便哪能啊？
范丽凤 小便啊，小便有好大日呒么了。
郎中 哦，大约几花日脚？
范丽凤 大概么总四，五日天，
蔡渭庭 大解呢？
范丽凤 喔唷，大解是真有一个多礼拜哉。
蔡渭庭 哦，嗨，格毛病前门关脱，后门也闩脱格哉。格么一样前门关仔么后门走走，后门勿好走么，前门走走，乃前后门勿好走，关脱仔，罢勒里厢格家生勿要坏脱仔伐？五脏六腑勿要震动伐？啊呀。
蔡渭庭 嗯，先生，你想想办法，
郎中 医伊格小解
车前子，滑石要用蒲力生，
蟋蟀勾咾龙爪葱，
摘脱两头挺当中，
罢勒药罐头里煎煎浓，
吃下去，回伊格小解就会通。
医大解
巴豆，大黄各用三钱半，
外加六只耕污虫，
吃下去，回伊格大便就轻松。
一张方子来开好，
外加两只金灯笼，
蔡渭庭 金灯笼买勿起格。
郎中 呵，勿是银匠店里去买个金灯笼，
药材店里有，药名叫牛丝络灯，因为耳朵常庄要响，迭格是虚，用金灯笼啊。
蔡渭庭 噢，噢。
郎中 迭格么试试看，倘如侬迭格，头潽吃下去啊，汗出出来呢，侬贰潽再波伊吃，呃，勿出汗么，那么再请别人望望看啊，
蔡渭庭 噢，先生，格么迭格一帖药赎赎伊么大约要几钿？
郎中 呃，叫我预算价钿是伐？算一算。呃，喔唷，迭格两样贵料啦，麻黄，桂枝，羚羊角，西达和侪是贵料，迭格么，总，唉，赎起来么总两千啥子往里，
范丽凤 啊？
蔡渭庭 格是勿来事格，条抱裙当四百个铜钿啊，
范丽凤 格么脱伊减轻点吧，
蔡渭庭 先生啊，格能格价钿赎勿起格。呃，减轻点，减轻点，
郎中 唉唉唉，老伯伯打岔哉，开当咾要放扎绳批条，嫌得贵要减轻点，迭格方纸勿能减啊，有句讲：药对方，吃口汤；药勿对方，药哪怕用船来装，呒么用场格。噢，呃，格能样子，
蔡渭庭 格么白白里，赎勿起么呒么办法。
郎中 赎勿起，毛病勿会好呀，
范丽凤 啊呀，格么乃哪能办呀？
郎中 呒么办法，迭格是板格呀。唉，作孽。格能罢，老伯，覅急，覅急，格能么，我来打个图书（即图章），好伐？打个图书咾，侬到镇浪迭格‘太岁堂’里啊，一个矮大块头伊晓得格，侬问伊赎好了，哦。迭格先生姓王，我搭伊亲眷关系，乃么，侬，我迭格铜钿归我，哦。
蔡渭庭 噢，噢，噢。
范丽凤 谢谢。
蔡渭庭 可以格啊？
郎中 呃，可以可以，
蔡渭庭 哦，先生，侬真好，先生，谢谢侬，谢谢侬，
郎中 呒么关系，呒么关系，
蔡渭庭 哦，迭格医生看病，……迭格，呃，迭格一眼眼勿好算数的。
郎中 啥么事？啥么事？
范丽凤 请封。
蔡渭庭 呵呵，……只好……
郎中 几钿啊？
蔡渭庭 只好，只好拔侬买筒烟吃。
范丽凤 四百钿。
郎中 四百钿啊？
蔡渭庭 四百钿。四百格铜钿。
郎中 哈哈哈，老伯是想得出格。我要贪侬四百格铜钿请封么，我迭格两千四百勿要打个图书了呀。
蔡渭庭 啊呀。
郎中 好来，挺啦罢（留着）。拨勒生病人买点咕药（为除药苦所吃的东西）格吃吃，噢，呒么关系，希望伊早点好。
蔡渭庭 先生啊，谢谢侬，谢谢侬。
郎中 我要去哉。
蔡渭庭 先生啊，坐歇。
郎中 勿勿勿，
蔡渭庭 呃，好媳妇啊，去烧杯茶拔先生吃。
郎中 呃，勿勿勿，我要走哉，我要走哉。呃，我要去哉，我要去哉。唉，我要去了噢。走走走。
范丽凤 格么再吃一点好了呀。
郎中 呃，覅覅覅。我再勿走，生病格要跑勒我前头快哉。
范丽凤 公公啊，我去拿只蓝咾，侬豪烧去赎药罢。
蔡渭庭 好格，好格。
范丽凤 公公侬快点，噢。
蔡渭庭 噢，噢，噢。格么我去了，我去了。
范丽凤 好格。我来拿门 ……。
蔡渭庭 嗨。
后台传来婴孩哭声！
第二场
秀卿临终 借贷遭逐
蔡渭庭 秀卿啊，
秀卿 啊呀…… （声吟）
蔡渭庭 秀卿啊，侬来，侬吃药噢。
秀卿 啊呀，……啊呀……
蔡渭庭 秀卿啊，侬坐。
秀卿 咳咳，
蔡渭庭 秀卿啊，
秀卿 爹爹，啊……
范丽凤 吃药罢。冷仔……
秀卿 我覅吃。
范丽凤 冷仔勿好吃咯呀。
蔡渭庭 秀卿啊，吃仔么毛病会得好，啊。吃。
秀卿 苦来！
范丽凤 药总归苦格，噢。
蔡渭庭 吃。
秀卿 咳咳，
范丽凤 侬去睏一歇吧。
蔡渭庭 唉，吃仔……
秀卿 呃呃呃，（将药呕吐出来）
范丽凤 哪能侪呕脱哉?
蔡渭庭 一道呕脱！秀卿啊，乃哪能办法？去睏一歇吧。
范丽凤 睏吧。
蔡渭庭 出身汗。
秀卿 爹爹啊。
蔡渭庭 啊，秀卿啊。
秀卿 趁我还有口气，我要搭爹爹讲几句闲话。
蔡渭庭 精神呒么，你还是少讲声巴，啊？
秀卿 唱：
亲爹爹，亲大人唉！
我秀卿，自有毛病还自晓得来，
蔡渭庭 乃吃仔药就会得好格。
范丽凤 睏一歇，
蔡渭庭 还是去睏一歇，噢。
秀卿 爹爹
蔡渭庭 秀卿啊，
秀卿 当初辰光得毛病，
我想发两个寒热就会好，
我哪能廓张一场大病上我身，
到个歇（到这会），身浪厢格毛病十分重十贰分，
范丽凤 去睏吧，勿要瞎想。
秀卿 爹爹！
蔡渭庭 秀卿！
秀卿 侬老人家养儿总想防身老，
蔡渭庭 有毛病格人，勿要多思多想。啊?
秀卿 积谷仓要防荒年成，
侬总望我巴巴结结铜钿赚，
养活老小一满门，
我勿廓张身浪毛病有，
秀卿条性命活勿成。
范丽凤 勿要瞎讲！
秀卿 今生报恩来勿及，
只能够我来世投犬马再报养育恩。
蔡渭庭 秀卿啊，侬勿要讲迭格闲话啊，
秀卿 爹爹啊。
蔡渭庭 会好格！秀卿啊，
秀卿 我死仔以后决勿要到阿姐家中铜钿借。
蔡渭庭 秀卿侬啥体要讲迭格闲话啊？
秀卿 同胞阿姐搭我像冤家对头能，
倘然侬借仔铜钿回家转，拿我断送脱，
我死勒九泉不称心。
蔡渭庭 侬勿要讲迭格闲话，会得好格。秀卿啊。
秀卿 蔡家人家家寒穷苦我晓得来，
蔡渭庭 贤媳妇啊，哪能手价瀴？
秀卿 还是让伊去睏吧。
蔡渭庭 去睏一歇，覅多想。秀卿啊，
秀卿 侬呒么铜钿勿买棺材勿要紧，
只要掘一个泥潭三尺深，
芦席包包，箬席捆，
拿我秀卿扼脱仔，
我死了勒九泉闭眼睛。
范丽凤 勿要讲格种事体。
蔡渭庭 秀卿啊。
秀卿 我到个歇告禀仔老来还要关照小，
阿囝啦娘，……
范丽凤 秀卿啊，侬去睏一歇。
秀卿 咳咳，
蔡渭庭 侬，覅，覅多想！
秀卿 我回身转，花烛娘子称。
侬嫁到此地长咾远，
几个黄梅几个夏，
几个年头几新春，
夫妻道里虽然穷咾苦，
从来勿有争咾论。
伲前世里作仔啥格冤枉孽，
罚累我伲少年夫妻两处分，
范丽凤 侬为啥要格能讲呢？
秀卿 阿囝啦娘啊，
范丽凤 秀卿啊，
秀卿 我死仔以后，
你蔡家决决蹲勿得来，
范丽凤 秀卿，侬会得好格。勿要瞎想，噢。
蔡渭庭 覅紧格，秀卿啊。
秀卿 叫侬张开眼睛重嫁人，
嫁人总要张开眼睛看，
勿赌铜钿，勿吃酒，
巴巴结结格生意人，
吃了苦头有得翻身日，
苦恼的爹爹要侬照应，
最好侬嫁人辰光纸头浪厢搭我带一笔，
让小囝带去做拖油……，
蔡渭庭 覅讲迭格闲话啊，秀卿啊，
秀卿 呶，我格亲娘搭我了勒挽挽手，姆妈。
范丽凤 秀卿啊，
秀卿 姆妈。
范丽凤 自家当心点啊。
蔡渭庭 眼睛看花哉，侬！秀卿啊。
秀卿 伊叫我秀卿跟仔亲娘就动身。
爹爹啊，侬要看我秀卿望早看，
再勿看，再要相会等梦三更，
范丽凤 秀卿啊，
蔡渭庭 秀卿。
范丽凤 伲要望侬好格呀。噢，伲要靠侬格呢。
勿对么。
秀卿 可怜我，
范丽凤 公公啊。
蔡渭庭 声音也勿对哉么。
范丽凤 哪能声音会得两样格啦？
蔡渭庭 秀卿啊！
范丽凤 耶，伊格手冰冰瀴。
秀卿 顿时，……
范丽凤 秀卿啊。
秀卿 入了迷魂阵，头发昏，
蔡渭庭 哪能办法啦？ 秀卿啊，侬清爽点啊。
范丽凤 秀卿啊，侬对亮光看看呀。侬哪能啦，现在啊？
蔡渭庭 秀卿啊，
范丽凤 秀卿啊。
蔡渭庭 手脚冰瀴格。
范丽凤 要急煞人哉啊，侬格能啊。
秀卿 勿从阳来，勿从阳来，只从阴
蔡渭庭
范丽凤 秀卿啊，秀卿啊。
秀卿 阿囝啦娘,
家堂……
范丽凤 哪能啦？
秀卿 灶君搭直仔，搭直仔。
蔡渭庭 啊呀，去拿……吧
范丽凤 秀卿啊，哪能办》
秀卿 三潭望月，三潭望月，我到来临，
范丽凤 勿对呀，迭格人勿对呀。
蔡渭庭 秀卿啊，
秀卿 阿囝啦娘啊，
范丽凤 秀卿啊，侬哪能啦，侬讲呀，侬啊。
秀卿 阎王派定三更死，三更死。
范丽凤 秀卿啊，侬哪能啦？
蔡渭庭 秀卿啊，
范丽凤 秀卿啊，侬推板不起格呀。秀卿啊，
蔡渭庭 秀卿啊，
秀卿 并不留人，并不留人到五更。呃……
蔡渭庭 秀卿。
范丽凤 秀卿啊……
阿囝啦爷啊！
侬叮嘱伲三言两语就掼脱伲，秀卿啊。
公公乃哪能办法呀？公公啊。
侬手一推咾脚一挺，
亲人啊，我上有老来，下有小，
迭把乱头发叫我哪能理得清？
阿囝啦爷，侬有灵有性来领我一道去，
我情愿死到九泉与你一道蹲，
蔡渭庭 我格秀卿宝贝伲子啊，
侬讲仔三言两句么掼脱老有老来么下有小。
范丽凤 秀卿啊，秀卿啊，
蔡渭庭 唱：
侪靠你养我我伲老小一满门，
你现在一死叫我伲日后靠啥人？
像黄梅不落青梅落，
白头翁相送少年人，
阎罗黄掀错簿子抓错人。
偏偏死个要进人，
我活了勒格日脚勿能过，
秀卿啊，你勒阴间路浪等一等，
让我撞煞勒侬煞脚跟，
领仔我苦命一同行。 秀卿啊。
范丽凤 啊呀，公公啊。
唱：
公公啊，侬千万死勿得，公公啊，
蔡渭庭 日脚哪能过啊？
范丽凤 侬违心也要忖一忖，
秀卿已经来死脱，
万一侬公公还要有点啥，
真要急断我媳妇肚肠根，
现在死归死咾，活归活，
想办法料理丧事最要紧，
蔡渭庭 好媳妇啊，我伲蔡家人家穷得来好卖么事侪卖光，
好当格当进典当门，
手捏黄连两把剑.
迭格一种日脚哪调停？
范丽凤 虽然陈柴陈米家家有，
屋里勿有啥陈死人，
我媳妇倒有一个急办法，
未知你公公阿赞成？
倒勿是侬要到阿姐屋里跑一趟，
借个几十银洋饼，
拿到屋里来，买口棺材秀卿睏。
蔡渭庭 到囡妮屋里借铜钿啊？
动呀动呀动勿得，
范丽凤 做啥？
蔡渭庭 因为搭秀卿冤家结得海能深，
囡女出嫁要到夫家去，
直到现在么姐弟两个人勿叫应，
赛过像格七世冤家相仿能，
故而秀卿临死关照过，
说道穷是穷咾病是病，
呒么铜钿买棺材，
帘子卷，箬席捆，
掘个泥潭三尺深，
拿伊扼脱仔，伊死勒阴间口眼闭得紧，
假使要去铜钿借，
过世了勒九泉伊勿称心，
我伲好媳妇啊，
秀卿讲格闲话总要听。
范丽凤 虽然阿姐与秀卿不大对，
眼前秀卿已经命归阴，
人死一别是能勾销，
伊格闲话侬覅作真。
而且阿姐是侬格亲身养，
父女总有父女情，
多少铜钿总答应。
蔡渭庭 照格能看，我有跑呒跑跑一趟，
作别侬媳妇就动身，
不过我去借铜钿，
侬好媳妇蹲勒屋里厢，
到厨房间里烧点水，
搭秀卿上身下身揩揩清，
最要紧格最要紧，
死人旁边侬要当心好，
夜游虫要挖眼睛，
范丽凤 公公啊，侬此番到阿姐家庭里，
临出门，媳妇有点勿放心，
侬借得着铜钿要回家转，
借勿着也要早点回转门，
免得我媳妇在家勿放心，
蔡渭庭 噢，噢，噢。
范丽凤 公公，侬当心，噢。
蔡渭庭 天啊，
唱：
我真是个劳苦命，
秀卿死脱呒么铜钿买棺材，
只能要上囡圄门，借两个铜钿断送身，
本当伲子囡圄是我亲生养，
啥讲究冤家结得深，
当面碰着勿叫应，
伊拉了勒屋里格辰光，
我格囡女贪吃懒做勤劲睏，
秀卿劝劝伊，好说好话勿肯听，
反而搭伊寻相骂，
所以了勒迭格浪，冤家结得深，
不过现在伲子已经死，
人死一笔勾干净，
谅想起来，此借铜钿一定肯。
进几步抬头看，
看一看囡女的屋里已经到来临，
立定身，喊开门。
（喊）开开门！
囡圄 啥人啊？
蔡渭庭 我啊。
囡圄 来哉啊，
蔡渭庭 噢，噢，
囡圄 哦，爹爹啊。长远勿来了呀。呵，请进来，请进来。
蔡渭庭 噢噢噢，
囡圄 坐啊，坐啊。好啦呀，侬啊？
蔡渭庭 好啦。
囡圄 今朝哪能有空啦？
蔡渭庭 今朝么，大郎……
囡圄 嗯？…… 哪能啦？
蔡渭庭 那兄弟，秀卿……
囡圄 唉，秀卿哪能啦？
蔡渭庭 伊死哉。
囡圄 啊？！哦，秀卿死脱哉啊？
蔡渭庭 是格。
囡圄 喔唷，谢天谢地，爹爹啊，勿是我讲呶，我两只眼睛么到底是厉害格。我老早看出来迭格小鬼短寿命呀，老早看出来哉。三十勿瞒廿九浪，瞒仔三十就要朝外扛格。噢，好哉，死脱格能格伲子么有啥好难过格呢？有我嘎好格囡女了勒格呀，噢，乃覅难过哉，啊。
蔡渭庭 好囡女啊，侬勿要讲迭格闲话啊，
囡圄 做啥啦？
蔡渭庭 今朝爹爹到此地来，我想搭侬商量商量，
囡圄 商量商量啊？商量点啥？
蔡渭庭 唉，我伲格大郎格宝贝格囡女啊……!那恘做恘么倒底是同胞亲手足，
千朵桃花一树生，
同胞手足总有手足情，
爹爹穷苦侬囡女也晓得，
屋里厢经济困难确实真，
侪靠秀卿么挑葱卖菜养活我伲一家门，
伊迭格一场毛病犯症身过世，
呒么铜钿买棺材睏，
陈柴陈米家家有，
屋里厢哪能好摆陈死人！
囡圄 格哪能办法呢？
蔡渭庭 所以我爹爹上侬囡女门，
侬阿能够借两个铜钿拨啦我，
买口棺材拔那兄弟睏？
阿囡啊……！
囡圄 好，爹爹，侬啊，勿提起秀卿迭格小鬼到还罢，
蔡渭庭 啊？
囡圄 提起迭只小鬼小死人，小浮尸咾，小充军，我格心里就会恨。
想当初我耽搁在娘家屋，
人家讲我伲姐弟道里自家人，
为啥伊搭我勿大对？
看见好像冤家能。
伊讲我难吃并懒做，
顶伤心咾顶伤心，
讲我今世嫁勿着好男人，
我勒娘家屋里是气气闷闷是蹲勿住，
年纪轻轻嫁出门，
到汪家勿瞒三年后，
小鬼要做害人精，
我格丈夫命归阴么，
害我年轻做只身。
蔡渭庭 哪能会……?
囡圄 因为伊格良心勿大好，
所以要犯短寿命，
今朝侬要问我铜钿借，
买口棺材拨伊睏是我随便哪能勿高兴。
有个铜钿拨伊去买棺材，
情愿到外头做好事，
乐得去挑挑外头人，
假使我拿铜钿借拨侬，
拨一个日脚拨一个信，
等东洋大海起蓬尘。
蔡渭庭 侬啥讲究，声声句句讲绝话？
囡圄 迭格绝话么我要讲到底哉，啊，
蔡渭庭 侬回头得来干干净，
虽然那兄弟搭侬冤家做，
伊个歇辰光一死脱，
人死一笔勾干净，
既然侬兄弟面浪看勿起，
这干罢，看我爹爹三分薄面情。
人家说爷格骨头娘格肉，
父母格恩情报勿尽，
侬借两个铜钿拨啦我，
譬如买口棺材拨我爷来睏，
让我拿那兄弟断送脱，
我回到屋里厢，扎扎纸样，帮帮人，
让那弟媳妇，牵散做囫囵，
辛辛苦苦拿迭格小囝养大仔，
将来好加利奉还送上门，
囡圄 爹爹侬能格勿明白？
蔡渭庭 看勒爷面浪。
囡圄 迭能一看侬真是个老好人，
叫我拿铜钿借拨侬，
侬加利奉还送上门，
侬以为侬格媳妇年纪轻，
伊肯蹲勒蔡家门？
照我看迭只百败命，
秀卿死脱仔，蔡家屋里勿会蹲，
伊说勿定要跟人逃走脱，
蔡渭庭 嗨！
囡圄 有格拨伊逃走脱，
还是囡女搭侬来动脑筋，
侬拿迭只败命卖卖脱，
买格一头两百格银洋饼，
侬一半好拿小鬼断送脱，
一半拿了身边活性命，
活来像个仙人能。
嗯，
蔡渭庭 好！
囡圄 侬讲起迭一格小小鬼，
今年只有七个月，
勿晓得伊么有命根呢呒命根？
即使侬拿伊养大仔，
到半路浪搭秀卿一样命归阴，
侬苦来像只老猢狲，
照我看，迭格小鬼蔡家屋里用勿着伊蹲，
让伊带出去做只拖油瓶，
蔡渭庭 啊！大郎啊！
囡圄 嗯？
蔡渭庭 迭格闲话亏侬讲啊！
囡圄 唉，迭格办法么只有我想的出咾，
蔡渭庭 当真？
囡圄 真格呀。
蔡渭庭 果然？
囡圄 唉，啥体啊？
蔡渭庭 唉，
我闻听此言冲大怒，
囡圄 耶，只老头子啥体啊，侬啊？
蔡渭庭 我骂侬贱人，贱娼根，
侬勿借铜钿到还罢，
水花一眼泼勿进，
侬还要搭我想才情，
横也说那兄弟短寿命，
竖也说伊短寿命，
啥叫伲子一死叫我格媳妇去媒家人，
叫我格孙子要做拖油瓶，
侬以为自家骨头重,
到天平浪厢评评看，
还是侬格骨头重，
还是我媳妇格骨头比侬轻几分？
满碗饭人人都好吃，
闲话之中要留三分，
行啥良心过啥日，
行仔好报有好心，
侬行仔迭格一种坏良心，
囡圄 啥？
蔡渭庭 所以罚累嫁到此地夫家门，
年纪轻轻死男人，
绝男绝女绝子孙，
男勿养咾女勿生，
侬将来死起来，
买棺材都呒啥人！
比那兄弟要苦个贰三分。
囡圄 喔唷，侬格只老浮尸啊，
别人来糟蹋我倒还罢，
侬来糟蹋我使我顶伤心，
讲我年纪轻轻死男人，
罚累我要绝男绝女绝子孙，
好，闻听此言我光火，
我一把拖侬往外行，
一手忙将门推出，
一拳一脚打出门，
啊，老侬只浮尸啊，
倒是老蜡烛呀，
蔡渭庭 嗨……
囡圄 我好好交搭侬想办法呀，搭侬了勒想办法咾侬触我格霉头，是伐？好格，从今朝起头，侬么当我呒么，我么当侬死脱。侬下趟再到我门浪厢来，我略断侬格脚跬子呶。老甲鱼！
蔡渭庭 嗨，勿来格哉。
囡圄 嗨，总也算我勒触霉头！
四姐设计
四姐 咳咳，说媒婆来话媒婆，
提起媒婆就是我，
和尚讨娘子也要挨着我，
尼姑嫁丈夫也要挨着我咾，挨着哦，
我啊，叫四阿姐，
村庄浪伐杀千刀搭我出绰号，
人人侪叫我两双头，
我自家也弄勿懂自家呀，
一年到头地勿种，垄勿耕，
倒难板小茶馆里啊
三百块也要摞摞白相相，
靠啥呢？靠我一张嘴巴两档皮，
到外地头，赚仔铜钿XXX
前两日天气落雨，
喔唷，了勒屋里厢睏脱仔几日，
今朝到万里无云，
到外地头去走动走动，
张家也托仔我长长远远哉，
喔唷，我是真正急煞快，
走了路浪厢伊冷清清，
让我唱一只小曲儿绾绾哦。
唱：
小媒婆，天真笑，
手提庙篮肩背包，
走乡村呀，开开眼来连声笑，
我来蘸呀胭脂花粉将脸涂，伊哦哦。
黄杨木梳秀花几朵，
问太太呀，时式包头那要不要？
问小姐呀，这朵鲜花好不好，价钿相巧？
哦，跑倒勿曾跑，脚倒已经酸煞快，
门前有只凉亭，
还是到凉亭里去坐脱一歇，
范丽凤 苍天啊苍天，
爹娘啊爹娘，
秀卿，你有灵有性来领我一道去啊。
四姐 啊呀，有人寻死啊。
唉，慢慢交看啊，慢慢交，慢慢交，慢慢交。
来来来，做啥？啊？
啊呀，啥体啊？年纪轻轻冤得落命？
老古话，好死勿如恶活，
米价勒强哉噢，啊？
范丽凤 侬覅来管我，侬让我去死。
四姐 啊呀，我看见勒，哪能可以覅来管侬呢？
侬迭格一位是娘娘哉，
侬啥场化格啊？
范丽凤 伲蔡家宅里，
四姐 蔡家宅里厢？蔡家宅……， 唉，话起蔡家宅，我倒要问侬，
蔡家宅里有一个蔡渭庭老头子，侬阿认得勿？还活了勒伐？
范丽凤 是我格公公。
四姐 哦，就是侬公阿爹呀？
范丽凤 是呀。
四姐 啊呀，侬格是……就是叫，那个男人是……叫叫叫……
范丽凤 叫秀卿。
四姐 唉，对格，对格，蔡秀卿，秀卿弟啦大娘娘，是伐？要命哉，做啥要寻死啊？
侬认得我勿？
范丽凤 勿认得。
四姐 唉，我倒呶，讲起是啦格。你勿认得哦？呶，侬搭秀卿好日格辰光，我还来催亲格呀。侬格面也是我剃格来呀。、
范丽凤 侬啥人？
四姐 耶，我就是四阿姐啊，就是“两双头”，总听见过伐？
范丽凤 你公公时常讲起格四婶婶啊？
四姐 唉，就是我呀。
范丽凤 做啥咾寻死呀，大娘娘？
四姐 啊呀，哭得来迭能伤心，覅哭，噢，定定心心，有啥事体么覅紧格！可以找四恩娘格呀。啥格事体啦？我现在勿曾晓得呀，侬讲拨我听听，噢。
范丽凤 勿瞒你说，我要寻死，因为我身板浪有……有为难事体。
四姐 为难事体啊？为难事体么讲出来，大家商量商量，
范丽凤 哦，四婶婶啊，既然你认得伲公格，我不妨在侬门前老实说，
四姐 唉，老实讲，我好晓得侬，噢。
范丽凤 因为伲蔡家家道贫，再讲我丈夫蔡秀卿，挑葱卖菜赚铜钿，也是一个苦家庭，有一天我丈夫外面去做生意，冷雨落着仔一大身，回到屋里厢毛病得，今朝已经命归阴，
四姐 啊呀。
范丽凤 伲屋里厢一百铜钿当头掯勿出，除出身浪纽子少铜孔，呒么铜钿买棺材，我到表姐屋里去铜钿借，想断送我丈夫蔡秀卿，
四姐 借着了勿啦？
范丽凤 表阿姐到杭州烧香去，门浪锁好铁将军，
四姐 作孽哉，
范丽凤 勿晓得及时回家转。所以我两手空空勿能见大人，
四姐 恩。
范丽凤 了勒此地寻死路，幸亏侬做救人仙。
四姐 唉，大娘娘啊，
唱：
我道侬寻死为点啥，
嗨，是凄惨咾，
原来秀卿弟，
年纪轻轻命归阴，
所以侬勒此地凉亭里厢寻短见，
我叫侬此地定定心，
呒么铜钿勿要紧，
我四阿姐搭侬想才情，
今朝正是个好机会，
看上去我格两双头正了勒交好运，
本来是张家二相公托仔我长长远，
伊勒沙船上厢赌麒麟，
因为前妻死脱屋里厢呒照顾，
要讨一个续弦讨进门，
我是呒么相当格人才介绍到张家去，
故咾耽耽搁搁到如今，
今朝捧着蔡家大娘娘，
原来伊新死小官人，
我看伊生勒仔四方面孔白头颈，
侪是落难侪是苦，
只要一朵胭脂一朵粉，
身浪厢新格衣裳换一身，
还看勿出是一个娘娘们。
我不免今朝下一眼小本钿，
让伊去断送亲男人，
过脱几日再想办法，
劝伊到外头来嫁人，
了勒伊身浪看上去好捞格一票身价银，
听侬讲，我听听也伤心，
伲来死归死来，活归活，
侬自家格身体也要紧，
今朝侬幸亏碰着我，
我四阿姐是个热心人，
迭格里格洋钿五十块，
叫侬拿仔豪烧回转门，
卖棺城里去XX。
范丽凤 我搭侬根本勿认得，
四阿姐 我认得侬格呀，
范丽凤 今朝本是初次来相认，
虽然侬也是一个热心人，
洋钿借拨我，
断送丈夫蔡秀卿，
我搭侬初次要见面，
侬格洋钿我勿好受领，
四阿姐 啊呀，大娘娘，
我也搭侬一样多穷苦，
哪里来格五十银洋饼，
呶，张家太太良心好，
李家小姐专门行善心，
伊拉有仔铜钿人勿熟，
晓得我四阿姐是个热心人，
一日到夜是东村到西村，
外地头人称千家熟，
叫我到外面来行善心，
有啥患急患难事，
救济迭格一班苦恼人，
侬拿仔去，伊拉十年八年勿来讨，
三头五年勿会要上门，
范丽凤 好是好格，
四姐 侬拿了勒好哉，
范丽凤 不过，我屋里厢还有公了，
我勿能做主，我要问伲公公格，
四姐 哦，侬要问那公阿爹格，阿是啊？喔唷，真是个孝媳妇，
唉，格么好格，我来这干，我来一道陪同侬到屋里去吧，好伐？
范丽凤 好格，
四姐 好吧，侬覅哭，格么侬路浪覅哭，噢，再哭下去身体勿对，
(家门口)
范丽凤 四婶婶，侬先等一等，噢。
开开门啊，
蔡渭庭 噢，来哉，
范丽凤 公公啊
蔡渭庭 好媳妇啊，碰着勿？啊？
范丽凤 真勿巧，表阿姐到杭州去烧香哉，
蔡渭庭 格是借勿着呀，
范丽凤 我呒么碰着人。
蔡渭庭 乃哪能办法呀，乃？
范丽凤 所以我勒半路浪厢呒么面孔回转来，我想寻死，
蔡渭庭 啊？
范丽凤 后来有一个人救我格，
蔡渭庭 啥人啊？
范丽凤 四阿姐.
蔡渭庭 四阿姐啊？
范丽凤 嗯，迭格人倒蛮好格，伊还借五十洋钿拨我了，
蔡渭庭 侬拿勿？
范丽凤 我呒么拿，我说我屋里厢有公格，我勿能作主，要问伲公公格，
蔡渭庭 好格，好格。迭格人走千家格呀，伊格铜钿勿好用格，
范丽凤 公公啊，伊蛮好格，伊说既然侬要问公公，我陪侬一道转去，故咾伊陪我一道来格，人了勒外头，
蔡渭庭 侬领伊一道来格啊？
范丽凤 伊哪能有迭格铜钿呢？啊？乃，这干，既然格能，叫伊进来，叫伊进来。
蔡渭庭 耶？
范丽凤 四婶婶，里厢坐吧。
四姐 唉唉。大娘娘，侬覅客气，噢。
那公阿爹人呢？
范丽凤 了勒此地。
蔡渭庭 哦
四姐 哦。蔡老伯，四阿姐有礼个了。
蔡渭庭 唉，覅客气哉，啊呀。坐啊，坐啊。
四姐 哦，侬坐，覅客气得格。
蔡渭庭 今朝真巧格，路上碰着我媳妇。
四姐 侬晓得啦哉哦？
蔡渭庭 嗯，伊搭我讲格。
四姐 凉亭里厢，幸亏我早一脚，荌一脚是，事体已经撤空啦哉呢。
蔡渭庭 谢谢侬，谢谢侬。
四姐 真正作孽伐，格年纪轻轻？覅要紧格呀，呒么铜钿么大家可以想办法格呀。做啥要死呢？
蔡渭庭 实在呒么办法好想呀。
四姐 作孽，真正，啥格毛病啦？阿是淋着一身雨起头格，是伐？
蔡渭庭 是格，淋着一身雨，睏倒仔就格能样子落勿起哉。吃仔一贴药么呕脱，伊格能死了。
四姐 乃事体也到仔格地步，覅哭哉哦，那假使啼啼哭哭，身体也要紧格，侬覅紧啦里，还有格能格年轻媳妇，还有个孙子拉里。乃么呶，刚刚路浪厢，我碰着大娘娘，大娘娘呒么铜钿买棺材，乃么我有五十块洋钿啦，今朝到真巧。
蔡渭庭 噢？
四姐 唉，
蔡渭庭 四婶婶啊，侬格屋里格情形么我也有眼晓得格，
四姐 是呀，
蔡渭庭 格么，格么，侬哪能会有五十块洋钿格？
四姐 嗨，伯公，我是同那一样格，做一日吃一日，还不如那啦哉，我是田里生活做也做勿来格，
蔡渭庭 唉！
四姐 呶，我是侪靠两家大人家，张家太太，李家小姐，伊拉专门乐善好施做好事，伊拉么叫有仔铜钿外头人头不熟，我么叫人头托熟，单单呒么铜钿，
蔡渭庭 哦。
四姐 唉，故咾，啥人家患急患难，顶顶要紧么要急格铜钿，我想那迭格是急铜钿呀，对伐？救急么呶救救，救穷是也难救格，噢。对伐？
蔡渭庭 是呀。
四姐 故咾，迭格铜钿勿要紧格噢。伊拉讲过啦格呀，侬覅当阿是还勿出，是勿啦？
蔡渭庭 啊呀，用么用得进啦呀，啊，虽说叫侬做好事格，乃么一用用脱哉么，假使要还起来，一时上头哪能还得出？
四姐 覅一时上头还拉里呀，伯公啊，
蔡渭庭 啊？
四姐 侬用好哉呀，张家，李家老早讲过，伊拉迭格铜钿啊，十头八年勿来讨，三头五年勿来要，故咾用啦好哉，噢。勿要紧格呀。
蔡渭庭 哦，十头八年勿来讨，三头五年勿来要？
四姐 唉，勿是喔咾一时上头呢啥讨格呀。
蔡渭庭 媳妇啊，照格能到可以用个啊。
范丽凤 公公，现在头痛救头，脚痛医脚，先用一用咾再讲。好得我表阿姐就要回来格，等伊来仔，我再搭表阿姐去商量。
蔡渭庭 唉，就格能吧。别样也呒么办法好想。既然格能，再好无能好哉，谢谢侬，噢。
四姐 噢，伯公啊，
蔡渭庭 嗯？
四姐 侬覅动气，我并勿是咾啥个勿相信侬咾迭格铜钿呢勿交拨侬，因为侬呢，年纪大碰碰者，阿是啊？外头有句古话，六十么叫勿借债，七十么勿过夜，阿是啊？噢，将来点，小辈手里要说勿过，话勿过格，独怕，是伐？故咾，侬勿好动气格，伯公啊，
蔡渭庭 呃，勿动气格。
四姐 勿好动气格噢。呶，我是……是心里哪能么我嘴巴里也要讲出来格，
蔡渭庭 格么侬交待拨仔我媳妇吧，
四姐 大娘娘，五十块侬点一点，噢。
范丽凤 嗯。
蔡渭庭 好好好。
四姐 是伐？
蔡渭庭 是格，是格。
四姐 有么（够吗）？
蔡渭庭 有足够哉，
四姐 差勿多哉，噢？
蔡渭庭 只好马马虎虎买口薄皮棺材成殓脱仔么好哉。
四姐 是只好马马虎虎，格能样子么也蛮对得住伊拉哉，乃话起白布有啦伐？我来搭那扯白布。
范丽凤 覅格，
四姐 啊？我白衣裳也会做格呀。
范丽凤 马马虎虎点。
蔡渭庭 哦，勿做啥白衣裳，也勿扯啥白布格哉。马马虎虎么好哉。
四姐 白布也勿扯格啊？格那勿扯白布，我今朝勿晓得么呒啥，晓得啦我哉空手荡荡勿像样格呀，秀卿弟真格我看伊好人，我还来催亲格里，让我去买眼长锭咾，格么。
范丽凤 覅哉，四婶婶啊。
四姐 啊？
蔡渭庭 覅伤仔铜钿。呃，覅哉。
范丽凤 覅客气。侬格能样子伲已经是意勿过煞哉，
四姐 哦，乃格能一啥也呒啥我要意勿过格呀。真是，乃五七里补罢，五七里补，好伐？
蔡渭庭 侬坐歇，吃杯茶咾去。
四姐 伯公，我去哉。我是勿是坐定个人，一日到夜事体是忙来，真苦恼呀，劳碌命呀，奔东跑西。格么我去哉噢，那覅伤心噢，那覅伤心噢，伯公啊，
蔡渭庭 走好，走好。
四姐 哦，侬覅客气，伯公啊，千万覅伤心啊，覅要紧格啊，噢。晓得伐，身体保重噢。
蔡渭庭 噢，噢。噢，噢。好媳妇啊，豪烧预备去买棺材罢。
四姐 喔唷，今朝倒总算迭桩生意成功哉。五十块洋钿么受啦哉，阿呀，蔡渭庭啊蔡渭庭，枉为侬从前做保证，这干一看啊，侬乖做乖只要同我四阿姐来领草鞋。我格铜钿好用啊？我格铜钿真格爷吃勿消，娘吃勿消，老虫吃仔要豁啦豁啦蜕毛得来。迭格叫做空中放下金钩钓，不怕鱼儿不上钩！
第四场
逼债
蔡渭庭 好媳妇啊，侬喂眼奶伊吃咾让伊睏吧。
四姐 喔唷，唉，XXXXX。
蔡渭庭 四阿姐啊，
四姐 噢，有礼，有礼。
蔡渭庭 今朝哪得侬会得请空来格？
四姐 今朝，呶，来望望那。提起，迭格铜钿……舒齐伐？
蔡渭庭 铜钿舒齐哉。
四姐 哦，
蔡渭庭 完全舒齐，稍微还能够多一眼。
四姐 哦，格是，蛮好，蛮好。
蔡渭庭 是呀，谢谢侬。
四姐 哦，蛮舒齐，阿是？
蔡渭庭 对。
四姐 哦，格舒齐啦待是也罢哉。故咾，东面么勒纺纱咾啥，巴结来，那是真格。
蔡渭庭 是呀。稍微有眼么买仔一眼眼让新娘子做做。
四姐 是格。
蔡渭庭 以后起可以过过日脚。
四姐 是呀，勿好度眼前格呀，阿是？
蔡渭庭 我年纪多哉，以后天么呀冷哉，做么也做勿动哉，
四姐 嗯，嗯，对格。
蔡渭庭 到开年春浪呢，自家还能够动动，
四姐 嗯，嗯，嗯，日长世久格事体呀，阿是？不过，乃话起……呃，舒齐啦哉伐，哦，舒齐仔，格么拿出来哉，好。
蔡渭庭 老早拿出去啦哉呀。
四姐 拿出去啊？
蔡渭庭 拿出去哉。
四姐 勒哪里呀？
蔡渭庭 耶，摆勒伲后头格老坟浪。
四姐 啊呀，哪能摆了老坟浪要偷脱格呀。
蔡渭庭 迭格哪能会得偷脱格呢？迭格是呒啥人要格？
四姐 哪能会得？
蔡渭庭 我伲穷人家咾，勿会得盗棺咾啥。呒人要。
四姐 唉，伯公，侬勒讲啥？
蔡渭庭 耶，伲秀卿口材。
四姐 哦，侬勒讲棺材是伐？喔唷。
蔡渭庭 成殓好仔，已经摆了老坟浪。
四姐 勿对格。我勒讲铜钿呀。
蔡渭庭 讲铜钿？
四姐 唉！故咾再来。
蔡渭庭 是呀，是铜钿，假定说呒么侬铜钿么，哪能可以买棺材咾断送呢？
四姐 唉，是呀，
蔡渭庭 幸亏侬借拨伲格铜钿，才能够搭秀卿成殓。
四姐 迭格是啊过去啦哉，覅谈。过去个事体勿谈，谈眼前。眼前侬已经舒齐来哉，是勿啦？
蔡渭庭 是呀，是呀。
四姐 舒齐来哉么我就是要拿仔去哉。
蔡渭庭 啥么事拿仔去啊？
四姐 呶，侬铜钿已经舒齐勒哉呀。端正好勒哉呀，对伐？、
蔡渭庭 啥么事端正好？
四姐 耶，伯公啊，我借拨那五十洋钿，日脚到哉呀。故咾，侬讲舒齐啦哉么，我到蛮放心。
蔡渭庭 四阿姐，啥么事日脚到哉，铜钿啊？
四姐 耶，借拨那个铜钿，买棺材格。那么今朝，呶，问那讨格日脚到哉。
蔡渭庭 唉，四阿姐，你覅说笑话啊。
四姐 真格噢。
蔡渭庭 侬勿是……搭伲讲过哉，三年五年勿来讨，十头八年勿来要，哪能今朝来讨铜钿？
四姐 是侬伯公勒讲。
蔡渭庭 寻开心勿是格能样子寻格。
四姐 唉，侬迭格勒寻开心哉，啥格有嘎许多日脚,啥格年数来了啥格……我清清爽爽搭侬讲格，我说伯公啊，迭格铜钿么三头五日勿来讨，十头八日勿来要，
蔡渭庭 啊？三头五日勿来讨，十头八日勿来……？
四姐 乃现在十日朝外哉，透头啦哉。
蔡渭庭 格是，侬讲三头五年咾，十头八年呀？
四姐 瞎话，啥人有嘎长格铜钿借出来啊？
蔡渭庭 难道我年纪大咾已经听错哉？
四姐 当然听错哉咾。侬完全听错勒哉。
蔡渭庭 我还有媳妇了。
四姐 唉。
蔡渭庭 我叫伊出来问问看。
四姐 唉，格问那新娘子。
蔡渭庭 我会得听错，伊年纪轻总勿见得听错。
四姐 唉，好格，侬去问伊。
蔡渭庭 新娘子啊，
四姐 推扳嘎许多年数格呢。
范丽凤 四婶婶。公公。
蔡渭庭 四阿姐，啥格今朝来问伲讨铜钿，伊前两日借拨伲格辰光哪能讲头格？
范丽凤 耶，伊讲个呀，十头八年勿来讨，三头五年勿来要。
蔡渭庭 唉，四阿姐，侬听见伐？十头八年勿来讨，三头五年勿来要。
四姐 啊呀，大娘娘啊，那公阿爹么年纪大了咾会得弄错，侬啥年纪轻轻也重听伐？
范丽凤 耶，侬自己讲格呀，
四姐 唉，是我讲格呀，
范丽凤 侬讲了蛮清爽格么。
四姐 哪能了？
范丽凤 耶，三头五年咾十头八年呀。
四姐 三头五日咾十头八日！
蔡渭庭 哪能会得弄错格能许多呢？
四姐 啊呀，大娘娘，一个人天地良心噢，我是真正迭格是热心人，为好！乃迭能样子，好来，变成热心人招来是非多哉，真是。
蔡渭庭 啊呀，四阿姐啊，勿是侬从前借铜钿拨伲格辰光，我老早讲格。
四姐 讲啥？
蔡渭庭 多做多也用的进，
四姐 唉，
蔡渭庭 但是侬一时上头要来讨，我伲还勿出，所以勿要，侬讲日脚横竖多一眼，三头五年，十头八年，所以才敢接受侬迭格铜钿。假定三头五日咾，十头八日么哪能会得要侬迭票铜钿呢？
四姐 唉，勿噢，伯公啊，我借拨侬格辰光，我搭侬讲还格日脚，侬也答应我咾我借拨侬格。我搭侬讲迭格铜钿么三头五日咾十头八日，乃侬讲差勿多，差勿多。我想侬三头五日，十头八日喊得出差勿多么我借拨侬啦格呀。
蔡渭庭 啊呀，四阿姐，乃铜钿已经用脱哉，一时上头伲还也是还勿出，请侬帮帮忙，以后咾再还吧。
四姐 啊呀，伯公，迭格哪能帮忙？勿是帮忙格事体呀。迭格铜钿当时我借拨侬格辰光我讲过啥人格？
蔡渭庭 侬讲勿是侬自己格。
四姐 勿是自家格。张家格，李家格。
蔡渭庭 是个呀。
四姐 伊拉大人家做好事格，乃张家明朝动身要到杭州去打天下哉，昨日喊我去，问我讨铜钿，面孔搭我板过勒哉，已经。大人家格铜钿勿好用个呀。伊拉要起来是立时三刻要，台子也搭我碰过勒哉。
蔡渭庭 四阿姐，格么请侬有心去到张家，李家搭伊拉太太，小姐讲一声，说我伲实在穷苦，一时上头还勿出，到开新年，让伲媳妇纺纺纱，织织布，我老头子扎扎纸样，帮帮人家，或许等我伲孙子长大起来，以后再一眼一眼还那。
四姐 迭格是长脚闲话哉，扎扎纸样……
蔡渭庭 伊拉是做好事格，好得……
四姐 扎纸样要还是十头八年也勿罢啦，要还格几十年咾还得清啦里。
蔡渭庭 格乃现在哪能弄法呢？
四姐 格我也呒么办法呀，迭格勿是我要来逼那呀，张家，李家要来逼那，伊拉有铜钿是随便啥格闲话侪讲得出，勒我面浪是啊唠唠叨叨，我迭种闲话勒那面浪叫勿好讲呀，真拍脱牙齿往肚里咽啦。
蔡渭庭 格四阿姐，喊我哪能弄法呢？
四姐 哪能么弄法，我今朝要带仔铜钿咾走个呀。
蔡渭庭 带铜钿走，哪能拿得出？
四姐 唉，伯公啊，迭格侬勿作兴啊，侬难人拨勒我四阿姐做，侬算啥格呢？我借铜钿是为好啊。噢，侬现在有仔铜钿到手凶，好利咾本一消哉？
蔡渭庭 勿是到手凶，我是有言在前格，
四姐 格，我也有言在前格呀，张家老早话过格，要迭格铜钿带仔走个。
蔡渭庭 格，四阿姐，一定要铜钿么我实在还勿出。
四姐 还勿出，伊拉人也要格。
蔡渭庭 人？人也要格？
四姐 唉！
蔡渭庭 好格，我横竖跟侬去好哉，我相帮伊拉去做做。
四姐 叫张家养老断送侬啊？
蔡渭庭 格么侬唔落人也要个呀？
四姐 忒老，勿要格。
蔡渭庭 忒老？
四姐 唉！
蔡渭庭 噢。
四姐 老头子要来啥？
蔡渭庭 噢，去拿孙子抱出来，拿我格孙子拨侬抱仔去吧。
四姐 要命哉，格是要拨伊用个奶婶婶啦里。
蔡渭庭 格么侬咾也勿要，小也勿要，哪能呢,要?
四姐 所以咾，伊拉有铜钿人家么老也勿要，少也勿要，只要……
蔡渭庭 只要啥？要么拿伲秀卿格死人抱仔出来，一只材，拿仔去。
四姐 讲得出格，哪能侬迭格闲话啊？伯公啊，迭格勿好蛮闷格呀。
蔡渭庭 勿是我蛮闷呀，
四姐 伊拉么只要铜钿呀，
蔡渭庭 铜钿么现在还勿出，
四姐 还勿出，要格！
蔡渭庭 石子里也逼勿出油。
四姐 讲得出伐，迭格闲话？
范丽凤 好哉，公公啊，侬就耐气点吧，
四姐 台面头浪，推……
蔡渭庭 也呒么迭种事体格，
四姐 真呒么迭种事体格呀，迭格算啥啦？
范丽凤 四婶婶啊，我求求侬，侬就耐气一点吧，怪来怪去只怪伲穷勿好，公公也蛮要争气格，实在现在争气勿来，侬再去讲讲吧。
四姐 勿是耐气格事……
范丽凤 过脱一个时期我一定想办法好哉，
四姐 伊拉勿肯过一个时期格呀，借个辰光是自己晓得呀，侬到现在迭格辰光侬迭种闲话，真正……
范丽凤 四婶婶啊，侬覅光火，覅去逼伲公公哉，伲公公也逼勿起格。噢，侬再去讲讲，倘然侬勿去格，格么侬领我到张家去，我来去求求张家太太阿可以再过脱伊几日天。
四姐 做啥呢？啊？侬啥体啦，侬伤心？
范丽凤 对勿起侬呀，害侬做难人。
四姐 侬迭格寿头啊，啥我四婶婶今朝要迭能来讨咾伐？啊？准备硬逼咾来逼煞侬啊？
范丽凤 乃伲今朝实在拿勿出呀，乃哪能办法呢？
四姐 唉，侬晓得情环理屈拉里？拿勿出，拿勿出！又勿是我要来逼咾伐。那公阿爹叫我来讨格。
范丽凤 啊？公公来叫侬讨格？
四姐 唉！侬真糊里糊涂。
范丽凤 哪能公公叫侬讨？
四姐 侬还勿晓得格啦？侬真正睏勒梦头里。哼，这干一看，侬真正作孽！那公阿爹要卖脱侬！
范丽凤 阿要卖脱我啊？
四姐 唉！
范丽凤 哦，我去问问！
四姐 哦，动也动勿得！侬哪能好去问伊啊？大娘娘，侬要想一想。迭只老头子啊，心里厢有跌能格恨心要来卖脱侬媳妇，伊心里到迭能想，嘴巴里讲勿出，侬假使去问伊啊，唉，伊倒睏仔碰着天，拉破面皮，是啦格！侬是勒我手里讨进来格，现在勒我手里卖脱侬，乃侬哪能回头伊呢？
范丽凤 啊呀，乃哪能办法呢？秀卿啊。
四姐 侬覅哭呀，保重身体，有我拉里。嗨，侬心里厢覅难过，我来去劝劝那公阿爹，好伐？
范丽凤 谢谢侬。侬劝劝我公公，看了小囝面浪，阿能够覅卖脱我。
四姐 格么侬覅哭了，噢。定侬格心，我总归劝伊回心转意，噢！啊？侬有我了勒，总归勿要紧，噢！我来劝伊啊，噢！乃侬豪烧到房间里去哉噢。
四姐 （对蔡渭庭）伯公啊，做啥，伯公啊？啊？
蔡渭庭 做啥？问侬.
四姐 问我啊？啊呀, 我啥来得罪过侬哉啊？
蔡渭庭 侬刚刚问我讨铜钿，立时立刻要逼死伲，我拿勿出。
四姐 啊呀，伯公，我啥逼过你铜钿啊？
蔡渭庭 勿是侬刚刚碰台拍登，侬讲张家太太，李家太太，伊拉要起铜钿，面孔一板就板格呀，
四姐 乃么伯公真正，枉为几十年老保证，哪能勒做格？哦，迭格一眼侬也勿晓得，看勿出啊？
蔡渭庭 啥么事看勿出啊？
四姐 那么真正，侬看我大起来，噢，我今朝板得落面孔问侬讨迭格铜钿格啊？
蔡渭庭 哦，勿是板面孔？格，侬搭我说说笑话？
四姐 笑话么也不是笑话。
蔡渭庭 格么，格么哪能呢？
四姐 侬啊，盛饭里格吃饭勿曾晓得，真是个老好人啊。真格勿晓得啊？
蔡渭庭 勿，勿晓得呀。
四姐 啧啧，要死啊，我迭格人真……叫实心实肚肠，把勒肚皮里厢么，嘴巴里勿讲叫鼻头里要呛出来，讲出来么侬要勿快活格。
蔡渭庭 四阿姐，侬到讲拨我听听。到底是……哪能一桩事体勒海？
四姐 那新娘子啊，
蔡渭庭 啊，我新娘子啊？
四姐 唉，新娘子叫我来讨格，侬晓得伐？
蔡渭庭 伊？伊晓得……？
四姐 伊讲到仔迭格日脚侬来逼，
蔡渭庭 呀，屋里穷苦伊完全明白，哪能伊会得……？
四姐 唉！
蔡渭庭 侬迭格？覅说笑话，我勿相信。
四姐 耶，我哪能来说笑话呢？伊勿叫我来逼，我今朝哪能会得跑上门？伊讲过格侬越逼得厉害越好，侬勒公面浪厢逼。侬晓得伊心里为啥叫我迭能？
蔡渭庭 伊为啥？
四姐 哼哼，伊要想媒嫁人！
蔡渭庭 啊？要嫁人啊？
四姐 唉！
蔡渭庭 伊从来呒么讲过迭格闲话么。
四姐 哦，来勒侬格面浪哪能讲得出？来勒我面浪讲过格。
蔡渭庭 勒侬面浪讲格啊？
四姐 当然咾。
蔡渭庭 伊哪能咾讲啊？
四姐 侬晓得还勒几时讲个来？就是了勒凉亭里厢，我碰着仔伊啊，一路浪转来，一把眼泪，一把鼻涕。伊说四婶婶啊，我是真正苦来覅讲起，了勒迭家断命人家，迭世里呒么出头格日脚格哉。乃是好哉，男人一死，人家呒么希望格哉，我哪能啊，做一世养伊拉老，养伊拉小？我是随便哪能要出去格。
蔡渭庭 哦，伊讲迭格闲话。
四姐 哪能勿是啊？
蔡渭庭 勒凉亭里转来……
四姐 搭我讲格。侬觉着伐？凉亭里转来到乃，一个人快活伐？
蔡渭庭 快活是快活勿出呀，
四姐 搭侬闲话讲伐？
蔡渭庭 勿大讲。
四姐 只面孔火起伐？一日到夜板勒？
蔡渭庭 像啥，眼泪汪汪。
四姐 问伊伊死勿开口有伐？
蔡渭庭 迭格倒有格。
四姐 老早有迭条心，覅看侬啦哉，已经。唉！
蔡渭庭 我去问问伊看。
四姐 伯公啊，动也动勿得！侬哪能好去问伊呢？侬问伊，格么我当中横里算啥呢？做难人伐？当是我传拨侬听格啦里。那么侬勿问伊么倒还呒啥，侬还是覅问伊，伊过户嫁人倒嘴巴里讲勿出，侬一问问仔伊，好，伊睏仔碰着天，是啦格，了勒那屋里厢呒么出头格日脚，乌龟落勒深井里，倒啥格日脚出头啊？我是要嫁人，乃侬哪能？
蔡渭庭 啊呀，四阿姐，格能样子，一家人家要完哉。
四姐 侬覅哭呢，我晓得我一讲侬板要哭格呀。
蔡渭庭 推扳勿起！老格老，还有小格，只有几个月头格孙子。
四姐 伯公，侬覅迭能讲，侬迭能讲，我软心人，我也要眼泪出格，听见。侬覅迭能。 我搭侬讲。侬心里厢覅气，我来去劝劝伊，噢。
蔡渭庭 噢，四阿姐。
四姐 我叫伊啊看看，老，小，自家死去格男人，
蔡渭庭 对，对，
四姐 我总勿把那人家拆开，噢。
蔡渭庭 哦，谢谢侬四阿姐。侬搭我劝劝伊。
四姐 我来去劝劝伊。伯公啊，侬覅气噢，啊，心里覅难过。
蔡渭庭 人心难……
范丽凤 四婶婶啊，伲公公哪能啊？
四姐 喔唷，覅讲起哦，哪能勒。
范丽凤 做啥？
四姐 想想侬么实在作孽。侬哪能会得到迭种人家来格，啊？哪能有迭能格蛮闷老头子，我倒是生仔眼睛勿曾看见过呀。
范丽凤 伊哪能讲？
四姐 哪能讲啊？勿讲倒呒啥，我劝劝伊啊，拿我也骂勒海。伊说归侬啥格事体？清官难断家务事，侬勿曾晓得我伲屋里格事体，我拨勒迭只败命败得苦格哉。骂侬是百败命，说本来伊拉蔡家一家人家蛮顺当，蛮好格，讨仔侬进来啊，一家人家么落拓到现在，颠颠倒倒，秀卿拨侬克煞，伊说迭只败命再要蹲勒我伲蔡家，老要克脱我，小要克脱孙子，豪烧搭我滚出去。
范丽凤 叫我走？
四姐 要卖脱侬，假使侬勿肯走格责任啊，迭只老头子狠心啊，人托啦哉，预备要来抢亲哉！
范丽凤 啊呀，格么乃哪能办法呀？四婶婶啊。
四姐 乃侬……，爷娘家阿有啥人……阿有爷咾娘啦？
范丽凤 我格爷娘老早就死脱哉。
四姐 亲眷呢？
范丽凤 只有一个表阿姐，伊到杭州去烧香，听说还呒么转来了。
四姐 哦，就是……? 杭州格阿姐就格能一个至亲。格么也勿对格呀，蹲勒人家屋里是也是廊檐底下躲雨，也勿长格呀。格侬迭格样子蹲了此地么也勿对，热面冲，那总归要闲话越讲越僵格。
范丽凤 格么乃哪能办法，叫我跑倒啥地方去？
四姐 大媳妇，侬覅哭，侬覅哭，侬哭仔，我要拨侬哭昏格，侬放心，今朝四阿姐了勒总归搭侬想妥当格办法，这干吧，阿要侬暂且去帮帮人吧？
范丽凤 帮人？
四姐 嗯，
范丽凤 我外头格情形我勿熟格呀。喊我到啥人家去帮呢？
四姐 哦，我倒有一家人家啦呀，一家大人家，张家，要用一个针线娘姨。侬格手脚是好得邪气。只要细做，勿要粗做，好伐？
范丽凤 我走仔以后，伊拉一老一小哪能办法呢？
四姐 啊呀，格么碍啥呢？侬到伊面去有工钿拿格呀，工钿拿到此地来么好养活伊拉两家头，一方面么，秀卿格棺材钿么还好拔拔脱，活起来总归睏起格棺材伲啥，对伐？等脱几日，快活仔么，仍旧转来，侬心里哪能啊？啊？侬蹲勒此地是越蹲越僵呀。那公勿快活勒海呀。
范丽凤 要么暂且我去做做，
四姐 唉，是暂且格呀，
范丽凤 一方面么侬劝劝伲公公，
四姐 好格，好格，我来劝伊。
范丽凤 望公公回心么我仍旧回转来。
四姐 格当然仍旧回转来咾。啊，小囝是侬格骨血呀，噢。格么，噢，是伐？我去问问去哉，噢？
蔡渭庭 勿晓得阿劝的醒？哦，四阿姐啊。侬劝伊伊肯听伐？
四姐 喔唷，蔡老伯啊，那哪能讨得着迭能个媳妇啊？
蔡渭庭 哪能啦？
四姐 那讨着迭能个媳妇么坟山浪格风水是老早转啦哉！迭种能格蛮闷女人啊，我生仔眼睛勿曾看见过。我倒好好交劝劝伊格能一家人家叫伊张开眼睛看看，
蔡渭庭 对，对。
四姐 连侬三代，侬狠心得起伐？侬晓得伊哪能回头我啊？
蔡渭庭 伊哪能讲头啊？
四姐 四婶婶啊，侬是伲屋里啥人啊？侬来管你家务事体唔落。我倒第二句闲话讲勿出呀，拨伊钝得来两眼墨赤黑。我说我是也为好。用勿着为好，我已经主意打定啦了。迭只老头子，放我走么走，勿放我走么，日里勿走我夜里也要逃走格。
蔡渭庭 啊呀，照迭能样子一看……，老孵鸡勿肯孵蛋勿好弯折脚。
四姐 哪能勿是呢。
蔡渭庭 伊已经打定主意了？
四姐 老早已经存仔迭条坏心啦哉。我想暂且蹲了屋里格能也勿对。噢，伯公啊，侬心里么覅难过，出去嫁人哉，我也想想迭种能格事体是真正作孽，嫁脱仔好啦哉。将来点迭格小格啥人照顾啊？阿要让伊到外头去帮帮人看呶？
蔡渭庭 帮人？
四姐 唉！我来劝伊去帮人去，
蔡渭庭 啊？帮人比嫁人好，
四姐 格是要好得多了，噢。
蔡渭庭 阿有人家要呢？
四姐 人家是我身板浪有啦。有一家大人家要用一个针线娘姨，只要手脚活灵点好哉。格么暂且蹲了屋里我看看也勿对呀。那迭能，两只面孔侪竖出竖进，侬搭伊讲闲话么半句也讲勿上，迭歇是蛮闷得要死勒海，越讲约僵，倒反而勿好，让伊到外头去蹲脱几日，等到快活仔，回心转意么三代原就蹲勒一道，乃么一方面格铜钿赚转来么养活那，还好么，唉，秀卿格棺材铜钿好拔脱两钿。
蔡渭庭 四阿姐啊，别样倒呒啥，我年纪大哉，死也勿碍，孙子只有几个月头，要吃奶奶了呀，
四姐 伯公啊，好得路勿远呀，时常好转来望望格呀，
蔡渭庭 噢，
四姐 呒没几化路呀，
蔡渭庭 时常好转来？
四姐 时常好转来格，又勿卖绝了伊拉迭家。
蔡渭庭 劝伊勿醒，就让……让伊去吧，
四姐 真格？哦，侬答应哉，是伐？不过我也再去劝劝伊看，准定叫伊去帮人去吧，嫁人是总归勿好格噢，乃侬覅哭啊。
蔡渭庭 秀卿啊，秀卿啊，侬一死，一家人家完哉。
范丽凤 哦，我去回头……
四姐 伯公啊，伲去哉噢。
蔡渭庭 去吧，去吧，
范丽凤 我去回头一声，
四姐 侬听见伐？一家人家完结完勒侬身浪，
范丽凤 我去回头一声，叫伊格小囝当心点，
四姐 小囝孙子伊担怕勿会当心呢啥？去吧噢，走吧。
范丽凤 唱：
公公啊，
我想勿到公公变心变得如此快，
四姐 故咾人心哪能料得到，阿是啊？
范丽凤 秀卿一死断七刚刚过，
勿许我蹲了蔡家门，
就要拿我媳妇铜钿卖，
公公侬心肠忒嫌狠。
幸亏侬婶婶前来到，
介绍我到外面做佣人，
假使侬婶婶勿走到，
公公一定要将我卖别人，
这干看，侬婶婶是伲格大恩人。
四姐 大娘娘，侬覅讲客气话，
路浪厢，侬保重身体顶要紧，
啼啼哭哭勿像样，
拨人家看见要讲谈论，
今朝在此地路浪走，
我四阿姐也是个直爽人，
摆勒肚皮里厢要瞒呀实在也瞒勿过，
勒侬面浪老实讲真情，
那公阿爹狠心肠已经有长长远，
自从那秀卿命归阴，
我屋里厢已经来仔呒趟数，
骂侬迭格一只百败命，
再要蹲了勒蔡家地，
要克脱伊拉一老一小两个人，
伊几次要托我卖脱侬，
现在托了勒张家门，
张家迭家人家该家当（家里有很多值钱的东西），
勒砂船浪厢做见人。
身价银子已讲好，
今朝领侬要上门，
那公阿爹要用侬迭票身价银。
范丽凤 听说公公已经将我来卖脱，
四姐 唉！侬真糊里糊涂勿晓得，乃我搭侬讲明仔罢，噢。
范丽凤 将我卖在张家门，
公公啊，侬应该搭我讲明白，
勿应该暗中受我身价银，
既然侬格能呒道理，
莫怪我媳妇呒理性，
门前河浜前来到，
我跳在河里死脱仔，
看伊哪能受我身价银，
四姐 唉……侬要寻死铁定勿能死，
范丽凤 做人啊做尽哉，我情愿死。
四姐 啊呀，大娘娘侬哪能好死呢？
侬想走了勒路浪断见寻，
侬假使一死脱，
侬要害我四婶婶，
张家是根本勿认得啥蔡渭庭，
侬要想侬死之后，
屋里还有么一老一小两个人，
伊拉身价银子拿勿着，
哪能可以么日长世久活性命，
既然那公爹如此心肠坏，
情愿他无义，不要你无情，
小囝是侬亲骨血，
侬一死脱，小囝有仔啥，
蔡家断绝香烟根，
侬还是自己留了勒世界浪，
让伊进账两百两个身价银，
以后好日长世久活性命，
拿格小囝拖拖大，
侬对得起那亡故的亲男人，
范丽凤 我秀卿面浪对勿住格。我勿情愿呀。
四姐 格么我问侬呀，侬死脱仔，伊拉铜钿勿着杠，公阿爹么拖去吃官司，小囝呒人养，小囝死脱仔断绝仔香烟么，侬秀卿面浪对得住伐，啊？
范丽凤 四婶婶啊，叫我哪能办法呢？
四姐 侬呢，侬暂且就到张家，
唱：
而且迭家人家交关好，
侬一进去就做当家人，
上勿有公婆大人管，
保侬是吃称心来着称心，
小囝留勒家庭里，
侬有功夫也好时常落空会专门，
望望伲子亲所生，
能有将来好机会，
那三代原可以移到蹲，
对伐？噢，日脚长啦里呀，
侬有仔铜钿么拿转去，是伐？
拨伊拉活活性命，
侬覅哭噢，
侬迭能一哭么我心里厢也要乱，
侬想想看，那公爹迭能托我，乃叫我哪能做人？
我是也呒没办法，
想想侬蹲了蔡家么也作孽，呒没超身格日脚。
做一世做勿出头人
还是到张家去享享福吧，噢。
唱：
行来已到三岔路，
三岔路口等一等，
喔唷，要死啦里，
女人家么真正勿便当，
刚刚勒那屋里倒想勿着，
乃现在真……要命，哦，
大娘娘侬此地等一等，噢。
我此地家人家拐一拐啊，侬覅哭，噢。我来去拐一拐啊。
开开门啊，
烟鬼 啥人啊？
四姐 我啊。
烟鬼 阿是老四啊？
四姐 死人，听得出么，老早好出来啦哉。
烟鬼 喔唷，来哉咾，我等侬半日，喔唷。
四姐 豪烧！
烟鬼 唉。哪能介晏来格啦？
四姐 介晏来么，别人呒没事体格啊？
死人，纸头做了勒伐？
烟鬼 老早，我要派用场格。
四姐 格么豪烧拿出来，人我领来啦哉，已经。
烟鬼 已经，格是今朝要照牌头格铜钿，嘻嘻嘻嘻，
四姐 铜钿眼里迁跟斗。快点！
烟鬼 格张纸头我做来费尽脑筋，
四姐 纸头做来好勿啦？
烟鬼 哪能勿好啦？我眼字也几化好勒海。
四姐 侬读一遍拨我听听看啊。
烟鬼 立卖身文契，王大姐，
四姐 又勿姓啥王咾伐。
烟鬼 格么，王三吴陈王，话起迭张纸头是滑头纸头呀，
立卖身文契，王大姐，出身王堍桥，王家湾，王家村，王下去算……
四姐 死人侪是王啦？
烟鬼 那么伊为啥要卖呢，我造……造一个由头勒海，
只因母亲亡故，话伊死娘！
四姐 对格。
烟鬼 无有力量收殓，
四姐 嗯，嗯。
烟鬼 故而自卖自身，自愿央中两双头，
四姐 两双头。
烟鬼 中人，侬呀，就是。侬么老四，两双头。
四姐 格，哪能绰号好上纸头格啦？
烟鬼 勿错呀，迭张纸头么，假使告起来也告勿准格，两双头呒没迭格人格呀，对伐？
两双头，呃，卖与张府，呃，银洋么一封。
四姐 一封么几花啦？
烟鬼 一封么就是一包呀，一百块也是一封，一千块也是一封，无从查考，格张，唉，唉。
四姐 对对对，
烟鬼 当日么一并收进，三面言明，空口无凭，立此卖身据存照。呶，代笔么双盖头，我就是阿三双盖头，呶，某年，某月，某日。
四姐 格哪能某啦侪是阿？
烟鬼 某下去算数，嘻嘻嘻。
四姐 好极哉。那么我赞成侬。
烟鬼 唉，审阅过载。侬拿过来，拿过来，
四姐 审点啥么事啦？
烟鬼 格，吃仔两只炮（指抽鸦片），又勒瘾哉。
四姐 死人，我上落里呒么拿着么，哪能拨勒侬呢？
烟鬼 格眼么好了咾。
四姐 呒没了勒，
烟鬼 过脱仔纸头（表示双方同意签约）么来领……领铜钿，是伐？
四姐 当然，当然，噢。
烟鬼 好好，格么侬就去，我等侬辣，噢。
四姐 晓得！
烟鬼 覅勿来噢。
四姐 勿来侬肯过门勿啦，杀千刀？
烟鬼 哎哟。
张家门
张大生 床底下放放么放勿高，呃，台底下放放么也放勿高，一定是呒没风啦。
唉，嘴巴里眼风啊，总归放勿高格来，让我开仔门到外头去。
放鹞子了。
四姐 死人啊，
张大生 啥事体，啥事体唉？
四姐 侬只憨浮尸啊，侬要死！喔唷，侬迭格冤家，侬踏勒我迭格……踏勒我格鹅眼浪啊，死脱侬啊。
张大生 要么鸡眼，呒没鹅眼格，噢。
四姐 小脚么鸡眼呀，乃我大脚里又大啦哉，故咾鹅眼啦哉。
张大生 唉，横一埭来竖一埭来，来啥体啊？
四姐 哦，浮尸，我来寻啥侬咾伐？寻那兄弟。
张大生 寻伲阿哥啥体啊？
四姐 哪总勒叫伊阿哥哥啦？
张大生 格么，我，我，我大么叫伊阿哥呀，耶。
四姐 啥体咾要叫伊阿哥啦？
张大生 耶，伊拨饭我吃，拨衣裳我着，拨铜钿我用个，我，我叫伊阿哥格。
四姐 格侬倒勿叫伊晚爷拉里。
张大生 要么侬叫伊晚爷。唉，啥事体啊, 横一埭，竖一埭。
四姐 有事体咾来格，侬去请伊出来，话我了勒。叫得出伐，名字啊？
张大生 叫得出，晓得。阿哥唉，
张二生 啊？啥体啊？
张大生 鬼出灯来了，鬼出灯来了！
张二生 四婶婶，要么。
张大生 唉唉唉，
张二生 来了？
张大生 唉。来了。
张二生 侬请伊进来，噢。
张大生 唉，汆进来，氽进来，
四姐 侬好啦伐？又勿木头咾氽进来，人呀！请进来，要么！
张大生 唉，伲阿哥讲氽进来，耶。
四姐 要么侬勒讲，噢，我勿搭侬嘴酸，噢。
张二生 噢，四婶婶啊。
四姐 哦，二相公啊，有礼。
张二生 覅客气，今朝到此地来勿为别样事体呀，又来拿鞋袜钿，是伐？
四姐 呶，讲来好听伐？哦，来总归要侬铜钿伐？鞋袜钿！只有拿侬铜钿，罪过伐？我也老鬼，人领来啦哉！
张二生 啊？
四姐 领来啦哉。
张二生 哟，到奇怪呶，托侬格能许多日脚一点消息也呒没，快起来，人也领得来啦？
四姐 啊呀，侬格事体呀，我阿敢慢格啦？东村跑到西村，南村跑到北村，跑来三双鞋头破，四双袜头穿啦哉噢。
张二生 要铜钿哉？
四姐 勿是，勿是，勿是！人正式领来哉。
张二生 啥么事啊？勒外头了？
四姐 勒外头！
张二生 请伊进来吧，啊。
四姐 人才是好来勿得了！
张二生 好伐？
四姐 好！
张二生 唉，四婶婶啊，不过闲话么搭侬讲明白，我讨伊勿是讨伊人，我讨伊来是当心屋里厢格，所以话起，阿会得做啊，伊？
四姐 啊呀，把家时真正好来！
张二生 人样哪能？
四姐 人样啊？人样是好，人也俏，脚也小，三级身体，六级腰，走勒路上要凹几凹。
张二生 变做妖怪哉，
四姐 要死啊，人才生来好看呀。
张二生 阿会的做啊？
四姐 手脚灵巧，粗细生活样样拿得起，
张二生 好格。
四姐 保侬称心。
张二生 格能我也称心哉。
四姐 噢。
张二生 四婶，请进来吧，
四姐 嗯。
张大生 阿哥啊，要讨娘子了，是伐？
张二生 唉。
张大生 哟呵，嘻嘻嘻，嘻嘻嘻，
张二生 啥开心啦，啊？
四姐 大娘家，侬勿好眼泪出格，噢，晓得伐？今朝是快活事体，迭格事体啊……
张大生 对格，对格，对格。
四姐 迭格，呃，二相公。唉，二相公。昨日，唉，丧过人了咾，勿快活。
张二生 唉，来来来，让伊进去换衣裳吧。
四姐 唉，换衣裳去吧，噢。去啊。来。
张大生 伊勿肯去呶，伊勿肯去呶。
四姐 过去呀，豪烧。啊呀，勿要紧格，噢。屋里厢事体有我了啦。
张大生 唉，唉。
四姐 唉，屋里事体有我了勒，放心啊，一切侪有我，侬覅难过哉，噢，啊！事体已经格能哉，噢。作孽，屋里死人勒咾真正伤心啊。话起，人才哪能啊？
张二生 勿错！
四姐 我也错格勿会领来拨侬看个呀！我也老早晓得侬勿错拉格。我拿迭格XXX领进去，我看侬二相公是两只眼睛啄牢仔，真……
张二生 好看伐, 格能样子?
四姐 眼睛也…… 好来勿噢？
张二生 嗯。
四姐 乃话起，……
张二生 哦，四婶婶，我搭侬先小人后君子，纸头有勿有？
四姐 纸头么哪能会得勿有呢？人来么，纸头一道带来格。呶，侬看好了。不过真作孽，孝女啦哉，阿是啊？屋里厢死脱娘，晓得伐？呒没铜钿买棺材，乃么七凑八凑凑拢来么，现在屋里厢讨债人坐仔行情行市。
张二生 哦！
四姐 唉！侪勒逼拢来呀。
张二生 格么等铜钿回去还债格咾？
四姐 是呀。
张二生 格是这干，我来去拿。
四姐 噢，好格，好格。喔唷，顶好勒海。
张大生 呃，呃，勒换衣裳。
张二生 噢，四婶婶啊，侬拿过五十块，此地两百五十块，侬点一点吧，噢。
四姐 噢，噢，覅点得格。喔唷，侬格铜钿还要点呢啥？哪里一趟少过歇？迭格里厢么两百五，阿是啊？
张二生 两百五。
四姐 言明讲好么三百块，以前拿过五十块。
张二生 是啊。
四姐 唉，以前五十块，现在么两百五。两百五十要拿到伊拉海头去个呀。
张二生 哦，哦，哦，哦哦，啊哟，
四姐 啥么事啊？
张二生 是我忘记哉，呶呶呶。迭格廿块拨侬格噢。一点点，勿好算数。
四姐 瞎话啊，二相公啊，迭转么随便哪能办清公事，
张二生 做啥？
四姐 侬真当四阿姐棺材里伸手，死要铜钿咾伐？我真也看见格呀，捞铜钿格地方。勿拿格。
张二生 要格。
四姐 勿拿格！
张二生 要格呀，要……喔唷，唷…..
四姐 我随便哪能勿拿格，我勿拿格，随便哪能勿拿格。
张大生 啊哈，勿拿，勿拿，早就拿啦哉，噢。勿拿勿拿要拿进去格。
四姐 乃，谢谢侬噢。
张二生 覅客气。
四姐 我去哉。
张二生 哦，来，大生啊，
四姐 假使有啥事体么，二相公啊，侬叫大生来喊我好哉。
张二生 好好，送送四婶婶。
张大生 噢！
四姐 开年我要来吃红蛋格，啊！
张二生 好格！
张大生 喂喂喂喂，喂喂喂喂，
四姐 啥体啦？别人家事体急来死个。
张大生 二少爷，赞格！
四姐 死人也懂赞咾勿赞格！
张大生 唉！唉！唉！格么侬搭伲阿哥动仔脑筋么，格么，我也要搭我动动脑筋。
四姐 侬也要讨娘子啊？
张大生 唉!
四姐 侬寿头怪气格么。
张大生 难板格，又勿是长庄寿格咾，
四姐 侬真格要勿啦？
张大生 真格要格呀。
四姐 我么当侬勿要，假使侬要，我有勒。
张大生 有勒伐？
四姐 有！
张大生 呃呃呃，杀人家格大小姐啊？
四姐 喔唷，问回侬啥人家格大小姐咾，
张大生 格么总归有人家格咾。又勿是天浪落下来格咾。
四姐 好出身！
张大生 哦。
四姐 喔唷，迭家人家大人家。
张大生 哦？
四姐 那丈母娘是有身份格。
张大生 我……我同伊配……配勿？
四姐 配得上！
张大生 噢噢噢噢，
四姐 只有侬好配。
张大生 好好好。
四姐 那丈母娘人称“八奶奶”，侬讨一个八奶奶啦勒囡。
张大生 八奶奶啦格囡女？
四姐 赞伐？
张大生 格么伊迭格一双脚还是大脚还是小脚？
四姐 喔唷，侬还问大脚小脚，死疙瘩。一双脚是好得来。
张大生 嗯。
四姐 小脚，
张大生 哦？
四姐 人称梅花脚，雪里跳！
张大生 哦哦哦，赞格，赞格。
四姐 赞伐？
张大生 格么伊格只面孔是圆面孔还是方面孔啊，还是长面空啊？
四姐 长面孔！侬欢喜勿啦？
张大生 赞格！
四姐 只面孔是比那哥嫂趣哦！长拢面孔，尖下巴，两只耳朵朝上叉！
张大生 嘻嘻嘻嘻。
四姐 赞伐？
张大生 格么及时领得来？
四姐 侬几时要啦？
张大生 我就家要！铜钿我有格。
四姐 侬铜钿有格啊？
张大生 问伲阿哥拿好哉。也，格也呒没关系格。
四姐 真格，是伐？侬就有么我现在好就领来！
张大生 好格呀。
四姐 领也领来勒哉。
张大生 真格？
四姐 唉！
张大生 啥地方？
四姐 呶，勒对侬望呀，呶。看见勿啦？
张大生 哈里啊？
四姐 勒侬眼睛面前呀。
张大生 哈里？
四姐 呶，
张大生 耶，只黄狗呀！
四姐 侬只要同只狗配配！
张大生 哇！
张二生 唱：
东方一亮照乾坤，
再来提起我张二生，
我自从将续弦讨回转，
格位大娘娘，人出众咾，手脚灵，
粗细生活伊样样会，
家务管得来煞啦清，
我讨着迭能格大娘子，
出门做生意也放心，
我有桩事体弄勿懂，
这为啥伊闷闷不乐勿称心？
平常日脚少开口，
我勿懂为点啥原因，
大概是新来晚到怕难为情。
今朝我要出门生意做，
勿免我要请大娘娘往外行。
拜托一声就动身，
我到外头能放心，
行到外房端正站，
立停身，娘子称。
大娘娘，请坐啊。
侬事体侪做好了伐？
范丽凤 做好哉。
张二生 大娘娘，
范丽凤 阿有啥吩咐？
张二生 我想搭侬谈谈。
唱：
侬自从到伲张家地，
家务一切是侬当心，
并勿是我要当面称赞侬，
侬贤德贤惠少少能。
今朝我请侬出来非为别，
我出门要做生意经，
所以要拜托侬，
家务格外要当心。
范丽凤 我当侬叫我为点啥，
原来侬相公要出门，
屋里厢事体勿再做，
所以叫我往外行，
我叫侬胆大门来出，
屋里事体我经心。
张二生 我还有一桩事体勿放心，
就是我阿哥张大生，
虽然伊格年纪比我大，
有点憨头憨脑憨勿清，
伊事体勿懂进咾出，
讲闲话勿晓得重咾轻，
倘然有闲话充装侬，
卑人面上看三分，
范丽凤 相公侬勿要讲得忒客气，
大伯脾气我知应，
伊憨头憨脑讲勿听，
假使闲话里得罪我，
我无论如何勿会作伊真，
请侬胆大要出门，
侬此番船要开出去，
一路上自己身体要当心，
假使你到仔目的地，
最好写封安家信，
张二生 我一定要写信转来格，
呃，大娘娘，
范丽凤 我搭侬去……
张二生 好好。
范丽凤 预备个包裹。
张二生 我房间里厢勒梳妆台上摆好两千铜钿勒，那么米瓮里有五斗白米，照我算起来么，吃到我转来差勿多了。倘然勿够的说话，侬叫大生到镇上去拿好了，啊。
范丽凤 好格！
张大生 阿哥啊。
张二生 搭侬讲，
张大生 啊。
张二生 今朝我开船出门去做生意了，
张大生 哦，
张二生 侬勒屋里当心点，
张大生 又要出去啊？
张二生 唉，嫂嫂刚刚来，伊勿晓得，侬要照应点，再覅憨头憨脑了。
张大生 哦，侬放心，侬放心，我会得当心格，
张二生 哦，当心，格么最好呒没，
张大生 侬……拨两个铜板我，
张二生 哼，闲话勿曾讲完了，就要铜板，
张大生 侬侬侬出去，勿晓得几时要转来，格我……我总要用格咾。
（张二生给钱）
张二生 屋里当心点，噢。
张大生 呃，侬几时转来晓得伐？
张二生 大概廿日天到一个月，
张大生 噢，噢，晓得。
张二生 格么侬屋里当心哉，我去了，噢。
范丽凤 当心，
张大生 侬走了？
张二生 唉！
张大生 格我送送侬。送送侬，送送侬。
张二生 覅客气哉，自家弟兄还客气点啥呢？
张大生 弟兄呀，自家人呀，格自家人勿送么送外头人格难为情伐？呃呃，侬出去当心点，噢。
张二生 噢。
张大生 当船上厢去么，呃，船头船浪覅蹲，蹲了船舱里，蹲了船头船浪么，呃，呃，呃，蛮危险格。
张二生 格两句闲话讲了好格呶，噢。以后一直格能样子。
张大生 蹲了船舱里么太平，
张二生 对格。
张大生 呒，呒没事体格，侬，上，上，上船格辰光么，侬假使勿放心么，拿只船翻转来，看看看漏勿。
张二生 死快，只船好翻转来格？
张大生 把，把死呀，耶！
张二生 只船反过来，一家人家勿要完结啊？
张大生 耶，把死呀。
张二生 哪能好把死呢？侬哪能讲闲话讲到后来就勿好出来哉，哪能道理啊？
张大生 格么侬，侬，侬要我送勿啦？
张二生 覅侬送了。
张大生 哦，格么我去，去滚铜板去了。
张二生 嗨，哪能格能憨法格？
唱：
拜托家务就动身，
走勒路上想心经，
我有仔迭能格大娘子，
越思越想我越开心。
一切按照正道理，
抬起头来看规整，
茶馆店已经到来临。
哦，有人啦伐“
店员 唉，啥人啊？
张二生 是我啊。
店员 哦，二相公，是伐？
张二生 货色阿曾装好啦？
店员 还呒没，等侬来，等侬来啊。
张二生 好格，我就来了！
店员 好…….
公孙求乞 翁媳相会
三倌 伯伯。
蔡渭庭 三倌。
三倌 小囝睏着哉。
蔡渭庭 好，好。
三倌 那么好好交抱转去领勒吧。
蔡渭庭 我还想问侬借一只小船，
三倌 借一只小船啊？呃，侬到啥地方去啊？
蔡渭庭 我去望一个亲眷。
三倌 好，格勿要紧。船勒此地船棚里厢，呶，钥匙侬带仔。伯伯侬早点转来，噢。
蔡渭庭 哦。唉。
唱：
手扭橹绷船要动，
顺水氽出蔡家村，
出得村庄抬头看，
见三尺黄土筑新坟，
别人家坟浪长起了青松柏，
我儿坟浪冷清清，
秀卿啊，死仔侬来苦仔我，
我伲一老一小难活命，
侬一死，想屋里断了正梁木，
四面格壁脚坍干净，
侬死在九泉可晓得？
你妻已经变了心，
公孙俩做了求乞人，
摇一里，氽一阵，
看见门前房子一屋影，
雪白粉墙乌黑瓦，
屋脊相连像小市镇，
怜求太太小姐做好事，
让我叫一声善良之人求穷人。
我是急匆匆摇动小船向前去，
做做好事吧，
范丽凤 朱砂渐渐升中心（表示今中午时分了），
娘娘在偏房纺纱绳，
只见辰光勿大早，
拿两只鸡鸭呼转门。
我关上门坊身朝里，
到厨房间里看分明，
米扫箕一只拿在手，
白米簸格浅一升，
顺手水桶拎一只，
到河滩浪厢白米净。
大伯外面白相去，
屋里事体勿经心，
白相一歇回家转，
回到屋里要吃中顿。
（传来婴儿哭声）
哪能听见小囝啼啼哭？
听声音好像月里孩童小小人，
大概伊呒没奶奶吃，
迭格大人为啥勿当心，
我听见迭格声音想自身，
想起我也有一个亲生子，
现在蹲了蔡家门，
勿晓得身体好勿好，
缺少一个亲娘领，
说勿定比迭格小囝要苦几分。
蔡渭庭 做做好事啊！
范丽凤 啊，门前小船有一只，
见船浪厢，一老一小两个人，
莫非伊拉讨饭吃，
娘娘应当行点恻隐之心，
蔡渭庭 求求穷人。
范丽凤 哦，唉，侬迭格老伯伯，侬阿是讨饭格啊？
蔡渭庭 实在惭愧，还是第一次，
范丽凤 为啥头沉倒仔勿肯抬起来啊？
蔡渭庭 呒没面孔。
范丽凤 覅怕难为情，侬抬起头来好了。
啊，公公，是侬？啊呀，公公啊，侬豪烧摇上来，
蔡渭庭 哪能是媳妇？
范丽凤 公公啊，侬摇上一橹吧。
公公啊，上来吧，侬。
公公，小囝放下来，我来抱。
哦，公公啊，侬哪能会得格能格啦？
公公，
唱：
此地勿是谈话处，
拨勒人家看见勿当稳，
侬跟我媳妇往里行，
此地地陌生疏勿认得，
勿晓得那里面阿有人，
到里厢谈谈阿要紧？
我请公公胆放大，
好得伲里厢呒啥人，
侬胆胆大大勿要紧，
公公，我抱仔小囝领侬公公前头走，
蔡渭庭 扫箕水桶我来领，
媳妇出门佣人做，
哪能身浪衣裳件件新，
难怪她是几日功夫就变了心，
范丽凤 我推进门坊身朝里，
公公啊，当心噢。
蔡渭庭 老老回身拿门关紧，
范丽凤 大概侬早饭勿曾吃，
我相请公公往里行，
侬走到厨房里，
要吃饭锅里盛，
要吃小菜厨里掯，
要吃酒你自家瓮里温，
好得公媳自家人，
勿要怕啥难为情，
侬到里厢吃点心，
让我拿小人奶奶喂一顿。
公公好伐？里厢跑进去。
唱：
好宝贝，我为娘救侬肝肠痛，
像割我心肝勒油里氽，
姆妈几日勿见侬，
你已经饿得面黄憔悴勿像人，
好伲子啊，那爹爹活勒世界浪厢，啥勿好？
哪怕伲穷穷苦苦勒一道蹲，
哪能晓得侬爹爹会得身过世，
那狠心老爹要变心，
说什么伲子死脱，譬如媳妇也死脱，
逼我姆妈来嫁人，
心肝啊，我硬仔头皮离开侬，
我为仔侬眼泪要当枕头睏，
依我心，今朝留侬蹲勒伲张家地，
最伤心，我勿晓得那晚爷啥格心，
万一宝宝生长大，
我为侬将来要难做人，
今朝侬吃仔一顿离娘奶，
勿晓得何年何月再相认，
你打起来要替我为娘争口气，
勿要与那蛮闷格老爹相仿能，
介转想，小囝岁数小，
我叮嘱他闲话，伊勿知应，
拨我已经拗睏着，
让我抱到伊床上睏，
要请公公身走出，
我要搭伊凭理性。
蔡渭庭 跌顿饭叫我哪能吃得落？
心中犹如痛在心，
哪怕山珍海味也吃勿进，
格要叫媳妇身走出，
拿格闲话讲讲明，
好领仔孙囝转门庭。
范丽凤 公公，阿曾吃饱？
公公啊，坐一歇吧。
公公，侬勿是吃仔我一顿早饭，
做媳妇要来埋怨侬，
我埋怨侬公公做事勿该应，
我到那蔡家好几年，
从来勿有灾克星，
想勿到，秀卿死仔断七刚刚过，
侬勿应该公公要变心，
为啥要将我媳妇铜钿卖，
请侬公公搭我讲讲明，
让我媳妇好死死心。
蔡渭庭 啊呀，媳妇啊，
天地良心四个字，
侬冤枉我老老勿该啊应，
侬自从到伲才家地，
伲一家和睦过光阴，
我又当侬媳妇又当囡，
侬待我公公也蛮孝顺，
自从秀卿来死脱，
我们还是熬辛吃苦一道蹲，
是侬自己良心变，
侬要出门去帮人，
使我老老蔡渭庭将地盘里厢拜烛，
了勒躬临身，
范丽凤 公公啊，
侬勿应该么还要讲出此种话，
侬卖脱我媳妇侬心肠忒嫌狠，
四阿姐亲口对我说，
说侬公公嫌我百败命，
说什么秀卿拨我克煞脱，
蔡渭庭 我，几时讲过？
范丽凤 假使我蹲勒蔡家门，
害得那一家老小勿太平，
一定要赶我动身走，
将我媳妇来卖脱，
侬收过一票身价银。
蔡渭庭 收过身价？
范丽凤 侬三百洋钿用得能啥快？
啥犯着已经要做讨饭求乞人？
蔡渭庭 我是几时将侬媳妇卖？
啥地方来受过侬格身价银？
虽然我老老穷咾苦，
迭种肮脏铜钿是用勿进，
侬话我老老卖脱侬，
侬自摸良心问一问，
侬勒四阿姐面浪讲歇过，
说蹲勒我伲蔡家门，
要养伲一个老来一个小，
老小侪要侬担任。
范丽凤 我……!
蔡渭庭 好比乌龟落深井，
今生迭世呒超身，
侬要出来男人嫁，
迭格四阿姐劝死劝煞侬唔肯听，
所以呒没办法想，
只要让侬外头要帮人，
侬今朝反而来冤枉我，
我老头子决勿会得良心狠，
我要是受仔侬身价洋钿回家转，
为啥讲究公孙要做求乞人？
范丽凤 说我要离开蔡家？
蔡渭庭 侬要出来嫁人。
呒没办法咾让侬出来帮人，
范丽凤 公公啊，
我迭种闲话从来勿曾讲过歇来，
蔡渭庭 格侬勿曾讲么，四阿姐伊告诉我，
范丽凤 难道我媳妇脾气侬勿知应？
哦，我明白哉，
我伲已经上了四姐当，
完全伊勒搬嘴弄舌根，
伊只晓得自家有好处，
离间我伲公媳两处分，
四阿姐，侬行仔格种良心要被天打煞，
罚累侬绝男绝女绝子孙，
天打煞侬还嫌轻，
哪能晓得我完全了勒冤枉伊，
公公勿曾变良心，
我现在已经嫁到此地张家门，
我勿是到此做佣人，
我反而勒蔡家难告秉。
蔡渭庭 伲两人上了四婶婶格当，
媳妇被卖还勿知应，
她从中做得两头寻相骂，
要拿身价银子害伲蔡家门，
她只管自家有铜钿用，
勿管我伲老小三条命，
媳妇已经如此样，
听她说话外头已经嫁了人，
唉，媳妇啊，
我现在勿来错怪侬，
事已成也是没改更，
侬到此地那当家待侬好勿好？
伊做啥生意铜钿寻？
姓格啥来叫格啥？
别人面浪勿必说，
老老面前吐真情。
范丽凤 公公，
我本当媳妇勿情愿，
四阿姐勒半路浪厢讲我听，
我想跳勒河里寻死路，
四阿姐嫌得我，一死到也罢，
害那公孙两个人，
我拨伊格能一讲无办法，
只能够老仔面皮到此张家门，
此地公公婆婆早死脱，
只有弟兄两个人，
大伯名叫张大生，
憨头憨脑讲勿听，
丈夫名叫张二生，
沙船浪厢做XX，
虽然我嫁到此地未多日，
丈丈夫待我总算有感情，
公公啊，既然侬已经碰着我，
我安侬胆咾放侬心，
朝后侬生活勿要紧。
蔡渭庭 我伲家不幸，只怪我伲格秀卿死得早，
媳妇也勿必怕啥难为情，
不过我伲蔡家穷苦侬晓得，
我老老是人老好像风前烛，
今朝勿晓得明早人，
手捏两根黄皮筋，
呒钿好像活死人，
蔡家穷苦侬明白，
风扫地来月当灯，
饿死我老老倒勿碍，
既然碰着媳妇自家人，
拿格小囝交拨侬，
让侬媳妇自己领，
侬千看万看看勒死去格丈夫面，
侬与他夫妻总有夫妻情，
熬辛吃苦拿格小囝抚养大，
保留我伲蔡家一脉根，
老老我就死也甘心。
范丽凤 公公侬莫说伤心话，
蔡渭庭 小囝侬自家领仔罢，
范丽凤 小囝是我亲所生，
今朝侬公公交拨我，
勿是媳妇勿肯领，
因为我新做媳妇暴吃饭，
勿晓得二生啥格心，
假使小囝留勒张家家庭里，
害伊大起来难做人，
公公啊，侬还是抱仔小囝回家转，
好得我格丈夫今朝要出门，
出门辰光关照我，
拨我白米有五斗，
还有零用铜钿两千文，
倒勿是媳妇搭侬平半分，
公公侬拿仔回家活性命。
蔡渭庭 动呀动呀动勿得，
铜钿白米我勿受领，
倘然那格丈夫回家转，
要查问侬，铜钿白米呒处寻，
害得那夫妻争吵要淘气寻，
老老勿做害人精，
范丽凤 公公啊，侬勿必为我担心记，
我媳妇主意早打定，
假使我迭格白米铜钿交拨侬，
让侬拿仔回家活性命，
媳妇格生活勿要紧，
假使我要买鱼吃，
买点萝卜青菜也要吞，
假使我要烧饭吃，
烧点粥汤也要吞，
我有钿改作无钿用，
熟年改作荒年成，
省吃俭用省下来，
好养活那公孙两个人，
公公侬此地等一歇，
作别公公往里行，
让我拿出白米五斗半，
还有铜钿一千文，
拿仔白米铜钿身走出，
重又回转公爹称，
今朝侬碰着媳妇自家人，
只要我媳妇有饭吃，
公公侬也有粥汤吞。
蔡渭庭 我老仔面皮白面接，
让我老头子肩背白米往外行，
行仔要到小船浪，
白米摆了勒船中心，
上面拿平肩铺铺平，
让我回上去好领子孙儿转门庭。
张大生 哦，米啊？拨啦伊拉拿去么，我吃，吃点啥？我，我要呒没吃来。
范丽凤 宝贝啊，侬就要与我来分别，
侬跟仔那老爹好好回转门，
勿晓得，几时母子再相认。
蔡渭庭 媳妇，我要去哉。
范丽凤 公公格么侬去吧，
侬过脱几日咾侬再来吧。哦，当心，噢。
蔡渭庭 啊，船浪啥人来过哉？
啊呀，铜钿咾白米侪勿看见哉。
我见此情景心着急，
哪能铜钿白米已经呒处寻？
哪一个狠心贼子来作对？
拿我眼铜钿白米偷干净。
我老老活勒阳间人难做，
还是我跳勒河里死路寻！
仔细一想动勿啦得，
孙儿一死她太伤心，
也罢，让我再到张家去，
告诉我伲格媳妇听，
老老移步朝上走，
到张家格门前叫开门，
开门啊，
范丽凤 我忽听外面高声喊，
娘娘移步往外行，
一手轻将门推出，
蔡渭庭 啊呀。
范丽凤 啊呀，公公啊，侬为啥二次上我门？
蔡渭庭 我是勿讲明白侬勿晓得，
范丽凤 哪能啦？
我老老生来是真苦命，
方才侬铜钿白米交拨我，
我想领子孙囝好转门庭，
勿想狠心贼子拿我眼铜钿白米侪偷脱，
范丽凤 偷脱哉？
蔡渭庭 我本当想跳勒河里死路寻，
范丽凤 哦，勿能够！
蔡渭庭 孙儿一死我勿忍心，
领到此地张家地，
告诉勒侬媳妇听，
拿格小囝交拨侬，
让我老老是早死一日早超身，
我去寻死！
范丽凤 公公啊，侬寻死动勿得，
侬老人人家回心也要忖伊忖，
秀卿临死辰光拜托我，
一老一小叫我要当心，
万一公公有主张，
我勒秀卿面咾难告秉，
虽然侬白米铜钿侪偷脱，
劝侬公公再放心，
好得我里厢白米有二斗半，
还有铜钿一千文，
我一半当中再搭侬公公分一半，
拖大迭格小囝最要紧，
蔡渭庭 初次铜钿已偷脱，
第二次铜钿难受领，
救仔田鸡要蛇饿煞，
带累侬媳妇难以活性命。
范丽凤 我请公公勿要忧咾急，
媳妇事体覅担心，
丈夫出门关照过？
假使白米铜钿用干净，
叫大伯伯镇浪好想才情，
公公啊，勿必与我再推却，
请侬勒此地等一等，
让我跑到房间里，
拿仔白米铜钿往外行，
公公啊，
媳妇送侬到后河亭。
蔡渭庭 我老老抱仔孙囝勒前头走，
范丽凤 有我媳妇背后跟，
蔡渭庭 急匆匆，行到小船浪，
媳妇，我只能够老仔面皮要受领，
范丽凤 公公啊，
侬此番回到屋里，身体要自保重，
勿必多忧多虑多伤心，
勿比我媳妇蹲勒家庭里，
公公有啥伤风咳嗽小毛病，
端汤端水有我当心，
我现在蹲勒张家地，
公公有啥小毛病，
我路远迢迢勿知应，
公公啊，侬要看我媳妇，望早看，
稍停片刻要两处分，
蔡渭庭 媳妇啊，
侬叮嘱我来，我也要叮嘱侬，
叫侬自家要当心，
在张家，那夫妻要和睦，
是为了我伲老小两个人，
侬要看苦命格老老多看看，
稍停一刻就两离分，
媳妇，像天上跌下无情剑，
范丽凤 已将公媳两离分，
蔡渭庭 今日，水桥来分别，
范丽凤 何止何日再相认？
蔡渭庭 媳妇……。
蔡渭庭 到已经转来，
勿晓得媳妇了勒屋里阿碍啥勿？
范丽凤 请侬先等一等吧。
张二生 噢。
范丽凤 开开门啊。
蔡渭庭 像格媳妇转来哉么？
啊，侬哪能转来哉？
范丽凤 二生也来哉，
蔡渭庭 啊？事体晓得哉，闯仔穷祸哉！我去拿，我去拿！
范丽凤 公公啊，侬覅走呀。白米搭铜钿呒没偷脱呀，是大伯伯闶脱格，伊弄错了，啥格说我……
张二生 覅讲哉，覅讲哉，
唱：
老伯，
到现在事体弄明白，
是四婶婶勒当中弄乾坤，
害得那老小两处分，
所以我今朝到此蔡家地，
接侬老伯到伲张家门。
蔡渭庭 嗨，迭桩事体动勿得，
因为我伲家寒贫，
老老呒没办法想，
领仔孙儿往外行，
讨饭碰着仔我好媳妇，
铜钿白米出事情，
带累那夫妻淘气寻，
我老老实在心不存，
居然侬肯来原谅我，
我岂能再上那张家门？
张二生 覅要紧格呀。
蔡渭庭 呃，媳妇啊，
迭格小囝拨啦侬，
侬只要小囝好好交照顾就是哉。
张二生 哦，老伯，格么侬哪？
蔡渭庭 我蹲了自家屋里勿碍。
张二生 侬格能大格年纪蹲了此地，叫我想想勿放心，
蔡渭庭 迭格哪能可以呢？
张二生 老伯格脾气我晓得，
请侬在旁等一等，
我回身便把娘子称，
老人家勿肯跟到张家去，
伊怕只怕风言风语真难听，
我卑人有一个好办法，
不免我过房伊，
问侬娘子阿赞成？
范丽凤 迭格真是好办法，
想我哪能会勿答应？
公公啊。相公想一个好办法，
伊说道，侬一个人蹲地伲勿放心，
因为伊格爷娘早死脱，
屋里缺少人照应，
相公情愿过房拨侬，
蔡渭庭 啊？
范丽凤 接侬到伲张家门，
老老小小好一道蹲。
蔡渭庭 啊呀。
今朝那是在了勒折死我，
范丽凤 公公，蛮好呀。
蔡渭庭 我老老呒功要受领，好吧，好吧，要么拿孙儿拨啦伊做一个X领子，
好表表我老老格一片心。
张二生 双膝屈跪爹爹叫。
蔡渭庭 啊呀呀，起来，起来，搀扶侬大官落起身，
我从今以后就有照应！
孙儿做你一个干伲子，
张二生 好好。
蔡渭庭 叫声过房爷。
我伲要变一家人。
我老老在家也安心。
张二生 张家蔡家变一家人。
蔡渭庭 恩浪攀亲更高兴！
两家攀一个连环亲！
完
|
提升卡
置顶卡
沉默卡
喧嚣卡
变色卡
抢沙发
显身卡
