碧落黄泉 十七

小朱            有数啊，嗨嗨，嗳，李太太，何经理了勒搭侬讲点啥？

孙凤梧         呒没讲啥，

小朱            呒没讲啥？难道说一点都呒啥表示么？

孙凤梧         喔，伊搭我讲，搭我带做两千股股票。

小朱            哦，呵呵呵，呃，李太太，侬晓得何经理迪两日时常到此地来，迪个又是为了啥？

孙凤梧         为啥？还勿是为伲格妹妹吗？

小朱            对啊，李太太，侬真了勿起，上一次了勒西湖边上何经理看见那妹妹……

                   唱：

                   一见倾心着了迷，

                   神魂颠倒呒主意。

                   三头两日来恳求我，

                   希望你竭力来成全。

孙凤梧         小朱先生,

                   唱：

                     迪桩事体真为难，

                   伲妹妹从小有志气，

                   何况她又是大学毕业的高材生，

                   做偏房决计勿愿意。

小朱            李太太。

                   唱：

                   二小姐的情况我晓得，

                   何经理老早已经有主意，

                   只要侬肯想办法，

                   一定会重重酬谢你。

孙凤梧         唱：

                   既然你来重托我，

                   理当尽力来周旋，

小朱            好，李太太，

                   唱：

                   我代表经理先道谢，

孙凤梧         慢。

                   唱：

                   勿晓得何经理他准备一点啥条件？

小朱            哈哈，李太太。

                   唱：

                   呵呵呵，何经理已经准备好，

                   让我一一来告诉你，

                   只要那妹妹答应能结婚，

                   新洋房马上让伊搬进去，

                   最新式格汽车买一部，

                   银行存折交给拨伊管理。

                   等到杭州开设分公司，

                   那丈夫主任格位子就留拨伊，

                   结婚的费用侪由他负担，

                   李太太，如此的条件可满意？

孙凤梧         条件听来倒还可以，不过，勿要了勒现在格辰光讲得、

                   唱：

                   天花乱坠样样好，

                   到将来一场空欢喜。

小朱            嗳，迪格勿会格。李太太侬放心好了。要是侬勿相信么，喏，侬看，“大发证券号”经理何敦仁先生即将在杭州开设分公司，征购别墅……迪格难道说是假格吗？再说，何经理是最讲信用的人，嗳，侬放心好了。

孙凤梧         好，一言为定。

小朱            一言为定。

孙凤梧         看勒侬面浪。

小朱            拨我面子，拨我面子么。

孙凤梧         迪能，侬到里厢去陪何经理，让我去试探试探伲格妹妹看。

小朱            好，静听好消息。哈……

孙凤梧         汪志超先生与金彩雯小姐定于本月十六日在金府举行婚礼……汪志超？

                   妹妹啊。一个人坐在里厢厌弃伐？到外头来坐坐啊。

阿翠            少奶奶，二小姐躺勒床上，伊咳嗽得厉害。

孙凤梧         啊呀，伤风咳嗽小毛病，迪格是难免格呀。

阿翠            少奶奶，侬看是勿是去买点药？

孙凤梧         喔唷，侬倒也想做起医生来哉噢。叫伊出来。

李玉茹         嫂嫂，是侬叫我？

孙凤梧         是啊，妹妹啊，听说侬身体勿大好，是吗？妹妹啊，有毛病要搭嫂嫂讲格噢，勿要年纪轻轻弄出啥个大毛病来，唉，嫂嫂是担当勿起格。

李玉茹         嫂嫂，侬一个人为我伲操心，我，也一直感到勿安啊。

孙凤梧         啊呀妹妹，侬为啥要迪能讲啊？姑嫂淘里么自家人啊，妹妹，侬坐呀，坐呀，哈……, 妹妹啊，隔壁头迪幢洋房侬去看过伐？

李玉茹         呒没。

孙凤梧         我去看过了。我里厢都去看过哉。里厢啊比外头还要好。

                   唱：

                   迪幢洋房真华丽，

                   已经卖给何经理，

                   伊还要行会走开爿分公司，

                   地位显赫有名气，

                   啥人能够嫁拨伊，

                   真是前世修来的好福气。

李玉茹         唱：