碧落黄泉 十九

为仔侬婚姻我费尽心，

                   总算配到仔何经理。

李玉茹         哪怕我死，我也勿会嫁拨伊！

孙凤梧         好啊。

                   唱：

                   我好话讲仔千百遍，

                   你却半句都不依，

                   既然如此有骨气，

                   要硬就要硬到底。

                   何必在此吃闲饭，

                   侬立刻搭我走出去。

李玉茹         走？……好，我走！我就走！

李忍庵         出去格式啥人啊？

孙凤梧         侬看还有啥人？

李忍庵         妹妹啊？妹妹，妹妹。妹妹到啥地方去了？侬讲？侬讲啊？好，我晓得啦，我勿勒屋里，侬又欺负妹妹了，一定拨侬逼走了。我要寻勿着妹妹，我搭侬拼命。

陌生人         啊呀，救人啊，出事体啦!

李忍庵         啊，妹妹，妹妹！

第六场 一签心酸话 读来断肠声

汪徐氏         侬哪能又是迪能？志超，

                   唱：

                   今朝本是你大喜日，

                   紧锁双眉勿应该，

                   虽然是迪桩婚事你勿称心，

                   到现在木已成舟难挽回。

                   你应当欢欢乐乐去迎宾客，

                   为什么孤单只身到此地来？

                   若被金家来晓得，

                   要害侬爹爹做人难。

汪志超         我为了不使爹爹为难，所以我才忍受迪格痛苦。

汪徐氏         唱：

                   你的苦楚娘知晓，

                   眼前只能想想开，

                   做人本来少如意，

                   再说孝顺父母也该应，

                   你还是回到客厅去，

                   莫叫为娘心事担。

汪志超         姆妈，侬放心吧，我会得去格。

张妈            汪太太，伲太太请侬。

汪徐氏         志超侬，志超，侬……

汪志超         侬就让我一个人此地静静格坐脱一歇。

汪徐氏         好吧，侬坐。

汪志超         唉。

                   唱：

                   叫妹妹退了聘书拒了婚，

                   竟然会点头再允婚。

                   眼看灯红酒绿良宵夜，

                   这痛苦究竟是谁造成？

                   威胁利诱我也忍受，

                   这难道说仅仅是父母命？

                   人说道人逢喜事精神爽，

                   我却是内心空虚更愁闷。

马士贵         啊呀，新姑爷，侬勒此地啊？哈哈。哦，新姑爷，堂会已经开场啦，快去看看啊。

汪志超         我勿想看。

马士贵         噢，对，对。等歇就要拜堂了，应该好好交休息一歇，嗨嗨。哦，新姑爷，那个老丈人为侬迪个好女婿，预备用脱两钿，侬看今朝格酒水，预备了一百多桌，真勿得了啊。侬看呀……嗳哟……呃。

                   哦，新姑爷，不过我为侬格桩婚事么也实头卖力格，费脱交关心血来。

汪志超         照迪格意思，我应该要谢谢侬哉了？

马士贵         呃，谢勿敢当格，不过以后还要请新姑爷高抬贵手，多多格照应照应哩。

汪志超         笑话，我有点啥能力来照应侬啊？

马士贵         耶，今朝侬跟金家小姐结婚么，侬就是岩井洋行格小开啦，侬哪能还了勒糊里糊涂啊？侬讲对伐呶？…… 张妈。

                   啊，哪能？哦，侬躲了新房间里也想当新娘子啊？嘻嘻。外头忙得来一塌糊涂也勿来相帮相帮啊，嗳，有侬迪种人，真碰着点啥。啊……耶。嗳，堂会了勒响了，看堂会去啊…… 哎唷。

张妈            呸，侬是啥格么事啊？一本正经，哼，靠拍马屁吃饭，还要摆威风。

夏爱莲         哦，请问侬，新朗阿曾看见？

张妈            刚巧头还勒此地，大概到大厅里去了。

夏爱莲         侬能勿能去叫一声？就讲有个从杭州来格客人要寻伊。

张妈            好格，我去寻寻看噢。寻着仔，我就叫伊到此地来噢。

金彩雯         耶，志超一歇歇跑到啥地方去了？人也勿看见了，啊呀，我当是啥人，原来是夏小姐，真是有失远迎，抱歉得很啊。

夏爱莲         金小姐，侬好，见了面就迪能客气，啥个有失远迎啊，抱歉得很啊，那么今朝结婚为啥勿通知我一声呢？

金彩雯         真对勿起，时间实在太局促了，唯恐有想勿到格地方，所以我就等了几张报纸。

夏爱莲         是呀，报纸的动力真勿小。要勿然，我在杭州，哪能会晓得那今朝结婚呢？

金彩雯         喔唷。