阿必大回娘家 （七）

婶白：           去呀！拿出来！

婆白：           啊里搭来啦嘎！

婶白：           去拿伐？

婆白：           喔唷！格末我去拿呀，去拿呀。今朝僻如碰着仔强盗抡啊。

婶白：           侬勒讲啥？

婆白：           我呒没讲啥。

婶白：           搭伊着上去。

婆白：          嗨！婶娘枉为侬是讲道理格人呀，婆阿妈搭媳妇着衣裳，迪条道理是啥人行出来格啊？

婶娘：          讲道理！婆阿妈打媳妇，囡圄勿好回娘家，养媳妇勿当人看待，迪条道理啥人行出来格啊？你讲仔道理嘛勿要打  哉！                           

婆白：           喔唷！我搭伊着呀！格末我搭伊着呀 

婶白：           着！                              

婆白：           来着！                           

必白：           喔唷哇！                         

婶白：           做啥？勒阴损伊哇？               

婆白：           喔唷！天地良心噢，我搭伊拍脱点灰尘呀！

婶白：            啊呀！勿好！伲必大转去住几日，仍旧要回来格。今朝迪只雌老虎，勒我手里吃仔亏，将来难免勒小姑娘身浪要翻本，啊呀！我到害仔伲必大哉。

必白：           婶娘！奈伲好回去怠，婶娘啊！

婶白：           慢！必大啊！侬去住几日就要转来格先去回头伊一声，消消伊格气噢。

必白：           婶娘！我跟婶娘回去，情愿饿死格，也勿情愿再到婆家来哉，婶娘！

婶白：           红八字勒人家手里，有啥格办法？以后格事体再讲噢，去回头伊一声。

婆白：            那等勒看么怠，等勒看么怠，格李家格媳妇呀，勿好到陆家去过啥一生一世格呀，天浪厢飞格一只鸟嘛，终有一日要到地上来寻食吃格，我横肆头发团拆失啦怠，哎！大家等勒看末怠等勒看末怠！

婶白：           去回头伊一声，消消伊格气。

必白：           婆阿妈！

婆白：           喳！

必白：           婆阿妈！我跟伲婶娘回去哉噢！

婆白：           侬回去么怠，啥人要觅啥侬宝唠伐！老古话呀，媳妇勿是宝，有仔铜钿再好讨，侬有力量喏养伊一生一世喏！勿要跨进我李家格门口，侬有朝一日回来喏！侬是养媳妇呀，我勿会当侬太婆看待格呀！喏！红八字勒勒我手里，喏！

婶白：            只老太婆到是勿受人抬举勒呀，本来领伲必大转去，住格十头八日就要送回来格，好！既然迪能讲，必大去仔不来勒，侬有理拿仔红八字，四方台子八方理，大家去评评看，评得出道理，必大还是侬格媳妇，评勿出道理伲必大一生一世勿来哉！走！

必白：           噢！

婆白：                  喔唷！喔唷！一只死货色开心来喏！ 跳跳蹦蹦跳勒高来，喏！喔唷哇呀！ 喔唷哇呀！喔唷哇呀！喔唷哇呀！喔 唷！苦啊！苦啊！我年纪活仔四十多 啊，头一趟碰着迪能格顶头货呀！

                       （ 剧终）