关注微信公众号【站长自定义模块】,定时推送前沿、专业、深度的商业资讯。
热度 3
婆白: 嗨嗨!婶娘侬来有啥事体伐?
婶白: 一则来望望侬,
婆白: 噢!谢谢侬。
婶白: 二则嘛,刚刚伲格阿大,不懂规矩来得罪侬亲家姆,我来赔格勿是。哎!讲起来也苦脑,小囝死者脱爷娘缺少教训,开口就骂动手就打,迪格一把年纪也算话勒狗身浪呀。婆白:嘿……婶娘!喏!奈叫侬勒讲嘛,大家讲讲明白末哉,侬也晓得格,亲眷来往勿坐客堂便坐厢房,那格小阿舅来啊,或唠躲勒伲羊栅间里呀,侬到讲讲看迪格算啥格名堂,我稍为讲仔伊几句末,伊只嘴吧里叫勿清勿爽,奈末惹我光仔火唠,我轻呦呦拿伊拍仔一记呀。
婶白: 哼……
婆白: 哼……奈末我想想我是长辈勿噢,伊是小辈,搭伊陶啥格气,奈打也打过哉,讲也讲过怠,算怠算怠!
婶白: 本来伲穷人家格小囝,拨人家打打骂骂掼常勒格,算怠算怠!亲家姆啊!
婆白: 嗯!
婶白: 不过我有章正经事体,搭侬想相商相商。
婆白: 啥事体啊?
婶白: 喏!伲必白勒爷叔,明早周年要搭脱一只灵台,我想带伲必大转去,磕几 格头顺便住几日,侬看好伐?
婆白: 噢!爷叔明朝搭灵台?
婶白: 嗯!
婆白: 让必大去磕二格头唠住二日,喔唷!迪章是大事体呀。
婶白: 好去伐?
婆白: 按理是好去格。
婶白: 好去格?
婆白: 好去格!
婶白: 必大啊!走!
必白: 噢!
婆白: 慢!婶娘!勿要急!勿要急!老古话呀,水牛污稿田嘛勿壮,女人格闲话嘛勿当。侬要领必大转去嘛,伊啦公阿爷勿勒勒唠,没啥人发放。
婶白: 噢!男亲家勿勒府浪?
婆白: 出门返猪猡去哉。
婶白: 今朝会转来伐?
婆白: 今朝勿转来格噢!
婶白: 格末明朝呢?
婆白: 明朝讲勿停格。
婶白: 啊呀!
婆白: 奈横肆明朝勿转来有后日格,后日勿转来嘛,喏!到清明讯,清明讯勿转来嘛到七月半,七月半勿转来嘛到十月早,冬至,到仔大年夜嘛总会得转来格。
婶白: 哼哼!伲男亲家今年多少高寿哉?
婆白: 四十九,明年五十哉。
婶白: 侬胆子忒大呀,迭能大格一把年纪,让伊勒外头做生意,辛辛苦苦格。
婆白: 要赚二格铜钿唠呒法想呀。
婶白: 啊呀!一把年纪,风里雨里,上船落船,一格勿当心,头一晕,眼一花,腿一软,朝河里一窜,奈末汆仔长江呱仔桥桩,死勒外头嘛死尸也捞勿转来那能办呐,不过侬到也好搭我一样清清爽爽做福气人哉。嘿……
婆白: 喔唷……迪只女人到触客啦呀。
婶白: 不过闲话讲转来,叫伲必大就一辈子勿要回娘家吗?
婆白: 格是还有我婆阿妈啦来。
婶白: 本来侬婆阿妈是好发放格。
婆白: 婶娘!勿是我勿肯放,一家嘛是有一家格难处,婶娘侬听我讲呀!
婆唱: 叫声婶娘啊女亲家,自家人叹叹苦处勿眼啊啥,我是领那必大勿容易,东合会来嘛西借债,自从必大到伲家,时勿好唠运勿佳。伊啦公阿爷格生意是勿顺利,猪猡瘟死一大排,再加多仔必大一格人吃饭,所以又空仔一生债,好得今年田里收成好,纱好纺唠布好卖,让伲必大帮助伊啦公阿爷,做做生活还脱一点另碎债。
婶唱: 亲家姆侬讲来好听伐,说啥为伲必大空仔一身债,小姑娘拨那做养媳妇,我茶礼勿曾受过啥,人小勿是吃闲饭帮那从早做到夜,侬讲必大生来命勿好,我想那李家命好带勿坏,我要领伊转去住几日,侬推三托四象格啥,侬婆阿妈终有一日归天去,要把望有格亲生小辈到侬灵台面前来拜几拜,老古话烧香勿断杭州路,囡圄总好回娘家,必大过门做媳妇,我勿曾当啥货色卖。
婆白: 啊呀!婶娘啊!
婆唱: 奈老古话,烧香勿断杭州路,囡圄总要嘛回娘家,只不过伲必大身浪呒啥着,破破烂烂回去象格啥,拨别人家看见是笑话伐,勿会讲侬婶娘勿象样塌蛋要塌我婆阿妈。
婶白: 本来那李家格场面。
婆唱: 既然侬一定要伊回娘家,我看还是迪能吧,今年头里来勿及,待等明年三春外,我钵起田来,嗳下起种来,脱起草来,嘛作起花来,纺起纱来,织起布来,染起来唠做起来,做格二件新衣裳,让伊着仔象象样样回娘家。
婶唱: 侬勿要牙齿嚼尖舌头滚,迪种能长脚闲话勿中听,囡圄勿断娘家路,走到天边讲得应,一定要领伊回转门,叫侬勿肯也要肯。
婆唱: 笃笃叫,慢慢能,老古闲话到如今,嫁出囡圄拨出水唠。推出日头早关门媳妇吃仔我婆家饭,由我作主听我命侬要领伊回娘家,勿答应唠勿答应。
婶唱: 笃笃叫,慢慢能,侬迪格女人真猛门有理走尽天边路,无理寸步也难行, 我只出一张红八字,勿曾写过卖身文婶白:必大啊!走!
婆白: 侬敢!我勿叫走,啥人敢带仔伊唠走
必白: 婶娘!
婶白: 必大勿要怕,婶娘来哉勿怕,怕哉勿来。啥人敢勒侬身浪碰缺一根汗毛,婶娘叫伊搭仔三脚架子唠夯实。
婆白: 喔唷!侬勿要一本正经,要想到我关老爷面前使啥格大刀啦!
婶白: 侬也勿要勒张天使面前鬼画符。
婆白: 侬迪眼道行我也有素勒格。
婶白: 啥格道行?
婆白: 我晓得侬格威名。
婶白: 哼!我也晓得侬格大号。
婆白: 啥格大号啊?
婶白: 啥格威名?
婆白: 侬嘛人称独!
婶白: 侬嘛人称雌!