马上注册，结交更多好友，享用更多功能，让你轻松玩转社区。
您需要 登录 才可以下载或查看，没有帐号？注册
x
由于是根据实况录音听写的，其中很多方言已经失传，所以剧本中有不少错误的字，和误听的词，希望各位有兴趣的爱好者能指正。
欺嫂失妻
第一场 别家
黄氏 唱
五月榴花耀眼红,
人逢喜事喜匆匆,
丈夫毛病已痊愈,
买一点鱼肉归家中.
常言道,药补不如食补好.
巴望他身心康健家道隆。
自从他去年腊月乞假转,
几月来面容消瘦多病痛,
我每日里起早落夜伺候他,
我心里是又惊又喜心事重,
柴米夫妻无限好,
恩恩爱爱情意重,
果然吉人有天相,
病势好转我心思松.
大生的店里厢的老东家又来催信,要催伊到店里去.迭个已经第三封信了,让我去看看伊看。勿，伊个毛病刚刚好,让伊多休息一歇吧.
张大生 一生之计在于勤,一年之计在于春。哦, 大娘娘,侬早呀.
黄氏 哎呀,张大生啊,侬个毛病刚刚好,为啥勿多休息一歇要紧落起来呢? 来,坐一歇吧.
张大生 常言道,家有贤妻夫不遭横事.我张张大生有侬贤德贤惠的娘子,毛病好了特别快啊.
黄氏 看侬啊,哦,张大生啊,老东家又来催信了,大概问侬毛病好勿, 好催侬到店里去.
张大生 哦,沈先生的亲笔.
黄氏 信浪厢哪能讲呀?
张大生 呃,大娘娘,多蒙东家抬爱我,催我早日就动身,今年生意非常忙,店中缺少人照应.尤其是银钱出进责任重,不能借助汪落英.
黄氏 大生啊，汪落英是啥人啊?
张大生 要提起此人来头大,出生商家此地本地人,伊是原本与我师弟兄,为人能干极聪明,自从我抱病回家来,店里厢的账目由他担承,如今东家不肯重用他,恐怕内中有原因,好得我病体已经好,我想打听船期就动身.
黄氏 相公,并非为妻埋怨侬,侬天生是个劳碌命,接到书信就要走,要晓得,病愈调理最要紧.依我看,过了端阳你再动身.
张大生 生意人是节前节后最忙碌,早点动身早安心.家庭之中有侬贤德妻,家务事情你照应.
黄氏 哎呀,
唱
屋里事体我自照顾,
相公不必多操心,
好得邻舍也能帮助我,
请你胆大要出门。
张大生 常言道是金乡邻，银亲眷,彼此照应理该应,但不过,亲虽亲,邻虽邻，有桩事情不放心.
黄氏 未知相公为点啥？能不能讲点我听听?
张大生 大娘娘,你坐一歇.我是为了同胞好兄弟.
黄氏 （白）为二叔叔?
张大生 唱
像哑子吃黄连苦在心,
伊是从小贪吃懒做 偷私乖.
爷娘在世当伊宝和珍,
三四岁还吃娘的奶,
五岁六岁打人骂人吵上门,
勒浪七八岁浪学会赌铜钿,
伊是靠十岁勿肯上学要弃学堂门,
十三五岁就学坏,
一早起来要到小茶馆里去吃个早点心,
十六岁送伊出去学生意,
未满半年会得逃转门,
如今讨了妻养了囡,
一家四口过光阴,
伊仍旧赶往要到洋场去,
吃着嫖赌样样精,
屋里厢吵得三缸清水六缸混,
仍旧偷鸡黄猫勿改性.
黄氏 唱
过去之事休再提,
被二叔听见不高兴,
人往高山水往低,
只要二叔肯收心.
寻啥结巴生意经,安安稳稳过光阴.
张大生 （白）大娘娘真是宽宏量大,
黄氏 （白）弟兄么自家人,应该的么.
张大生 哦,对对对对,呵呵,大娘娘,我想到外面去打听打听船期去,我就去就会来咹.
黄氏 好个,早点回来嗷,
张大生 唉,好好好,大娘娘当心点,嗷
黄氏 自己当心点.
张大生 唉,好.
三好婆 唱
东方日出暖乎乎,
里面走出我三好婆,
我年纪活啦到六啊十三啊，
平生最恨贪懒惰,
看不惯事情我要管,
专门热心管事务,
呶,张家长,李家短,
我的肚中最清楚,
夫妻相骂要听我公断,
当我像清官包龙图。
刚才碰着张张大生,
说将要出门生意做,
屋里拜托仔我多照顾,
我一口答应拍胸脯，
因为张家是我老邻居,
好比是我的小辈差勿多,
让我立刻前去走一埭,
望望迭位好媳妇.
（白）唉,到了,让我去看看了拉屋里伐.唉,奈叫讲讲么待,一样是张家的子孙,张大生同张二生就勿大像.张大生是巴巴结结,克勤克俭,张二生这个杀坯,好吃好赌,贪懒,不争气.唉,老古说,若要不识货,只要货比货.伯母道里做人啊就天差地远.大房里的新娘子是真正贤惠来,又是会做人,又是聪明,手脚又是快,做起生活来是裁得开做得拢,哦哟,远远三里看见我已经拉叫个待呀,好婆长,好婆短,叫来我心里真乐团团.嘿嘿嘿嘿,一只嘴巴真甜来像根甘草呀,甜津津,甜津津,嘿嘿嘿嘿嘿,讨着迭种能个新娘子么呶叫额骨头上搁扁担—头挑.唉,讨着二房里这只宝货呀,叫鞋肚里点火,叫（袜灯）末等.床底下放鹞子呵大高而不妙.唉,吃起饭来簸砻糠,做起事体叫吭咾吭.太阳晒拉肚皮浪么不想起床,起来是么头勿梳,面勿揩.两根头发乱来像只巴儿狗.喔唷,提起一双脚是人家话三日两头汏汏，伊是三年两头汏一趟，臭是臭来恶形恶上格, 唉,贪吃懒做勤劲睏,讲出闲话死猛门。人家老古说呀,猪睏么长肉,人睏拆屋,讨着迭种能个烂料女人啊三官老爷吃狗肉,叫作孽咾作孽.
张二生 啊欠，断命的破老乌,一清早呱啦呱啦个乱叫,碰到你也算我倒霉.呸,
三好婆 喔唷,迭两句闲话是拉话我呀.唉,让我去问问伊.张二生呀,
张二生 唉,三好婆啊,
三好婆 侬迭两句闲话是拉讲拨啥人听呀?
张二生 呶,一只苦破乌拨伊叫得来睏呀睏勿着
三好婆 哼,
张二生 三好婆,侬,侬早呀.
三好婆 勿早拉待,侬看呀,太阳已经晒到屋脊拉待.我猪圈间里养着一只懒猪猡啊看见仔个阳光么慢吞吞个也起来拉待.
张二生 喔唷,只死老太婆倒厉害个呀,我骂伊破老乌,伊骂我猪猡,厄,六月债借得快还得快么.嘿,拨眼二眼儿伊搭搭.
三好婆 张二生啊,
张二生 唉,三好婆啊.
三好婆 那只宝货起来拉吗?
张二生 阿是迭个寿女人呀?
三好婆 哎呀.
张二生 嘿,三嬷嬷有喜
三好婆 叫啥?
张二生 还是勿要话起.
三好婆 啥道理啦?
张二生 唉,三好婆啊,
三好婆 做啥?
张二生 侬坐歇.
三好婆 喔唷,客气来啥.喊我坐歇啊?
张二生 我来讲点拨侬听听啊.
三好婆 好个,我倒也听听侬么待.
张二生 喔唷,提起迭个女人啊真踏碎皮球
三好婆 哪能啦?
张二生 一包气啊.
三好婆 气能尬多啦?
张二生 一清早起来又吵场相骂
三好婆 个好事呒端吵啥个相骂啦?
张二生 是呀,三好婆啊,我窝里个境况么也瞒不过你三好婆个,是勿?
三好婆 嗯,
张二生 屋里厢么吃尽当光,迭个日脚哪能过发尼?我想从今以后么巴巴结结么种种田来,过过日脚,侬讲对勿?
三好婆 喔唷,太阳要西天出哉.侬想要种田呀?
张二生 是呀,
三好婆 哎呀,
张二生 一门心思,哈哈哈,
三好婆 啊.喔唷喔唷唷唷唷,啥事体啊?
张二生 唉,唉.
三好婆 迭个杀坯,侬哪能道里啊?
张二生 嗷,勿当心,勿当心,呵呵呵,
三好婆 喔唷,害我跌来痛来.要死勿. 种田还是真个呢啥啦?
张二生 是真个呀,三好婆啊,
三好婆 啊
张二生 屋前屋后么有些土地翻翻松,一门心思种西瓜,要么勿种,种出来,大个像栲栳,小个像三巴,买脱仔钞票个像帩锡箔,迭个铜钿像个青小蛇,可以么吃鱼吃肉,家子婆么勿相信,说我么心思独幅.
三好婆 喔唷,迭句闲话侬慢老话,西瓜要种么,勿种勿熟,人家踏水车,你在吃凉茶,人家在除青草么,侬了拉纸牌揸,种出来个西瓜么大的像木瓜,小的像枇杷,一个铜板捞捞一大把,
张二生 喔唷,死老太婆拿我霉头触,喔唷,三好婆,家子婆么也是迭能话,种西瓜么勿种哉,租个几亩田来种稻谷,今年碰着年成好,稻穗头大的像个牛尾巴唠马尾巴,摇到上海舂兑谷,洋钿__ __ __ __ __ 迭个元宝像个癞蛤巴,非但可以么吃鱼吃肉,前后当头么一道好赎,
三好婆 嘿,看侬鬼摸大蒜头,人家么收绽谷,侬了勒收瘪谷,人家种的稻穗头，大来像个牛尾巴老马尾巴,我看侬额骨头上黑脱脱, 人勿有,树勿遮,种个稻穗头像个老虫尾巴一咄咄,钱粮私债还不起,吃官司链条薄,又要对我忑忑哭,看侬日脚弄勿落,弄勿落.哦,弄勿…
张二生 唉,要死快待.
三好婆 嘿,侬只杀坯啊,看侬种田是吃力个啊,侬还是动动别样脑筋伐.
张二生 三好婆啊,真人面浪不说假话,种田么的确吃力,啊是?
三好婆 唉.
张二生 我想做做小生意么是真个,同屋个寿女人讲讲一眼呒么商量头,
三好婆 个么总有句巴闲话讲讲个老,
张二生 哦,伊讲做小生意么要本钿个,叫我自家去想办法唩咯,
三好婆 个么去想啊,
张二生 叫我去问大哥借,
三好婆 哦,
张二生 三好婆,侬特我想想看,我同大哥是登开住了,几次三番多蒙大哥来接济我,再要叫我去问伊借么我哪能开得出口呢,啊是哦?
三好婆 开勿出口么已经讲出来拉待,
张二生 呵呵,三好婆啊,实在是呒么办法啊,
三好婆 唉,
张二生 我,张张二生上山冒充出身好,现在假当没钱人.曾经借过当头合(ge)过会,无有一票还上门,借借还还倒还罢,只借勿还啥人肯?亲眷朋友看见我当面好似陌生人,穷途末路无处借,兄嫂面前去求情,相问就里做生意,罚咒不进赌场门,三好婆啊,大哥面前我难开口,侬帮我好话去讲几声,
三好婆 喊我去讲两句好话啊?唉,我看侬啊,狗对坑缸发咒哦,啥人来相信侬呀?
张二生 哎呀,三好婆啊,以前么不真作(准足),那我现在学好拉待,我现在懊悔唠明白哉,从今以后一定弃正归邪,
三好婆 弃邪归正
张二生 哦呵,弃邪归正
三好婆 杀坯,两句闲话也讲勿理气格待,
张二生 讲来快老讲错待呀.
三好婆 唉,张二生啊,
张二生 咹
三好婆 那叫讲讲么待,三好婆是从小看侬大起来.
张二生 唉,是呀,
三好婆 个我也希望侬特张大生一样,巴巴结结好好交做一家人家,
张二生 哦对啊对啊,
三好婆 那么侬讲闲话要牙齿作作齐个啊,要想想讲讲哦,
张二生 唉,我想清爽拉待,
三好婆 一定要改过个啊,
张二生 一定改,
三好婆 嗷,个么看侬额骨头,让我到里厢去讲讲看,
张二生 好好好好,三好婆,你是好个呀,一向待我勿错嗷.
三好婆 我是勿好个,破老乌,呱嗒呱嗒要叫个.
张二生 呵呵呵呵,哟,只死老大婆帮忙到里厢借铜钿待,最好能弄到个十块八块洋钿,跑进赌场里厢,要么不着,着牢三寸还伊一尺,
二媳妇 拿侬棺材里一匝
张二生 唉,唉,做啥?
二媳妇 死人侬到开心来哦,
张二生 啥个开心啊?
二媳妇 拿来啊.
张二生 啥么事拿来呀?
二媳妇 洋钿拿来啊.
张二生 洋钿呀?
二媳妇 唉
张二生 半钿生死了嗨,啥地方还有洋钿啊?
二媳妇 唏
张二生 听错了
二媳妇 你自家讲格呀,身边还有十块八块啊.
张二生 你耳朵带啦勿?
二媳妇 啥体啊?
张二生 有十块八块么我老早拿出来待.
二媳妇 嗨,今朝我听错也好,不听错也好,总归问侬要铜钿开货仓.
张二生 啥么事啊?问我拿铜钿开火仓啊?侬问我拿,我去问啥人拿啊?
二媳妇 耶,我勿问侬拿么问啥人拿呀?
张二生 碰着点啥啦待要么?
二媳妇 侬是顶天立地呀,一家之主的男人呀.
张二生 是呀,侬是女人呀.
二媳妇 唉,我是女人呀,
张二生 对啦个呀,
二媳妇 要侬讲呀,别人家讲个,一个女人家要吃要着么嫁老公,勿要吃勿要着么搲啥个空啊?
张二生 迭个啥个闲话啊?迭两个是要吃要着老讨个妻呀,勿要吃勿要着么作啥个死啊?
二媳妇 不要侬个皮.
张二生 哼,
二媳妇 死人,嗨,也算我触霉头老该当运,
张二生 啊哟,我勿见得了也拉交运了嗨,
二媳妇 嫁着侬迭种烂料好男人,进门呒么过好日脚,耽误了我一世美妙好青春,你还不如王小二一年更比一年贫,弄得来,灶前缺少油盐米,灶后柴毛呒半根,吃仔早饭呒中饭么吃仔中饭缺夜顿,今朝火仓开勿出,大哭小喊勿太平,我叫侬出去铜钿借,借勿着我拿行灶锅子摜干净,
张二生 嗨,骂侬一声死女人,
二媳妇 耶,
张二生 哪能道里?
二媳妇 做啥?死人啊.
张二生 我__ __ __ __ 断六亲,啥地方还有铜钿借,啥人会相信我张张二生,侬行灶锅子侪掼光么今后怎能活性命,怪侬天生淘箩命拿我薄薄家当漏干净.
二媳妇 啥,侪拨我漏光嘎?
张二生 哪能勿是呢?
二媳妇 嗷,侬自家赌光倒勿讲呀,
张二生 拨侬吃光啦个,
二媳妇 全拨侬输光个.
张二生 拨侬吃光个,
二媳妇 输光个啦个,,
张二生 赌铜钿么有输有赢,就是输也有限的,拨侬吃是呒么底个.
二媳妇 哪能不要吃呀?
张二生 别人家么一日工夫吃吃三顿,侬要死快待,一日工夫吃起来十七八顿.嗷,侬吃仔我勿算数,索介养阿大阿二一道出来相帮吃,一家人家拨侬吃穷个呀,
二媳妇 死人,屋里穷得来像清水汰过一样清爽,啥个开心还讲得落笑话?
张二生 哼,
二媳妇 动动脑劲.
张二生 哎呀,动啥个脑筋啊哈?
二媳妇 依我看啊一笔写不写出两个张字,
张二生 嗷?
二媳妇 呶,去问伊拉借呀.
张二生 唉,家子婆啊,
二媳妇 哪能啊?
张二生 三老太婆,死老太婆,了拉帮忙,搭我去借铜钿,
二媳妇 真个?
张二生 伊讲借得着借不着还呒么一定啦哩,侬等一等,我去看看看.
张二生 阿哥勿了拉屋里,只有嫂嫂一个人,迭能样子,我伲啊来唱特一只戏,
二媳妇 啥个戏啊?
张二生 假寻相骂.
二媳妇 哦,
张二生 我么打侬骂侬
二媳妇 嗯,
张二生 等嫂嫂一出场,我伲柴米油都又着港.
二媳妇 来事伐?
张二生 来事个啊,
二媳妇 个么死人呀,我关照侬,侬勿好真个打我个嗷,
张二生 假个呀,假个呀,哪能真格呢?
二媳妇 好,个么来,来来来来来,
张二生 好侬只贱货色,今朝我一定要收作侬勿可,咹,哭呀,死人,哭啊,耶,
二媳妇 哎呀,苦啊苦啊,只烂料坯转来要打女人啊,
张二生 好,侬逃到啥地方去啊?我一定要打煞侬,啊,
三好婆 啥事体啊,又啦哇啦哇啦待啊?
张二生 好啊,收作侬,咹
二媳妇 嗷哟,嗷哟救命啊,喔唷救命啊,
张二生 打煞侬一命抵一命,
三好婆 啥事体啊?啥事体啊? 杀坯啊,
大嫂 张二生,你为啥打三好婆啊?
张二生 哦,我打错了打错了,
三好婆 喔唷,
张二生 好个呀,我今朝一定要收作侬,
二媳妇 侬这只死人跑过来啊,跑过来我拿家生统统全摜光.
张二生 侬敢摜,三好婆侬不要劝嗷,
三好婆 好待,勿要再吵待,
张二生 嫂嫂侬勿要劝,我一定要收作伊啊,
二媳妇 啊,我勿敢摜啊?勿敢摜么我偏要摜,
张二生 喔唷,侬真个敢摜啊,好,侬真…,
二媳妇 勿敢摜啊,我还要摜,哪能啊?
张二生 叫侬勿要…
儿媳妇 哎呀哇啊,你真格打个,是伐?
张二生 耶?
大嫂 是啊,叔叔啊,侬哪能可以真格打弟媳妇个呢?
张二生 哟哟哟
大嫂 乃叫讲讲么待,齐叫迭个一些么事摜不坏,要是摜坏特仔么哪能办呢?
张二生 寿女人
儿媳妇 只烂料坯,
张二生 死货色
儿媳妇 杀千刀
张大生 像啥样子哦,
三好婆 嗨,真是蟑螂配灶鸡,一对好夫妻,嗷,
张大生 到底哪能一桩事呀?
大嫂 无非为两个铜钿,叔叔要做生意缺少一点本钿,张大生啊,侬 就作作主吧,
张大生 哦呵,大娘娘啊,今朝真巧,哦呵,齐巧有船,我想马上要走个,
大嫂 咹
张大生 侬帮我去准本准备行李
大嫂 好个,我搭侬准备准备
三好婆 %E |
提升卡
置顶卡
沉默卡
喧嚣卡
变色卡
抢沙发
显身卡
